Eaha to roto?

Mau faaho'iraa ê

Tapura tumu parau

Ite no Iehova

Tahiti

Bibilia i nia i te reni | HURIRAA O TE AO APÎ O TE MAU PAPAI HELENI KERISETIANO

Hebera 9:1-28

HAAPOTORAA O TE MAU TUMU PARAU

  • Taviniraa mo‘a i te vahi mo‘a i te fenua (1-10)

  • E tomo te Mesia i roto i te ra‘i e to ’na toto (11-28)

    • Arai no te hoê faufaa apî (15)

9  I roto i te faufaa matamua, te vai ra te mau titauraa a te ture no te taviniraa mo‘a e te vahi mo‘a i te fenua nei.  I faatiahia na hoi te piha matamua o te tiahapa, to reira te mori* e te iri vairaa pane e te mau pane pûpûhia.* E parauhia taua vahi ra te Vahi Mo‘a.  I muri mai râ i te piti o te paruru, o te piha ïa o te tiahapa parauhia te Vahi Mo‘a Roa.  I reira, te vai ra te hoê vairaa mea no‘ano‘a auro e te afata faufaa tei tapiri-paatoa-hia i te auro. I roto i te afata faufaa, e farii auro ïa e mâna to roto, e te raau a Aarona tei puahia, e na pǎpǎ o te faufaa.  E i nia iho i te afata faufaa, na kerubi hanahana ïa e tamaru ra i te tapo‘i taraehara* i to raua na pererau. Tera râ, e ere teie te taime no te faahiti hu‘ahu‘a ’tu i teie mau mea.  I te otiraa teie mau mea i te hamanihia mai teie, e tomo te mau tahu‘a i roto i te piha matamua o te tiahapa i te mau mahana atoa no te rave i ta ratou taviniraa mo‘a.  Area te tahu‘a rahi, e tomo ïa o ’na ana‘e i roto i te piti o te piha hoê taime i te matahiti, a hopoi atoa ’i i te toto ta ’na e pûpû no ’na iho e no te mau hara ta te nunaa i rave ma te ite ore.  Te faaite maitai ra ïa te varua mo‘a* e aita â te e‘a e tae atu ai i te vahi mo‘a i faaitehia ’tura a tia noa ’i te tiahapa matamua.  E taipe teie tiahapa no teie nei tau, e ia au i teie faanahoraa e pûpûhia ’i te mau ô e te mau tusia atoa. E ere râ na roto i teie mau mea e noaa ’i i te taata o te rave nei i te taviniraa mo‘a te hoê mana‘o haava maitai roa. 10  Teie râ mau ô e tusia, e maa ana‘e ïa, e inu e e horoiraa e rave rau* ia au i te ture a Mose. E mau titauraa o te ture te reira no nia i te mau mea pae tino e tei haamauhia tae noa ’tu i te tau faataahia e faatitiaifarohia ’i te mau mea. 11  Teie râ, i to te Mesia haereraa mai ei tahu‘a rahi no te mau mea maitatai tei tupu a‘ena, ua na roto atu oia i te tiahapa rahi a‘e e te maitai roa ’tu â e ere mea hamanihia e te rima taata, oia hoi e ere mea poietehia i te fenua nei. 12  Ua tomo oia i roto i te vahi mo‘a, eiaha ma te toto o te puaaniho e to te puaatoro oni apî, ma to ’na iho râ toto, hoê roa tomoraa, e ua noaa mai ia tatou te faaoraraa* mure ore. 13  Mai te peu e e mo‘a te feia tei viiviihia, a mâ ’tu ai ratou, i te toto o te puaaniho e to te puaatoro oni e te rehu o te puaatoro ufa apî tei pîpîhia i nia ia ratou, 14  hau atu â ïa te toto o te Mesia, o tei pûpû ia ’na iho ei tusia tia roa i te Atua maoti te ohiparaa a te varua mo‘a mure ore, i te tamâ i to tatou mana‘o haava i te mau ohipa pohe, a nehenehe atu ai tatou e pûpû i te hoê taviniraa mo‘a i te Atua ora. 15  No reira, e arai oia no te hoê faufaa apî, no te mea ua pohe oia ia tiamâ te feia tei titau-manihini-hia maoti te hoo* i te mau hara i ravehia i raro a‘e i te faufaa matamua, a fatu atu ai ratou i te mau haamaitairaa mure ore tei fafauhia. 16  Mai te peu e e faufaa, ia pohe ïa te taata tei faaau i te faufaa e tia ’i, 17  no te mea e mana te hoê faufaa ia pohe te taata tei faaau i te reira, e ore roa hoi te reira e mana a ora noa ’i oia. 18  No reira, aita atoa te faufaa matamua i haamauhia* ma te ore e ninii i te toto. 19  I te otiraa hoi ia Mose i te faahiti i te mau faaueraa atoa o te ture a Mose i te nunaa taatoa, ua rave oia i te toto o te puaatoro oni apî e to te puaaniho, e te pape, te huruhuru mamoe uteute e te amaa hisopa, e ua pîpî i te buka* e te nunaa taatoa i te reira, 20  a na ô ai: “Teie te toto o te faufaa ta te Atua i faaue ia outou ia haapao.” 21  Ua pîpî atoa oia i te tiahapa e te mau farii atoa no te taviniraa mo‘a i te toto. 22  Oia mau, ua tamâhia te rahiraa o te mau mea i te toto ia au i te ture a Mose, aita ana‘e e toto i manii, aita atoa ïa e faaoreraa hara. 23  No reira, mea titauhia ia tamâhia te mau taipe o te mau mea o te ra‘i na roto i te mau tusia animara, e titau râ te mau mea o te ra‘i i te mau tusia maitai a‘e. 24  Aita hoi te Mesia i tomo i roto i te hoê vahi mo‘a hamanihia e te rima taata, e hoho‘a hoi teie o te vahi mo‘a mau, i roto râ i te ra‘i, a tia ’tu ai oia i teie nei i mua i te Atua* no tatou. 25  E ere no te pûpû ia ’na ei tusia e rave rahi taime, mai te tahu‘a rahi e tomo i roto i te vahi mo‘a i te mau matahiti atoa ma te toto eiaha râ to ’na iho. 26  Ahiri aita ra, ua mauiui ïa oia e rave rahi taime mai te omuaraa mai â o teie nei ao.* E teie nei râ, ua faaite mai oia ia ’na iho hoê roa faaiteraa i te anotau hopea o te mau faanahoraa o te ao nei* no te faaore i te hara na roto i te pûpûraa ia ’na iho ei tusia. 27  E pohe te taata hoê roa poheraa, tera râ, e haavaraa to muri mai, 28  oia atoa te Mesia, ua pûpûhia ïa ei tusia hoê roa pûpûraa no te amo i te mau hara a te taata e rave rahi, e i te piti o te taime e haere mai ai oia, e ere ïa no te hopoi ê i te hara,* e itehia râ oia e te feia e tiai maite nei ia ’na ia faaorahia ratou.

Nota i raro i te api

E mori avae auro teie e hitu amaa.
Aore ra “pane o te aro.” A hi‘o i te titionare.
Aore ra “te vahi o te tapo‘iraa hara.”
Aore ra “puai ohipa o te Atua.”
“E bapetizoraa e rave rau” na roto i te reo Heleni.
“Hoo,” “faatiamâraa” na roto i te reo Heleni.
A hi‘o i te titionare.
“Avarihia” na roto i te reo Heleni.
Aore ra “otaro.”
“I mua i te aro o te Atua” na roto i te reo Heleni.
Oia hoi a tamariihia ’i Adamu raua Eva.
Aore ra “te mau tau.” A hi‘o i te titionare.
Aore ra “e ere ïa no te hara.”