Eaha to roto?

Mau faaho'iraa ê

Tapura tumu parau

Ite no Iehova

Tahiti

Bibilia i nia i te reni | HURIRAA O TE AO APÎ O TE MAU PAPAI HELENI KERISETIANO

Hebera 12:1-29

HAAPOTORAA O TE MAU TUMU PARAU

  • Iesu, te Faatia roa o to tatou faaroo (1-3)

    • Nahoa rahi ite (1)

  • Eiaha e haafaufaa ore i te a‘o a Iehova (4-11)

  • Haamanina i te mau e‘a no to outou avae (12-17)

  • Haafatata ia Ierusalema i te ra‘i (18-29)

12  No reira, no te mea e nahoa rahi ite* te haaati nei ia tatou, e haapae atoa ana‘e ïa i te mau mea teimaha atoa e te hara e faataupupu ohie ia tatou, e e horo ana‘e ma te faaoromai tamau i te hororaa i tuuhia i mua ia tatou,  a tiatonu ai ia Iesu te Aratai rahi e te Faatia roa o to tatou faaroo. No te oaoa i tuuhia i mua ia ’na i faaoromai ai oia i te pou haamauiuiraa* ma te tâu‘a ore i te haama, e i parahi ai i te pae atau o te terono o te Atua.  Oia mau, a haamana‘o maite i tei faaoromai rahi i te mau parau patoi a te feia hara o te faautua ra ia ratou iho, a ore atu ai outou e rohirohi e e toaruaru.  I roto i ta outou taputôraa i taua hara ra, aita outou i aro a‘enei a tahe roa ’tu ai to outou toto.  E ua mo‘e roa ia outou te a‘oraa e horoahia ra ia outou ei tamaiti: “Ta ’u tamaiti, eiaha e haafaufaa ore i te a‘o no ǒ mai ia Iehova,* eiaha atoa e toaruaru ia faaite o ’na i ta oe hapa.  E a‘o hoi Iehova* i te feia mea here na ’na, oia mau, e tairi oia i te taata atoa ta ’na e farii ei tamaiti.”  A faaoromai tamau, no te mea e a‘o* te reira no outou. Te na reira nei te Atua ia outou ei tamaiti na ’na. O vai hoi te tamaiti e ore e a‘ohia e to ’na metua tane?  Mai te peu râ e aita outou paatoa i a‘ohia, e tamarii ïa outou na te tahi atu, e ere râ i te tamaiti mau na ’na.  Hau atu â, i a‘o noa na to tatou mau metua tane ia tatou, e ua faatura tatou ia ratou. Eiaha anei ïa tatou e auraro noa ’tu â i te Metua o to tatou ora pae varua, a ora ’tu ai? 10  Ua a‘o hoi ratou ia tatou no te hoê taime poto ia au i ta ratou i mana‘o e mea maitai, area te Atua, te a‘o ra ïa ia tatou no to tatou maitai ia nehenehe tatou e apiti i to ’na mo‘araa. 11  E ere iho â i te mea oaoa i te taime e a‘ohia mai ai, mea mauiui.* I muri a‘e râ, e faatupu te a‘o i te parau-tia o te horoa i te hau i te feia tei haapiihia i te reira. 12  No reira, a faaetaeta i te mau rima e tautau ra e te turi paruparu, 13  e a haamanina noa i te mau e‘a no to outou avae, ia ore hoi te avae o te piri‘o‘i e ma‘o‘i, ia ora râ. 14  A tapi i te parahi hau noa e te taata atoa, e i te haamo‘a ia outou, aita ana‘e aore ïa e taata e ite i te Fatu. 15  A haapao maitai ia ore te hoê ia ere i te hamani maitai rahi o te Atua, eiaha roa hoi e a‘a taero e oteo mai o te faatupu i te peapea, e mea rahi tei viivii i te reira. 16  E a ara eiaha roa ei taata o te rave ra i te mau peu taotoraa tia ore* i rotopu ia outou, eiaha atoa ei taata o te haafaufaa ore ra i te mau mea mo‘a, mai ia Esau o tei horoa i ta ’na tufaa matahiapo no te hoê noa maa. 17  Ua ite hoi outou e i muri a‘e, i to ’na hinaaroraa e fatu i te haamaitairaa, aita oia i fariihia. Noa ’tu e ua onoono oia ma te roimata ia taui to ’na metua tane i te mana‘o, aita oia i manuïa. 18  Aita hoi outou i haafatata i te mou‘a e nehenehe e fafahia e tei ura i te auahi, e i te ata ereere e te poiri rahi e te vero, 19  e te oto pu e te reo o te Atua, ta te feia o tei faaroo atu i taparu ia Mose eiaha taua reo ra ia paraparau faahou mai ia ratou. 20  Ua riaria roa hoi ratou i te faaueraa: “Ia taahi noa ’tu te tahi animara i nia i te mou‘a, ia pehihia ïa i te ofai.” 21  Oia atoa, no te riaria rahi o taua mau mea ra i parau ai Mose: “Te mehameha nei au e te rûrû nei.” 22  Tera râ, ua haafatata outou i te mou‘a Ziona, te oire o te Atua ora, te Ierusalema i te ra‘i, e te mau ahuru tausani melahi 23  tei tairuru rahi mai, e te amuiraa o te mau tamaiti matahiapo tei papaihia te i‘oa i roto i te ra‘i, e te Atua te Haava o te taata atoa, e te ora pae varua o te feia parau-tia tei tia-roa-hia, 24  e ia Iesu te arai o te hoê faufaa apî, e te toto tei pîpîhia e tei hau a‘e i te maitai i to Abela toto. 25  A ara a‘unei hoi outou e ore ai e faaroo* i tei paraparau ra. Taua feia ra hoi tei ore i faaroo i te faaararaa a te Atua i te fenua nei, aita ïa i ora mai, hau atu â ïa tatou i te ore e ora mai ia fariu ê mai tatou i tei paraparau ra mai te ra‘i mai! 26  I taua taime ra, ua faaaueue to te Atua reo i te fenua, i teie nei râ, ua fafau oia: “E faaaueue faahou â vau eiaha noa i te fenua, i te ra‘i atoa râ.” 27  E teie nei, te faaite ra te parau “faahou â” e e mou te mau mea tei faaaueuehia, te mau mea i hamanihia, ia vai noa mai hoi te mau mea aita i faaaueuehia. 28  No reira, i te mea e e noaa ia tatou te hoê Faatereraa arii* e ore e tia ia faaaueuehia, e tamau noa ana‘e i te fana‘o i te hamani maitai rahi, a nehenehe atu ai tatou e pûpû i te Atua i te hoê taviniraa mo‘a ta ’na e au ma te mǎta‘u e te faatura. 29  E auahi ura hoi to tatou Atua.

Nota i raro i te api

“E ata rahi ite” na roto i te reo Heleni.
A hi‘o i te titionare.
A hi‘o i te titionare.
A hi‘o i te titionare.
Aore ra “haapiiraa.”
Aore ra “oto.”
A hi‘o i te titionare.
Aore ra “e ore ai e tâu‘a.”
Aore ra “Basileia.”