Eaha to roto?

Mau faaho'iraa ê

Tapura tumu parau

Ite no Iehova

Tahiti

Bibilia i nia i te reni | HURIRAA O TE AO APÎ O TE MAU PAPAI HELENI KERISETIANO

Galatia 4:1-31

HAAPOTORAA O TE MAU TUMU PARAU

  • E ere faahou i te tîtî, e tamaiti râ (1-7)

  • Haapeapearaa Paulo no to Galatia (8-20)

  • Hagara e Sara: e piti faufaa (21-31)

    • Mea tiamâ Ierusalema no nia mai, to tatou metua vahine (26)

4  E teie nei, te parau atu nei au e a vai tamarii rii noa ’i te taata e fatu i te faufaa, aita oia i taa ê i te hoê tîtî, noa ’tu e na ’na e fatu i te mau mea atoa,  tei raro a‘e noa â oia i te tiaau e te tiai e tae roa ’tu i te mahana faataahia e to ’na metua tane.  Oia atoa, i faatîtîhia na tatou e te mau mea rii a teie nei ao i to tatou vai tamarii-rii-raa.  I te hoperaa râ te taime faataahia, tono maira te Atua i ta ’na Tamaiti tei fanauhia mai e te hoê vahine e tei ora i raro a‘e i te ture,  ia nehenehe oia ia faatiamâ i te feia i raro a‘e i te ture ma te hoo mai ia ratou, e ia farii te Atua ia tatou ei tamaiti na ’na.  E teie nei, no te mea e tamaiti outou na te Atua, ua tuu oia i te varua mo‘a i vai na i ta ’na Tamaiti i roto i to tatou aau, e te turai nei taua varua ra ia tatou ia pii atu: “Aba,* to ’u Metua!”  E ere faahou ïa oe i te tîtî, e tamaiti râ. E tamaiti ra, e fatu ïa oe i te faufaa maoti te Atua.  Area râ i te tau aita ’i outou i ite i te Atua, e tîtî ïa outou na te mau atua hape.  I teie nei râ ua ite outou i te Atua, aore ra i to ’na tanoraa mau ua itehia mai outou e te Atua, eaha ïa outou e ho‘i faahou ai i te mau mea rii faufaa ore a teie nei ao e e hinaaro faahou ai e riro ei tîtî na ratou? 10  Te haapao roa ra outou i te mahana e te ava‘e e te tau e te matahiti. 11  Te taiâ nei au e peneia‘e ua mâu‘a ta ’u mau tutavaraa no outou. 12  Taeae ma, te taparu atu nei au, a riro mai ia ’u. No te mea na mua ’‘e, mai ia outou atoa na vau. Aita roa ’tu outou i hamani ino ia ’u. 13  Ua ite râ outou e no to ’u ma‘iraahia i nehenehe ai au e faaite ia outou i te parau apî oaoa no te taime matamua. 14  E noa ’tu e ua huru ê outou i to ’u ma‘i, aita râ outou i vahavaha mai ia ’u e i haafaufau* mai. Tera râ, ua farii outou ia ’u mai te hoê melahi a te Atua ra te huru aore ra mai te Mesia ra o Iesu. 15  I oaoa na outou, eaha ’tura ïa i teie nei? Papu roa ia ’u e, ahiri i tia ia outou, ua paaro roa mai outou i to outou iho na mata a horoa mai ai no ’u. 16  Ua riro anei ïa vau ei enemi no outou no to ’u faaiteraa ’tu i te parau mau? 17  E itoito rahi to ratou i te ume mai ia outou, e ere râ ma te mana‘o maitai. Te titau ra ratou ia mutu to tatou auhoaraa, a hinaaro roa ’tu ai outou e pee ia ratou. 18  E mea maitai râ ia tâu‘a rahi te tahi ia outou ma te mana‘o maitai, eiaha noa ia parahi au i rotopu ia outou. 19  Ta ’u mau tamarii here, no outou hoi au e mauiui faahou ai i te mauiui fanau, e ia ite-roa-hia ’tu te huru o te Mesia i roto ia outou. 20  E hinaaro vau e parahi i pihai iho ia outou i teie nei â e e paraparau mǎrû atu, no te mea aita vau e taa faahou ra e nafea râ ia outou. 21  Outou hoi i raro a‘e i te ture, a parau mai na, aita anei outou i ite i ta te ture a Mose e parau ra? 22  Ei hi‘oraa, ua papaihia e e piti tamaiti ta Aberahama, hoê tamaiti na te tavini vahine, e te tahi atu na te vahine tiamâ. 23  Ua fanauhia râ te tamaiti a te tavini vahine ia au i te hinaaro o te taata,* area te tamaiti a te vahine tiamâ, ua fanauhia ïa ia au i te hoê parau fafau. 24  E auraa taipe to taua mau mea nei. Na vahine toopiti, e piti ïa faufaa, hoê i faaauhia i te mou‘a ra i Sinai, oia i fanau mai i te tamarii i raro a‘e i te faatîtîraa, oia hoi o Hagara. 25  E teie nei o Hagara, o Sinai ïa, te hoê mou‘a i Arabia, e e au oia ia Ierusalema i teie mahana, te vai tîtî nei hoi oia e ta ’na mau tamarii. 26  Tera râ, e vahine tiamâ te Ierusalema no nia mai, to tatou metua vahine. 27  Ua papaihia hoi: “A oaoa, e te vahine eita ta oe tamarii e noaa. A umere ma te oaoa, e te vahine aita i mauiui i te mauiui fanau. Mea rahi a‘e hoi te tamarii a te vahine i faaruehia i ta te vahine e tane faaipoipo ta ’na.” 28  Taeae ma, e teie nei, o outou te mau tamarii o te parau fafau, mai ia Isaaka atoa ra. 29  I tera ra tau, i hamani ino na te tamaiti tei fanauhia ia au i te hinaaro o te taata* i te tamaiti tei fanauhia na roto i te varua mo‘a. Mai tera atoa ïa i teie nei. 30  Tera râ, te nahea mai ra te mau Papai? “A tiahi i te tavini vahine e ta ’na tamaiti, eita hoi te tamaiti a te tavini vahine e fatu atoa i te faufaa e te tamaiti a te vahine tiamâ.” 31  Taeae ma, e tamarii ïa tatou na te vahine tiamâ, eiaha râ na te tavini vahine.

Nota i raro i te api

E ta‘o Arama teie, “Papa e!” te auraa.
Aore ra “tutuha.”
“Ia au i ta te tino” na roto i te reo Heleni.
“Ia au i ta te tino” na roto i te reo Heleni.