Eaha to roto?

Mau faaho'iraa ê

Tapura tumu parau

Ite no Iehova

Tahiti

Bibilia i nia i te reni | HURIRAA O TE AO APÎ O TE MAU PAPAI HELENI KERISETIANO

Hebera 10:1-39

HAAPOTORAA O TE MAU TUMU PARAU

  • Eita te tusia animara e hopoi ê i te hara (1-4)

    • E ata te ture a Mose (1)

  • Tusia o te Mesia hoê roa pûpûraa (5-18)

  • Ravea apî no te tomo i roto i te vahi mo‘a, e tae atu ai i te ora (19-25)

    • Eiaha e faarue i ta tatou mau putuputuraa (24, 25)

  • A ara i te hara ma te hinaaro mau (26-31)

  • Tiaturi e faaroo no te faaoromai tamau (32-39)

10  I te mea hoi e e ata te ture a Mose no te mau haamaitairaa e tupu a muri a‘e, e ere râ te mea mau o teie mau haamaitairaa, e ore roa ïa te feia e faafatata i te Atua e tia-roa-hia i te reira* e i taua â mau tusia ra e pûpû-noa-hia i te mau matahiti atoa.  Ahiri oia ra, e ore ïa te mau tusia e pûpû-faahou-hia, e ere anei? Ua mâ ana‘e hoi taua mau taata ra o te pûpû ra i te hoê taviniraa mo‘a, eita ïa to ratou mana‘o haava e hauti faahou no ta ratou mau hara.  Aita râ, e haamana‘o-noa-hia te mau hara i te mau matahiti atoa na roto i taua mau tusia ra,  eita hoi e tia i te toto o te puaatoro oni e to te puaaniho ia hopoi ê i te mau hara.  No reira, i to ’na haereraa mai i te ao nei, ua parau oia: “‘Te tusia e te ô, aita oe i hinaaro, ua faaineine râ oe i te hoê tino no ’u.  Aita oe i farii i te mau tusia taauahi e te mau tusia no te hara.’  Na ô atura vau: ‘Inaha, ua haere mai au (no ’u te parau i papaihia i roto i te otaro)* no te rave i to hinaaro, e te Atua e.’”  I to ’na parauraa na mua: “Aita oe i hinaaro e aita atoa i farii i te mau tusia e te mau ô e te mau tusia taauahi e te mau tusia no te hara,” e tusia hoi teie i pûpûhia ia au i te ture a Mose,  na ô atura oia: “Inaha, ua haere mai au no te rave i to hinaaro.” Ua faaore mau â oia i te faanahoraa matamua no te haamau i te piti o te faanahoraa. 10  No teie “hinaaro” i haamo‘ahia ’i tatou na roto i to Iesu Mesia pûpûraa i to ’na tino hoê roa pûpûraa. 11  Oia atoa, e tia te tahu‘a tataitahi i ta ’na ohipa i te mau mahana atoa no te pûpû i te hoê taviniraa mo‘a e no te pûpû i taua noa mau tusia ra e rave rahi taime, o te ore roa e tia ia hopoi ê roa i te mau hara. 12  O ’na râ, ua pûpû ïa i te hoê tusia no te mau hara no te mau tau atoa e ua parahi i te rima atau o te Atua, 13  a tiai atu ai e ia faarirohia to ’na mau enemi ei taahiraa avae no ’na. 14  Na roto hoê noa pûpûraa tusia i tia-roa-hia ’i ia ’na e a muri noa ’tu te feia e haamo‘ahia ra. 15  Hau atu â, te haapapu atoa mai ra te varua mo‘a a na ô ai: 16  “‘Teie te faufaa ta ’u e faaau ia ratou i muri a‘e i taua mau mahana ra,’ ta Iehova* ïa e parau ra. ‘E tuu vau i ta ’u mau ture i roto i to ratou aau, e i roto i to ratou mana‘o e papai ai au i te reira,’” 17  e na ô atura: “E e ore roa vau e haamana‘o faahou i ta ratou mau hara e ta ratou mau ohipa iino.” 18  Ia faaorehia teie mau hara, eita ïa e hinaaro-faahou-hia te tusia no te hara. 19  No reira, taeae ma, i te mea e te faaohipa nei tatou ma te mǎta‘u ore* i te ravea e tomo ai i roto i te vahi mo‘a* maoti te toto o Iesu, 20  ta ’na i iriti* no tatou ei ravea apî e tae atu ai i te ora na roto atu i te paruru, oia hoi to ’na tino, 21  e i te mea e e tahu‘a rahi to tatou o te haapao ra i te utuafare o te Atua, 22  e faafatata ana‘e ïa i te Atua ma to tatou aau atoa e faaroo puai, ua tamâhia hoi to tatou aau i te hoê mana‘o haava ino na roto i te pîpîraa i te toto, e ua horoihia to tatou tino i te pape mâ. 23  E tamau maite ana‘e i te faaite i te taata atoa i to tatou tiaturiraa ma te aueue ore, e nehenehe hoi tatou e tiaturi i tei fafau i taua mau parau ra. 24  E e mana‘o ana‘e te tahi i* te tahi, a turai atu ai te tahi i te tahi ia faaite i te here e ia rave i te mau ohipa maitai roa, 25  eiaha e faarue i ta tatou mau putuputuraa, mai ta vetahi i matau, ia faaitoito râ te tahi i te tahi, e ia rahi atu â a ite ai outou i taua mahana ra e fatata mai ra. 26  Ia rave hoi tatou i te hara ma te hinaaro mau e ua noaa ia tatou te ite papu i te parau mau, aita faahou ïa e tusia e toe ra no te mau hara, 27  te vai nei râ te tahi tiairaa riaria i te faautuaraa e i te riri mai te auahi te huru e pau roa ’i te feia patoi. 28  Te taata o tei haafaufaa ore i te ture a Mose, e haapohehia ïa ma te ore oia e arohahia na nia i te parau a toopiti aore ra tootoru ite. 29  Eaha râ ïa te rahi o te utua i to outou mana‘o e au i te taata tei taataahi i te Tamaiti a te Atua, tei ore i haafaufaa roa i te toto o te faufaa i mo‘a ’i oia, e tei faaino ma te vahavaha i te varua o te Atua tei faaite mai i to ’na hamani maitai rahi? 30  Ua ite hoi tatou i te Atua tei parau: “Na ’u te tahoo. Na ’u e faautua.” Oia atoa: “E haava Iehova* i to ’na nunaa.” 31  Mea riaria ia topa i roto i te rima o te Atua ora. 32  Tera râ, a haamana‘o noa i to mutaa iho mau mahana, i muri a‘e i to outou haamaramaramaraahia, ua faaruru outou i te hoê aroraa rahi i roto i te mauiui e rave rahi. 33  I te tahi taime, ua faarirohia outou ei mataitairaa na te taata,* a faaû atu ai i te faainoraa e te ati e rave rahi, e i te tahi atu taime, ua tauturu* outou i te feia o te faaruru ra i te reira. 34  Ua faaite hoi outou i te aumihi no te mau taeae i roto i te tapearaa, e ua farii outou ma te oaoa ia haruhia ta outou mau faufaa, ua ite hoi outou e e faufaa maitai a‘e ta outou o te vai noa mai. 35  No reira, eiaha e faaea i te paraparau ma te mǎta‘u ore, e haamaitairaa rahi hoi te noaa mai. 36  Mea titauhia hoi ia faaoromai tamau outou, ua oti ana‘e ia outou te rave i te hinaaro o te Atua, e noaa ïa ia outou ta ’na i fafau. 37  E “taime poto roa” â te toe ra, e “e tae mai o te haere mai nei e e ore oia e maoro.” 38  “E ora râ to ’u taata parau-tia i to ’na faaroo,” e “ia otohe oia, eita vau* e mauruuru ia ’na.” 39  E teie nei, e ere tatou i te feia o te otohe a haamouhia ’tu ai, i te feia râ e faaroo to tatou a ora ’tu ai.*

Nota i raro i te api

Nehenehe atoa e hurihia “te mau tane.”
“I roto i te otaro o te buka” na roto i te reo Heleni.
A hi‘o i te titionare.
Aore ra “ma te tiaturi.”
Oia hoi te vahi Mo‘a Roa.
“Avari” na roto i te reo Heleni.
Aore ra “e haapeapea ana‘e no te tahi e,” “e tâu‘a ana‘e te tahi i.”
A hi‘o i te titionare.
“Ua tuuhia outou i mua i te taata i nia i te tahua teata” na roto i te reo Heleni.
Aore ra “turu.”
Heleni pusuke. A hi‘o i te titionare.
Heleni pusuke. A hi‘o i te titionare.