Eaha to roto?

Mau faaho'iraa ê

Tapura tumu parau

Ite no Iehova

Tahiti

Bibilia i nia i te reni | HURIRAA O TE AO APÎ O TE MAU PAPAI HELENI KERISETIANO

Hebera 6:1-20

HAAPOTORAA O TE MAU TUMU PARAU

  • Haere ru i mua i te paari i te pae varua (1-3)

  • E patiti faahou te feia taiva i te Tamaiti i nia i te pou (4-8)

  • Ia papu maitai to outou tiaturiraa (9-12)

  • Mea papu ta te Atua parau fafau (13-20)

    • Ta te Atua parau fafau e ta ’na tǎpǔ o te ore roa e taui (17, 18)

6  E teie nei, ua tiaturi a‘ena tatou i te mau haapiiraa ta tatou i ite na no nia i te Mesia, e haere ru ana‘e ïa i mua i te paari i te pae varua, ma te ore e haamau faahou i te niu, oia hoi te tatarahaparaa i te mau ohipa pohe e te faaroo i te Atua,  te haapiiraa o te mau bapetizoraa e te tuuraa rima, te tia-faahou-raa o tei pohe e te haavaraa mure ore.  O ta tatou ïa e rave ia tia hoi i te Atua.  Te feia hoi tei haamaramaramahia e tei fana‘o i te ô horoa noa no te ra‘i mai e tei apiti i te ohiparaa a te varua mo‘a,  e tei fana‘o i te parau maitai roa a te Atua e te mau ohipa mana tei taaihia i te faanahoraa o te ao nei* no a muri a‘e,  tei taiva râ, eita roa ïa e nehenehe e tauturu ia ratou ia tatarahapa, no te mea te patiti faahou ra ratou i te Tamaiti a te Atua i nia i te pou e te faahaama ra ratou ia ’na i mua i te taata atoa.  E haamaitairaa no ǒ mai i te Atua te ûa e mairi pinepine no te fenua, no te mea e faarari te reira i te fenua, a tupu mai ai te maa hinaaro-mau-hia e te feia faaapu.  Ia tupu mai râ te raau taratara, e faaruehia tera fenua, a faainohia ’tu ai e i te pae hopea, e taninahia i te auahi.  Area outou, taeae here ma, parau noa ’tu ai matou i teie nei parau, ua papu ia matou e e tupuraa maitai a‘e to outou, e te rave nei outou i te mau mea e faaorahia ’i outou. 10  E ere hoi te Atua i te Atua parau-tia ore a mo‘e ai ia ’na ta outou ohipa e to outou hinaaro rahi i to ’na i‘oa ma te tavini e ma te tamau i te tavini i te feia mo‘a. 11  Te hinaaro nei râ matou ia faaite outou tataitahi i te hoê â itoito rahi ia papu maitai to outou tiaturiraa e tae noa ’tu i te hopea, 12  ia ore hoi outou ia faatau, ia pee râ i te hi‘oraa o te feia e fatu i te mau parau fafau no to ratou faaroo e to ratou faaoromai. 13  I to te Atua fafauraa i ta ’na parau ia Aberahama, i te mea e aita te hoê i teitei a‘e ia ’na e tǎpǔ ai oia, ua tǎpǔ ïa oia na nia ia ’na iho, 14  a na ô ai: “E haamaitai iho â vau ia oe e e faarahi mau â vau ia oe.” 15  I muri a‘e hoi i to Aberahama faaiteraa i te faaoromai i fafauhia ’i ia ’na teie parau. 16  E horeo hoi te taata na nia i te hoê tei teitei a‘e ia ratou, a ore atu ai te mau mârôraa atoa i ta ratou tǎpǔ, i te mea e e haapapuraa mana hoi te reira no ratou. 17  Oia atoa, i to te Atua faaotiraa e faaite maitai atu â i te feia e fatu i te parau fafau e e ore roa ta ’na opuaraa* e taui, ua haapapu oia i te reira* na roto i te hoê tǎpǔ, 18  na roto hoi i teie na parau e piti o te ore roa e taui, e ore atoa e tia i te Atua ia haavare, e faaitoito-mau-hia ïa tatou, o tei horo i te haapuraa a te Atua, ia tapea maite i te tiaturiraa i tuuhia mai i mua ia tatou. 19  Teie tiaturiraa to tatou, mai te hoê ïa tutau no to tatou ora,* mea papu e te aueue ore atoa, o te tomo i roto i te vahi i muri mai i te paruru, 20  i reira Iesu te matamua i te tomoraa ’tu no tatou, o ’na hoi tei riro ei tahu‘a rahi mai ia Melehizedeka ra te huru e a muri noa ’tu.

Nota i raro i te api

Aore ra “te tau.” A hi‘o i te titionare.
Aore ra “a‘oraa.”
Aore ra “ua ohipa mai oia.” “Ua arai mai oia” na roto i te reo Heleni.
Heleni pusuke. A hi‘o i te titionare.