Eaha to roto?

Mau faaho'iraa ê

Tapura tumu parau

Ite no Iehova

Tahiti

Bibilia i nia i te reni | HURIRAA O TE AO APÎ O TE MAU PAPAI HELENI KERISETIANO

Hebera 1:1-14

HAAPOTORAA O TE MAU TUMU PARAU

  • Paraparau mai te Atua na roto i ta ’na Tamaiti (1-4)

  • Hau ê roa te Tamaiti i te mau melahi (5-14)

1  I mutaa iho, i paraparau na te Atua i to tatou mau tupuna na roto i te mau peropheta e rave rahi taime e na roto i te ravea rau.  E teie nei, ua hope taua mau mahana ra, ua paraparau oia ia tatou na roto i ta ’na Tamaiti ta ’na i faafatu i te mau mea atoa, e na roto ia ’na i hamani ai oia i te mau faanahoraa o te ao nei.*  O ’na te anaana o to te Atua hanahana e te hoho‘a o to te Atua huru mau, e maoti ta ’na parau mana e vai noa ’i te mau mea atoa. E i muri a‘e i to ’na tamâraa ia tatou i ta tatou mau hara, parahi ihora oia i te rima atau o te Atua teitei i te ra‘i.  Ua hau a‘e ïa o ’na i te mau melahi, i te mea e ua noaa ia ’na te hoê i‘oa maitai roa ’‘e i to ratou.  O vai atu â te melahi ta te Atua i parau: “O oe ta ’u tamaiti. I teie mahana ua riro vau ei metua no oe”? Oia atoa: “E riro vau ei metua no ’na e e riro oia ei tamaiti na ’u”?  Ia tono faahou mai râ oia i ta ’na Tamaiti matahiapo i te ao nei,* e parau oia: “Ia tahopu te mau melahi atoa a te Atua ia ’na.”  Teie atoa ta ’na e parau no nia i te mau melahi: “E faariro oia i ta ’na mau melahi ei varua, e ta ’na mau tavini ei auahi ura.”  No nia râ i te Tamaiti, e parau oia: “O te Atua to oe terono e a muri noa ’tu, e te sepeta o ta oe Faatereraa arii,* o te sepeta ïa o te parau-tia.  Mea au roa na oe te parau-tia, e mea au ore roa na oe te ohipa ino. No reira ïa te Atua, to Atua, i faatahinu ai ia oe i te oaoa hau a‘e i to mau hoa.” 10  Oia atoa: “E te Fatu, i te haamataraa, ua haamau oe i te niu o te fenua, e te ra‘i ra, o te ohipa ïa a to rima. 11  E mou te reira, area oe e vai noa ïa. E marau ana‘e te reira mai te hoê ahu, 12  e e potaro oe i te reira mai te hoê ahu roa mahanahana, e mai te hoê ahu, e tauihia te reira. Aita roa râ oe i taui a‘e, e to oe ra mau matahiti eita roa ïa e hope.” 13  O vai atu â hoi te melahi ta ’na i parau: “A parahi i to ’u rima atau nei e ia faariro roa vau i to oe mau enemi ei taahiraa avae no oe”? 14  E ere anei ratou paatoa i te varua no te hoê taviniraa mo‘a, tei tonohia ’tu no te tavini i te feia e faaorahia?

Nota i raro i te api

Aore ra “te mau tau.” A hi‘o i te titionare.
“Te fenua parahihia e te taata” na roto i te reo Heleni.
Aore ra “to oe Basileia.”