Eaha to roto?

Mau faaho'iraa ê

Tapura tumu parau

Ite no Iehova

Tahiti

Bibilia i nia i te reni | HURIRAA O TE AO APÎ O TE MAU PAPAI HELENI KERISETIANO

Galatia 5:1-26

HAAPOTORAA O TE MAU TUMU PARAU

  • Tiamâraa Kerisetiano (1-15)

  • Pee i te aratairaa a te varua mo‘a (16-26)

    • Ta te tino hara e faatupu (19-21)

    • Ta te varua mo‘a e faatupu (22, 23)

5  No taua tiamâraa ra i faatiamâ ’i te Mesia ia outou. A mau maite ïa, e eiaha faahou outou e faatîtîhia i raro a‘e i te hoê zugo.  Inaha, te parau atu nei au, o Paulo, e ia peritomehia outou e faufaa ore ïa ta te Mesia i rave.  E te parau faahou nei au i te taata peritomehia ia haapao i te taatoaraa o te ture a Mose e tia ’i.  Ua taa ê outou i te Mesia, outou hoi e titau ra e riro ei taata parau-tia maoti te ture. Ua haapae outou i to ’na hamani maitai rahi.  Area matou, te tiai nei ïa i te riro ei taata parau-tia i te aro o te Atua, o te tupu noa na roto i te varua mo‘a e to tatou faaroo.  Te mea faufaa no te feia tei hoê e te Mesia ra o Iesu, o te faaroo ïa e faaitehia ra na roto i te here, eiaha râ te peritomeraa e te peritome-ore-raa.  I horo maitai na hoi outou. Na vai ïa i haafifi ia outou a ore atu ai e haapao faahou i te parau mau?  E ere tera huru haapiiraa no ǒ mai i te Atua o tei titau manihini ia outou.  E maraa te taatoaraa o te faraoa ôihia i te hopue rii noa. 10  Ua papu ia ’u e outou tei hoê e te Fatu ra, hoê â ïa mana‘o to outou e to ’u. E noaa râ i te taata e haapeapea ra ia outou te faautuaraa e au ia ’na, o vai noa ’tu oia. 11  Taeae ma, ahiri e te poro noa ra vau i te peritomeraa, no te aha ïa vau e hamani-ino-noa-hia ’i? I roto i tera huru tupuraa, ua faaorehia ïa te ofai turoriraa, oia hoi te pou haamauiuiraa.* 12  Te hinaaro nei au i te feia e faahepo ra ia peritomehia outou ia rave hau atu â i nia ia ratou iho.* 13  Taeae ma, ua titau-manihini-hia outou no te tiamâraa. Eiaha râ no teie tiamâraa e tapi ai outou i te mau hinaaro o te tino. Ia tavini râ te tahi i te tahi ma te here. 14  Ua hope roa* hoi te ture a Mose i roto i teie noa faaueraa: “Ia here oe i to oe taata tupu mai ia oe iho.” 15  Ia haamauiui noa râ outou ia outou iho e ia tatama‘i outou, a ara, a mou outou ia outou iho. 16  A pee noa i te aratairaa a te varua mo‘a, o ta ’u ïa parau ia outou, e e ore roa outou e rave i te mau hinaaro tia ore o te tino. 17  No to ’na mau hinaaro tia ore hoi e patoi ai te tino i te varua mo‘a, e te varua mo‘a ra i te mau hinaaro tia ore o te tino. Aore hoi e tuatiraa i rotopu i te tino e te varua mo‘a. E te mau mea maitatai ta outou e hinaaro e rave, aita ïa outou e rave ra. 18  I te mea e te arataihia ra outou e te varua mo‘a, aita ïa outou i raro a‘e i te ture. 19  E ite-maitai-hia ta te tino hara e faatupu, oia ïa te mau peu taotoraa tia ore,* te peu viivii, te peu faufau,* 20  te haamori idolo, te peu tahutahu,* te enemiraa, te mârô, te pohehae, te iria, te tatama‘i, te amahamaha, te pǔpǔ faaroo amaha, 21  te feii, te taero ava, te arearearaa ahoahoa e te tahi atu mau mea mai tera atoa te huru. Mai ta ’u i faaara noa na ia outou, te faaara faahou atu nei au e e ore roa te feia o te rave noa i teie mau peu e fatu i te Faatereraa arii a te Atua.* 22  Area te mau huru maitatai* ta te varua mo‘a e faatupu, o te here ïa, te oaoa, te hau, te faaoromai, te hamani maitai, te maitai, te faaroo, 23  te mǎrû, te haavîraa ia ’na iho. Aita e ture o te faahapa i te reira. 24  E te feia tei hoê e te Mesia ra o Iesu, ua patiti ïa i te mau hinaaro tia ore e te vî ore o te tino i nia i te pou. 25  Te ora nei tatou ia au i te varua o te Atua, e pee maite noa ana‘e i te aratairaa a taua varua ra. 26  Eiaha tatou e faateitei noa, e tata‘u e e feii te tahi i te tahi.

Nota i raro i te api

A hi‘o i te titionare.
Aore ra “ia patehe ia ratou iho,” “ia riro ei eunuka,” a ore atu ai ratou e nehenehe e haapao roa i te ture ta ratou e turu ra.
Nehenehe atoa e hurihia “haapotohia.”
A hi‘o i te titionare.
Aore ra “te haerea haama ore.” A hi‘o i te titionare.
Aore ra “te ohipa mana no ǒ mai i te mau varua iino,” “te raveraa i te raau taero.”
Aore ra “Basileia o te Atua.”
“Te hotu” na roto i te reo Heleni.