Eaha to roto?

Mau faaho'iraa ê

Tapura tumu parau

Ite no Iehova

Tahiti

Bibilia i nia i te reni | HURIRAA O TE AO APÎ O TE MAU PAPAI HELENI KERISETIANO

Hebera 7:1-28

HAAPOTORAA O TE MAU TUMU PARAU

  • Melehizedeka, arii e tahu‘a otahi (1-10)

  • Hau ê roa to te Mesia toroa tahu‘a (11-28)

    • E tia i te Mesia ia faaora roa (25)

7  Ua farerei hoi taua Melehizedeka ra, arii no Salema, tahu‘a na te Atua Teitei, ia Aberahama o te ho‘i mai ra i te pauraa te mau arii ia ’na e ua haamaitai ia ’na,  e ua horoa* Aberahama na ’na i te ahuru o te mau mea atoa ta ’na i haru mai. Na mua, “Arii o te parau-tia” te auraa o to ’na i‘oa, e arii atoa oia no Salema, “Arii o te hau” ïa.  Aore e metua tane to ’na, aore e metua vahine, aore e pǎpǎraa tupuna, aore e haamataraa to to ’na pue mahana e aore atoa e hopea to to ’na oraraa, ua faarirohia râ oia mai te Tamaiti a te Atua ra te huru, e vai noa ïa oia ei tahu‘a no te mau tau atoa.*  A hi‘o na i te rahi o taua taata ra ta Aberahama, te upoo utuafare,* i horoa ’tu i te ahuru o te mau mea maitai roa ’‘e ta ’na i haru mai.  Parau mau, ia au i te ture a Mose, ua faauehia to te mau tamaiti a Levi tei faatoroahia ei tahu‘a, ia rave mai i te ahuru o te mau tao‘a a te nunaa, oia hoi to ratou mau taeae, noa ’tu e e huaai ratou no Aberahama.  Area taua taata ra e ere no roto mai i te utuafare o Levi, ua rave mai ïa i te ahuru o ta Aberahama mau tao‘a i haru mai, e ua haamaitai ia ’na o tei faaitehia ’tu te mau parau fafau.  E teie nei, e farii iho â te taata e ua haamaitaihia tei iti a‘e na tei rahi a‘e.  Te vai ra o te rave mai i te tuhaa ahuru, e pohe hoi ratou, tera râ, te vai ra o tei faaite-papu-hia e e ora noa oia.  E nehenehe atoa e parau e tae noa ’tu ia Levi, o te rave mai hoi i te tuhaa ahuru, ua horoa atoa oia i te tuhaa ahuru na roto ia Aberahama, 10  to roto noa â hoi oia* i to ’na tupuna a farerei ai Melehizedeka ia ’na. 11  Ahiri e noaa te tia-roa-raa na roto noa i te mau tahu‘a no te opu o Levi (tuhaa faufaa hoi o te ture a Mose tei horoahia i te nunaa), eaha ïa e hinaarohia ’i te tahi atu tahu‘a tei parauhia e mai ia Melehizedeka ra te huru, eiaha râ mai ia Aarona? 12  I te mea hoi e te taui ra te toroa tahu‘a, ia taui-atoa-hia ïa te ture a Mose e tia ’i. 13  E mero hoi oia no te tahi atu opu, aita hoê a‘e i rave i te ohipa i te fata, no ’na teie mau parau i parauhia. 14  Mea papu hoi e no roto mai to tatou Fatu ia Iuda, aita râ Mose i faahiti i te tahi noa ’‘e parau no nia i te mau tahu‘a no roto mai i taua opu ra. 15  E mea papu roa ’tu â e mai ia Melehizedeka ra te huru e tia mai ai te tahi atu tahu‘a. 16  E ohipa oia ei tahu‘a, e ere no te opu no reira mai oia mai tei titauhia e te ture a Mose, no te mana râ e fana‘o ai oia i te ora o te ore roa e mou. 17  I parauhia na hoi no ’na ei haapapuraa: “E tahu‘a oe mai ia Melehizedeka ra te huru e a muri noa ’tu.” 18  No reira ïa te faaueraa tahito i faaorehia ’i, no te mea e faaueraa paruparu e te faufaa ore. 19  Aita hoê a‘e mea i tia-roa-hia i te ture a Mose, tera râ, ua tia-roa-hia i te faaôraahia mai te hoê tiaturiraa maitai a‘e, a nehenehe atu ai tatou e faafatata i te Atua. 20  Oia atoa, aita te reira i ravehia ma te tǎpǔ ore 21  (inaha, te vai ra tei riro mai ei tahu‘a ma te tǎpǔ ore, area teie, ua riro mai ïa ei tahu‘a na roto i te hoê tǎpǔ a tei parau mai: “Ua tǎpǔ Iehova,* e eita oia e taui i to ’na mana‘o:* ‘E tahu‘a oe e a muri noa ’tu’”), 22  ua riro mai ïa Iesu ei haapapuraa no te hoê faufaa maitai a‘e. 23  Hau atu â, mea rahi tei riro mai ei tahu‘a te tahi i muri iho i te tahi, no te pohe hoi i ore ai ratou e tamau i to ratou toroa, 24  area oia o te ora noa e a muri noa ’tu, eita hoê a‘e e mono ia ’na ei tahu‘a. 25  No reira e tia atoa ’i ia ’na ia faaora roa i te feia e faafatata nei i te Atua na roto ia ’na, no te mea te ora noa ra oia no te taparuparu i te Atua no ratou. 26  Tano maitai hoi no tatou taua huru tahu‘a rahi ra, mea taiva ore, te hapa ore, te viivii ore, e ere oia mai te feia hara, e ua faateiteihia i nia ’‘e i te mau ra‘i. 27  E ere oia mai taua mau tahu‘a rahi ra, eita e titauhia ia pûpû oia i te mau tusia pauroa te mahana, na mua no ta ’na iho mau hara, e i muri iho no ta te nunaa, no te mea ua na reira oia hoê roa pûpûraa i to ’na pûpûraa ia ’na iho ei tusia. 28  I raro a‘e i te ture a Mose, e feia e paruparu to ratou te faatoroahia ei tahu‘a rahi, i muri a‘e râ i te ture a Mose e ia au hoi i te parau i tǎpǔhia, o te hoê ïa tamaiti te faatoroahia, oia tei tia-roa-hia e a muri noa ’tu.

Nota i raro i te api

“Tufa” na roto i te reo Heleni.
Aore ra “e a muri noa ’tu.”
Aore ra “patereareha.”
Oia hoi aita â oia i fanauhia mai ei huaai no Aberahama.
A hi‘o i te titionare.
Aore ra “eita oia e tatarahapa.”