Eaha to roto?

Mau faaho'iraa ê

Tapura tumu parau

Ite no Iehova

Tahiti

Bibilia i nia i te reni | HURIRAA O TE AO APÎ O TE MAU PAPAI HELENI KERISETIANO

Hebera 13:1-25

HAAPOTORAA O TE MAU TUMU PARAU

  • Faaitoitoraa e aroharaa hopea (1-25)

    • Eiaha e haamo‘e i te farii maitai (2)

    • Ia tura te faaipoiporaa (4)

    • Faaroo i te mau aratai (7, 17)

    • Pûpû i te hoê tusia arueraa (15, 16)

13  A tamau noa i te here te tahi i te tahi ei taeae.  Eiaha e haamo‘e i te farii maitai,* ma te na reira hoi vetahi i farii ai i te melahi, ore noa ’i ratou i ite e e melahi.  A haamana‘o i te feia i roto i te fare tapearaa,* mai te huru ra e ua tapeahia outou e o ratou, e te feia e hamani-ino-hia ra, i te mea e e tino atoa to outou mai to ratou.*  Ia tura te faaipoiporaa no te taata atoa, e ia vai viivii ore te ro‘i o te feia faaipoipo, e faautua hoi te Atua i te feia e rave ra i te mau peu taotoraa tia ore* e te feia faaturi.  Eiaha roa ei nounou moni i roto i to outou oraraa, ia mauruuru râ i ta outou mau mea e vai nei. Ua parau hoi te Atua: “E ore roa vau e vaiiho ia oe, e e ore roa vau e faarue ia oe.”  Ia itoito roa hoi tatou e ia parau: “O Iehova* to ’u tauturu. E ore au e mǎta‘u. Eaha hoi ta te taata e nehenehe e rave i nia ia ’u?”  A haamana‘o i te mau aratai i rotopu ia outou, o tei parau ia outou i te parau a te Atua, e a hi‘opoa maite ai outou i ta to ratou haerea e faatupu ra, a pee i to ratou faaroo.  Inanahi, i teie mahana e a muri noa ’tu, e ore roa Iesu Mesia e taui.  Eiaha outou e pee hanoa i te mau haapiiraa ěê ua rau te huru, mea maitai a‘e hoi ia itoito to outou aau i te hamani maitai rahi eiaha râ i te maa,* aita hoi e maitai i noaa mai i te feia tei haafaufaa a‘e i te maa. 10  E fata ta tatou aita e tiaraa to te feia e pûpû i te taviniraa mo‘a i te tiahapa ia amu i tei pûpûhia i nia iho. 11  Te mau tino hoi o taua mau animara ra tei hopoihia to ratou toto e te tahu‘a rahi i roto i te vahi mo‘a ei tusia no te hara, e taninahia ïa i te auahi i rapae mai i te puhapa. 12  No reira Iesu i mauiui atoa ’i i rapae mai i te uputa oire no te haamo‘a i te mau taata i to ’na iho toto. 13  E haere ana‘e ïa ia ’na ra i rapae mai i te puhapa, a faaruru ai i te faainoraa ta ’na i faaruru, 14  aita hoi to tatou e oire i ǒ nei o te vai noa mai, te tiai ru nei râ tatou i te oire no a muri a‘e. 15  Na roto ia Iesu, e pûpû noa ana‘e i te Atua i te hoê tusia arueraa, oia hoi te mau parau no roto mai i to tatou vaha o te faaite i to ’na i‘oa i te taata atoa. 16  Hau atu â, eiaha e haamo‘e i te rave i te maitai e i te tufa i ta outou mau mea na vetahi ê, e mauruuru hoi te Atua i taua mau huru tusia ra. 17  A faaroo i te mau aratai i rotopu ia outou e a auraro atu, te tiai noa ra hoi ratou ia outou* a haavahia ’tu ai ratou no ta ratou i rave, ia nehenehe ratou e na reira ma te oaoa eiaha râ ma te autâ, mea ino hoi no outou ia autâ ratou. 18  A tamau noa i te pure no matou, ua papu hoi ia matou e e mana‘o haava mâ* to matou e te hinaaro ra matou ia afaro noa to matou haerea i te mau mea atoa. 19  Tera râ, te ani ru nei au ia outou ia pure ia ho‘i oioi atu vau ia outou ra. 20  E teie nei, te Atua hau o tei faatia mai te pohe mai i te tiai mamoe rahi, to tatou Fatu ra o Iesu, i te toto o te hoê faufaa mure ore, 21  ia horoa ’tu ïa i te mau mea maitatai atoa no te rave i to ’na hinaaro, a turai atu ai ia tatou na roto ia Iesu Mesia ia rave i ta ’na e mauruuru. I te Atua hoi te hanahana e a muri noa ’tu. Amene. 22  E teie nei, te ani ru nei au ia outou, taeae ma, ia faaroo maite i teie parau faaitoitoraa, ua papai hoi au i te hoê rata poto na outou. 23  Te hinaaro ra vau ia ite outou e ua tuuhia mai to tatou taeae Timoteo. Ia tae oioi mai oia, o mâua ïa te haere atu e hi‘o ia outou. 24  A aroha ’tu i te mau aratai atoa i rotopu ia outou e te feia mo‘a atoa. Te aroha ’tu nei to Italia ia outou. 25  Ei ia outou paatoa te hamani maitai rahi o te Atua.

Nota i raro i te api

Aore ra “hamani maitai i te mau taata ěê.”
“Te feia i taamuhia” na roto i te reo Heleni.
Nehenehe atoa e hurihia “mai te huru ra e te mauiui ra outou e o ratou.”
A hi‘o i te titionare.
A hi‘o i te titionare.
Oia hoi te mau ture no nia i te maa.
Heleni pusuke. A hi‘o i te titionare.
“Maitai” na roto i te reo Heleni.