Eaha to roto?

Mau faaho'iraa ê

Tapura tumu parau

Ite no Iehova

Tahiti

Bibilia i nia i te reni | HURIRAA O TE AO APÎ O TE MAU PAPAI HELENI KERISETIANO

Galatia 3:1-29

HAAPOTORAA O TE MAU TUMU PARAU

  • Ohipa a te ture a Mose e te faaroo (1-14)

    • E ora te taata parau-tia i te faaroo (11)

  • Parau fafauhia ia Aberahama, e ere na roto i te ture a Mose (15-18)

    • O te Mesia to Aberahama huaai (16)

  • Te tumu e te fa o te ture a Mose (19-25)

  • Tamaiti na te Atua na roto i te faaroo (26-29)

    • No te Mesia to Aberahama huaai (29)

3  E to Galatia maamaa e! Na vai i haavarevare ia outou? Ua faataa-maitai-hia hoi ia outou to Iesu Mesia patitiraahia i nia i te pou.  Teie ta ’u e hinaaro e ui atu:* Ua fana‘o anei outou i te varua mo‘a no to outou haapaoraa i te ture aore ra no to outou tiaturiraa i ta outou i faaroo na?  Mai tera anei outou i te maamaa? Ua haamata outou i te hororaa ia au i ta te varua mo‘a,* e faahope anei ïa outou i te hororaa ia au i ta te tino?*  Ua faaruru anei outou e rave rahi mauiui aita e tumu? Ua papu ia ’u e aita.  Te taata hoi o te horoa ia outou i te varua mo‘a e o te rave i te mau ohipa mana i rotopu ia outou, e na reira anei oia no to outou haapaoraa i te ture aore ra no to outou tiaturiraa i ta outou i faaroo na?  E ere anei e “ua faatupu Aberahama i te faaroo ia Iehova* e ua faarirohia oia ei taata parau-tia”?  Ua ite maitai hoi outou e o te feia e mau maite ra i te faaroo, o ratou te mau tamaiti a Aberahama.  E teie nei, mea maoro to te mau Papai faaiteraa e e faariro te Atua i te taata o te mau nunaa ěê ei taata parau-tia na roto i te faaroo, e ua faaite-atea-hia ’tu ia Aberahama i te parau apî oaoa, oia hoi: “Na roto ia oe e haamaitaihia ’i te mau nunaa atoa.”  No reira, e haamaitaihia te feia atoa e mau maite ra i te faaroo mai ia Aberahama i faatupu i te faaroo. 10  Te feia atoa e tiaturi ra i te ohipa a te ture, e vai noa ïa te ino i nia ia ratou, ua papaihia hoi: “Ia vai noa te ino i nia i te taata atoa aita e haapao maite ra i te mau parau atoa i papaihia i roto i te otaro o te ture a Mose.” 11  E mea papu e aita e taata e faarirohia ei taata parau-tia i te aro o te Atua na roto i te ture, no te mea “e ora te taata parau-tia i to ’na faaroo.” 12  E teie nei, aita te ture a Mose i niuhia i nia i te faaroo. Tera râ, “te taata atoa e rave i taua mau mea ra, e ora ïa i te reira.” 13  Ua papai-atoa-hia: “Ia vai noa te ino i nia i te taata atoa tei rîhia i nia i te raau.” Ua faaora mai te Mesia ia tatou i te faaino a te ture a Mose e ua amo i te ino i vai na i nia ia tatou. Mea na reira ïa to ’na hooraa mai ia tatou, 14  ia fana‘o hoi to te mau nunaa ěê i te haamaitairaa i fafauhia ia Aberahama na roto i te Mesia ra o Iesu, e ia noaa ia tatou te varua mo‘a i fafauhia na roto i to tatou faaroo. 15  Taeae ma, teie te tahi faahoho‘araa: Ia oti te hoê parau faaau i te haamanahia, noa ’tu e na te hoê noa taata, eita roa e tia ia faaorehia aore ra ia tuuhia te tahi parau ê atu. 16  E teie nei, ua fafauhia teie parau ia Aberahama e i to ’na huaai.* Aita i parauhia, “e i to oe mau huaai,”* mai te mea ra e e rave rahi. Ua parauhia râ, “e i to oe huaai,”* mai te mea ra e hoê noa, o te Mesia ïa. 17  Teie atoa ta ’u parau: Eita te ture a Mose, tei tuuhia mai e 430 matahiti i muri a‘e, e haafaufaa ore i te faufaa ta te Atua i faaau a‘ena ia Aberahama, a faaore atu ai i te parau fafau. 18  Ahiri hoi te haamaitairaa i niuhia i nia i te ture, aita faahou ïa i niuhia i nia i te hoê parau fafau, tera râ, ua horoa te Atua i te reira ia Aberahama na roto i te hoê parau fafau. 19  No te aha ïa te ture a Mose? Ua tuuhia mai ïa ia ite-maitai-hia te hara e ia tae roa mai te huaai* no ’na te parau i fafauhia. Ua horoahia mai ïa na roto i te mau melahi, e na roto i te hoê arai. 20  E teie nei, aita e arai mai te peu e hoê noa pae. Area râ te Atua, o ’na ana‘e ïa i to ’na fafauraa i teie parau. 21  E patoi anei ïa te ture a Mose i te mau parau fafau a te Atua? Eita roa ’tu! Ahiri hoi mea na roto i te hoê ture i tuuhia mai e noaa ’i te ora, e noaa ïa te parau-tia na roto i te ture. 22  Tera râ, te tapea noa ra te mau Papai i te mau mea atoa i raro a‘e i te mana o te hara, ia fana‘o hoi te feia e faatupu ra i te faaroo i te mau haamaitairaa i fafauhia, no to ratou faaroo ia Iesu Mesia. 23  Hou a‘e râ te faaroo* a tae mai ai, na te ture i tiai na ia tatou a tapea-noa-hia ’i tatou i raro a‘e i te mana o te ture, e a tiai noa ’i i te faaroo tei fatata i te faaitehia mai. 24  Ua riro ïa te ture a Mose no tatou ei tiai* e aratai i te Mesia, a faarirohia ’tu ai tatou ei taata parau-tia na roto i te faaroo. 25  I teie nei râ ua tae mai te faaroo, aita faahou ïa tatou i raro a‘e i te hoê tiai.* 26  E tamaiti ana‘e outou paatoa na te Atua na roto i to outou faaroo i te Mesia ra o Iesu. 27  Outou paatoa hoi tei bapetizohia e tei hoê e te Mesia, ua ahu mai ïa i te huru o te Mesia. 28  Aita e ati Iuda e aita e Heleni, aita e tîtî e aita e tiamâ, aita e tane e aita e vahine, ua hoê ana‘e hoi outou paatoa e te Mesia ra o Iesu. 29  E no te Mesia ra outou, o outou mau ïa te huaai* o Aberahama, e fatu outou ia au i te hoê parau i fafauhia.

Nota i raro i te api

“Ia faaite mai outou” na roto i te reo Heleni.
“Ua haamata outou ia au i ta te varua” na roto i te reo Heleni. Heleni peneuma. A hi‘o i te titionare.
“E faahope anei ïa outou ia au i ta te tino?” na roto i te reo Heleni.
A hi‘o i te titionare.
“Huero” na roto i te reo Heleni.
“To oe mau huero” na roto i te reo Heleni.
“Huero” na roto i te reo Heleni.
“Huero” na roto i te reo Heleni.
Oia hoi te faaroo Kerisetiano.
Aore ra “orometua.”
Aore ra “orometua.”
“Huero” na roto i te reo Heleni.