Eaha to roto?

Mau faaho'iraa ê

Tapura tumu parau

Ite no Iehova

Tahiti

Bibilia i nia i te reni | HURIRAA O TE AO APÎ O TE MAU PAPAI HELENI KERISETIANO

Hebera 5:1-14

HAAPOTORAA O TE MAU TUMU PARAU

  • Hau ê roa Iesu i te mau tahu‘a rahi (1-10)

    • Mai ia Melehizedeka ra te huru (6, 10)

    • Haapii oia i te auraro na roto i ta ’na i faaruru (8)

    • Ravea e noaa ’i te faaoraraa mure ore (9)

  • A ara i te huru tamarii i te pae varua (11-14)

5  Te tahu‘a rahi i ravehia no roto mai i te taata, ua faatoroahia ïa no te taviniraa i te Atua no te maitai o te mau taata, a pûpû ai oia i te ô e te tusia no te mau hara.  E nehenehe oia e aumihi* i te feia ite ore e tei hapa,* i te mea e te faaruru atoa ra oia i to ’na iho mau paruparu,*  e no reira, ia pûpû oia i te tusia no ta ’na iho mau hara e tia ’i, mai ta ’na e na reira atoa ra no te mau hara a te nunaa.  E ere na te hoê taata e faaoti e rave i teie toroa hanahana, na te Atua râ tei titau manihini ia ’na e faatoroa ia ’na, mai ia Aarona.  Oia atoa te Mesia, aita oia i faahanahana ia ’na iho ma te faariro ia ’na ei tahu‘a rahi, ua faahanahanahia râ oia e te Atua tei parau ia ’na: “O oe ta ’u tamaiti. I teie mahana ua riro vau ei metua no oe.”  I parau atoa na oia: “E tahu‘a oe mai ia Melehizedeka ra te huru e a muri noa ’tu.”  A ora ’i oia i nia i te fenua,* i pure na te Mesia i te Atua tei nehenehe e faaora ia ’na i te pohe ma te taparuparu e te aniraa, ma te auê e te roimata, e ua faaroohia oia no to ’na mǎta‘u i te Atua.  E noa ’tu e e tamaiti oia, ua haapii oia i te auraro na roto i te mau mea ta ’na i faaruru.  E i muri a‘e i to ’na auraroraa ma te tia roa, ua riro oia ei ravea e noaa ’i i te feia atoa e auraro ia ’na te faaoraraa mure ore, 10  no te mea ua maitihia oia e te Atua ei tahu‘a rahi mai ia Melehizedeka ra te huru. 11  Mea rahi hoi ta matou e nehenehe e parau no nia i te Mesia, e mea fifi ia faataa ’tu no te mea ua turiturihia to outou tari‘a. 12  Ei taata haapii hoi outou i teie nei,* e aita râ, e mea titauhia ia haapii â te hoê taata ia outou i te mau mea rii o te poroi mo‘a a te Atua mai te haamataraa mai, e ua hiaai faahou outou i te û, eiaha te maa etaeta. 13  Te taata hoi e inu noa i te û, aita ïa i ite i te parau o te parau-tia, e tamarii iti hoi oia. 14  Area te maa etaeta, na te feia paari ïa i te pae varua, te feia o te faaohipa noa i to ratou haro‘aro‘a,* a haapii atu ai ia ratou iho ia faataa ê i te maitai i te ino.

Nota i raro i te api

Aore ra “faaite i te mǎrû i nia.”
Aore ra “hahi ê.”
Aore ra “e paruparu atoa to ’na.”
“I te mau mahana o to ’na oraraa i roto i te tino nei” na roto i te reo Heleni.
“Ia hi‘ohia te tau” na roto i te reo Heleni.
Aore ra “feruriraa.”