Eaha to roto?

Mau faaho'iraa ê

Tapura tumu parau

Ite no Iehova

Tahiti

Bibilia i nia i te reni | HURIRAA O TE AO APÎ O TE MAU PAPAI HELENI KERISETIANO

Hebera 11:1-40

HAAPOTORAA O TE MAU TUMU PARAU

  • Auraa o te faaroo (1, 2)

  • Hi‘oraa o te faaroo (3-40)

    • E ore roa te Atua e mauruuru i te taata aita e faaroo to ’na (6)

11  Te faaroo, o te tiairaa papu ïa i te mau mea tiaturihia, te haapapuraa maramarama o te mau mea mau aita e itehia ra.  Maoti hoi te faaroo i faaite ai te Atua i te feia no tahito ra* e ua mauruuru oia ia ratou.  No te faaroo i taa ’i ia tatou e ua haamauhia te mau faanahoraa o te ao nei* e te parau a te Atua, e ua faaohipa te Atua i te mau mea aita tatou e ite ra no te hamani i te mau mea ta tatou e ite ra.  No te faaroo i pûpû ai Abela i te hoê tusia hau a‘e i te faufaa i ta Kaina, e na roto i taua faaroo ra i faaitehia ’i ia ’na e e taata parau-tia oia, ua farii hoi te Atua i ta ’na mau ô, e noa ’tu e ua pohe oia, te paraparau noa mai ra â oia na roto i to ’na faaroo.  No te faaroo i ravehia ’i Enoha ia ore oia ia mauiui ia pohe oia, e aita oia i ite-faahou-hia no te mea i rave na te Atua ia ’na. Hou râ oia a ravehia ’i, ua faaite te Atua ia ’na e ua mauruuru oia ia ’na.  Hau atu â, e ore roa te Atua e mauruuru i te taata aita e faaroo to ’na, ia tiaturi hoi te taata e faafatata i te Atua e te ora ra* oia e e riro mai oia ei Atua o te haamaitai i te feia e imi maite nei ia ’na.  No te faaroo i mǎta‘u ai Noa i te Atua i muri a‘e i to te Atua faaararaa ia ’na i te mau mea aita â i itehia ’tura, e i hamani ai i te hoê araka ia ora to ’na utuafare. E na roto i teie faaroo i faahapa ’i oia i te ao, e i riro ai oia ei fatu no te parau-tia maoti te faaroo.  No te faaroo i auraro ai Aberahama i ta te Atua parau, a haere ai i te vahi ta ’na i fafau e horoa no ’na. Ua reva oia noa ’tu e aita oia i ite i te vahi ta ’na e haere ra.  No te faaroo i ora ’i oia ei taata ê i te fenua tǎpǔhia mai te hoê fenua ê, a ora ’i i roto i te mau fare ie e o Isaaka e o Iakoba, o te fatu atoa e o ’na i ta te Atua i fafau ia ratou. 10  Te tiai ra hoi oia i te oire e niu mau to te reira, na te Atua e opua* e e patu. 11  No te faaroo atoa i noaa ’i ia Sara te puai e hapû ai oia, a mairi atoa ’i to ’na matahiti no te fanau, i te mea e ua papu ia ’na e e nehenehe e tiaturi i Tei fafau mai ia ’na ra. 12  No reira ïa i fanauhia mai ai ta te hoê noa tane mai te taata pohe ra te huru, te mau tamarii mai te mau fetia o te ra‘i te rahi e mai te one i tatahi eita e pau ia taio. 13  Ua pohe teie mau taata atoa ma te faaroo, noa ’tu e aita i noaa ia ratou te mau mea i fafauhia. Ua ite atu râ ratou na te atea ê e ua farii popou atu e ua faaite haere e e taata ěê ratou e e purutia i taua fenua ra. 14  Te faaite maitai ra hoi te feia e faahiti ra i taua mau parau ra e te imi maite nei ratou i te hoê vahi ta ratou e fatu. 15  Tera râ, ahiri ratou i mana‘o noa i te vahi ta ratou i faarue na, ua tia noa ia ratou ia ho‘i. 16  E teie nei râ, te tiai ru nei ratou i te hoê vahi maitai a‘e, oia hoi no te ra‘i. No reira, aita te Atua i haama ia ratou ia parauhia oia ei Atua no ratou, ua faaineine hoi oia i te hoê oire no ratou. 17  No te faaroo i tae roa ’i Aberahama i te pûpû ia Isaaka ei tusia i to ’na tamataraahia. Ua ineine oia, o tei farii popou i te mau mea i fafauhia, i te pûpû i ta ’na tamaiti otahi, 18  noa ’tu tei parauhia ia ’na: “No roto mai ia Isaaka te feia e parauhia e huaai* no oe.” 19  Tera râ, ua tiaturi oia e e nehenehe ta te Atua e faatia mai i ta ’na tamaiti mai te pohe mai, e ua noaa mai iho â ia ’na ta ’na tamaiti mai te pohe mai ra te huru, a riro atu ai ei faahoho‘araa. 20  No te faaroo atoa i haamaitai ai Isaaka ia Iakoba raua Esau no nia i te mau mea e tupu a muri a‘e. 21  No te faaroo i haamaitai ai Iakoba i na tamaiti a Iosepha e i haamori ai i te Atua a turui ai oia i nia i ta ’na turutootoo, a fatata ’i oia i te pohe. 22  No te faaroo i faahiti ai Iosepha i te faarueraa te mau tamarii* Iseraela ia Aiphiti e i horoa ’i i te faaueraa no nia i to ’na mau ivi,* a fatata ’i oia i te pohe. 23  No te faaroo i hunahia ’i Mose e to ’na na metua e toru ava‘e i muri a‘e i to ’na fanauraahia mai, no te mea ua ite atu raua e mea nehenehe te tamaiti iti, e aita raua i mǎta‘u i te faaueraa a te arii. 24  No te faaroo i ore ai Mose i farii, i to ’na paariraa mai, ia parauhia oia te tamaiti a te tamahine a Pharao, 25  ua maiti oia ia rave-ino-hia oia e te nunaa atoa o te Atua, eiaha râ ia fana‘o i te mau mea navenave poto noa o te hara, 26  no te mea ua papu ia ’na e e faufaa rahi a‘e to te faainoraa ta ’na e faaruru ei Mesia* i te mau tao‘a rahi a Aiphiti, te tiatonu ra hoi oia i te fana‘oraa i te haamaitairaa. 27  No te faaroo i faarue ai oia ia Aiphiti, ma te ore râ e mǎta‘u i te riri o te arii, ua mau papu noa hoi oia mai te huru ra e te ite ra oia i te Atua ite-ore-hia. 28  No te faaroo i faatupu ai oia i te Pasa e te pîpîraa toto ia ore te melahi a te Atua ia haapohe* i ta ratou mau tamaiti matahiapo. 29  No te faaroo i na roto atu ai ratou i te miti Uteute mai i nia i te fenua mǎrô, tera râ, i te tamataraa to Aiphiti e na reira atoa, tapo‘ihia maira ratou e te miti. 30  No te faaroo i marua ’i te mau patu o Ieriko i raro i muri a‘e i to te nunaa Iseraela haaatiraa i te oire e hitu mahana. 31  No te faaroo i ore ai Rahaba te vahine taiata i pohe e te feia tei faaroo ore, no te mea ua farii maitai oia i na tane tei tonohia ia hi‘opoa omo‘e i te fenua. 32  E eaha ’tu â ta ’u e parau? Eita hoi e taimehia ia faatia ’tu vau no Gideona, Baraka, Samasona, Iepheta, Davida, e Samuela atoa, e te tahi atu mau peropheta. 33  No te faaroo i pau ai ia ratou te mau faatereraa arii tei aro mai, i tupu ai te parau-tia, i noaa ’i te mau mea i fafauhia, i piri ai te vaha o te mau liona, 34  i ore ai i paapaa i te auahi ura, i ore ai i pohe i te ‘o‘e, i puai mai ai i te paruparuraa ra, i aro ai ma te itoito, i a‘ua‘u ai i te mau nuu i tomo mai. 35  Ua noaa mai i te tahi mau vahine ta ratou mau tamarii tei pohe na roto i te tia-faahou-raa. Area te tahi atu mau tane, ua haamauiuihia ïa tae noa ’tu i te pohe, no te mea aita ratou i farii ia tuuhia ratou na roto i te tahi hoo, ia noaa râ te hoê tia-faahou-raa maitai a‘e. 36  Oia mau, te tamataraa ta te tahi atu i faaruru, te faaoooraa ïa e te huiraa, e hau atu â, te fifi auri e te tapearaa. 37  Ua pehihia ratou i te ofai, ua tamatahia to ratou faaroo, ua ‘e‘ehia na ropu,* ua taparahi-pohe-hia i te ‘o‘e, ua hahaere noa ma te iri mamoe e te iri puaaniho i nia iho ia ratou, a vai ai ratou i roto i te veve e te ati e a rave-ino-hia ’i ratou. 38  Aita i au i te ao nei taua mau taata ra. Ua overe haere ratou na te mau medebara e te mau mou‘a e te mau ana e te mau vahi apoo o te fenua. 39  Aita râ i noaa i teie mau taata atoa te mea i fafauhia, noa ’tu e ua faaite atu te Atua e ua mauruuru oia ia ratou no to ratou faaroo, 40  no te mea ua ite atea te Atua i te tahi mea maitai a‘e no tatou, ia ore hoi ratou ia tia-roa-hia, aita tatou.

Nota i raro i te api

Aore ra “to tatou mau tupuna.”
Aore ra “te mau tau.” A hi‘o i te titionare.
Aore ra “te vai mau ra.”
Aore ra “e hamani i te hoho‘a o taua oire ra.”
“Huero” na roto i te reo Heleni.
“Tamaiti” na roto i te reo Heleni.
Aore ra “to ’na hunaraa.”
“Kirito” na roto i te reo Heleni.
“Tairi” na roto i te reo Heleni.
Aore ra “ua ‘e‘ehia e taa ê atura.”