Eaha to roto?

Mau faaho'iraa ê

Tapura tumu parau

Ite no Iehova

Tahiti

Bibilia i nia i te reni | HURIRAA O TE AO APÎ O TE MAU PAPAI HELENI KERISETIANO

Galatia 2:1-21

HAAPOTORAA O TE MAU TUMU PARAU

  • Farereiraa Paulo i te mau aposetolo i Ierusalema (1-10)

  • A‘oraa Paulo ia Petero (Kepha) (11-14)

  • Faarirohia ei taata parau-tia na roto noa i te faaroo (15-21)

2  E i muri a‘e 14 matahiti, pauma faahou atura mâua Baranaba i Ierusalema a rave atoa mai ai ia Tito na muri ia ’u.  No te hoê heheuraa no te ra‘i mai i pauma ’i au i Ierusalema. Faaite atura vau i te mau taeae faatura-rahi-hia i te parau apî oaoa ta ’u e poro ra i te mau nunaa ěê. Ua ravehia te reira i mua ia ratou ana‘e ra, ia papu hoi ia ’u e e ere i te mea faufaa ore te hororaa ta ’u e horo nei aore ra ta ’u i horo na.  Tera râ, o Tito hoi tei na muri mai ia ’u, aita ïa i faahepohia ia peritomehia noa ’tu e e Heleni oia.  Ua tupu râ taua fifi ra no te mau faahua taeae tei tomo omo‘e mai e tei faaô noa mai no te moemoe i te tiamâraa ta tatou e fana‘o e te Mesia ra o Iesu, a nehenehe atu ai ratou e faatîtî roa ia matou.  Aita roa matou i fati a auraro atu ai ia ratou, noa ’tu e maa taime* noa, e ia vai â te parau mau o te parau apî oaoa ia outou ra.  No nia râ i taua mau taeae tei mana‘ohia e mea faufaa roa, i ta ’u râ hi‘oraa aita ïa ratou e taa ê ra i te tahi atu, noa ’tu to ratou tiaraa na mua ’‘e, eita hoi te Atua e haapao i te huru rapaeau o te hoê taata. No reira, aita vau i apî a‘e i tera mau taeae faatura-rahi-hia.  I to ratou râ iteraa e ua tuuhia mai ia ’u te pororaa i te parau apî oaoa i tei peritome-ore-hia, mai tei tuuhia ’tu ia Petero te pororaa i tei peritomehia  (na te Atua hoi tei haamana ia Petero ei aposetolo no tei peritomehia, i haamana atoa ia ’u ei aposetolo no to te mau nunaa ěê)  e i to ratou iteraa i te hamani maitai rahi tei noaa mai ia ’u, ua horoa mai Iakobo, Kepha* e Ioane, tei mana‘ohia e pou no te amuiraa, i te rima atau ia mâua Baranaba ei tapao no te auhoaraa,* e ia haere mâua i te feia o te mau nunaa ěê e tia ’i, area ratou i tei peritomehia ïa. 10  Ua ani noa mai ratou ia haamana‘o i te feia veve, o ta ’u ïa i tutava maite i te rave. 11  Tera râ, i to Kepha* haereraa mai i Anetiohia, ua patoi* tia ’tu vau ia ’na no te mea ua hapa mau oia.* 12  I tamaa noa na hoi oia e te feia o te mau nunaa ěê hou a tae mai ai te tahi mau taata ta Iakobo i tono. Ia ratou râ i tae mai, faataa ê ihora oia ia ’na i te feia o te mau nunaa ěê e aita ’tura i amuimui faahou ia ratou no to ’na mǎta‘u i te feia e turu ra i te peritomeraa. 13  Apiti atoa ’tura te tahi pae o te ati Iuda ia ’na i teie huru haavarevare to ’na, riro atoa ’tura Baranaba i ta ratou haavarevare. 14  I to ’u râ iteraa e aita ratou e pee maite ra i te parau mau o te parau apî oaoa, na ô atura vau ia Kepha* i mua ia ratou paatoa: “O oe hoi, noa ’tu e e ati Iuda, te ora ra oe mai to te mau nunaa ěê eiaha râ mai te ati Iuda ra, eaha ïa oe e faahepo ai i to te mau nunaa ěê ia ora ia au i te peu a te ati Iuda?” 15  Ua fanauhia tatou ei ati Iuda, e ere tatou i te feia rave hara no te mau nunaa ěê. 16  Ua ite tatou e e faarirohia te tahi taata ei taata parau-tia, eiaha na roto i to ’na haapaoraa i te ture, na roto noa râ i te faatupuraa i te faaroo ia Iesu Mesia. Ua tiaturi ïa tatou i te Mesia ra o Iesu a faarirohia ’tu ai tatou ei taata parau-tia na roto i te faaroo i te Mesia, eiaha râ na roto i te haapaoraa i te ture. Aita hoi e taata* e faarirohia ei taata parau-tia na roto i te haapaoraa i te ture. 17  E teie nei, noa ’tu e ua mana‘ohia e e feia rave hara tatou a imi noa ’i ia faarirohia ei taata parau-tia na roto i te Mesia, te auraa anei ïa e e tavini te Mesia na te hara? E ere roa ’tu! 18  Ahiri hoi au e patu faahou i te mau mea ta ’u i vavahi na, te faaite ra ïa vau e e ofati ture au. 19  Na roto hoi i to ’u haapaoraa i te ture i pohe ai au no te ture, ia nehenehe au e ora no te Atua. 20  Ua patitihia vau i nia i te pou mai te Mesia ra te huru. Aita vau e ora faahou nei no ’u iho, no te Mesia râ tei hoê e o vau. Oia, te ora nei au maoti to ’u faaroo i te Tamaiti a te Atua o tei here ia ’u e tei horoa ia ’na iho no ’u. 21  Aita vau e haafaufaa ore ra* i te hamani maitai rahi o te Atua, ahiri hoi tei te haapaoraa i te ture e noaa mai ai te parau-tia, e pohe faufaa ore ïa to te Mesia.

Nota i raro i te api

“No te hoê hora” na roto i te reo Heleni.
Pii-atoa-hia Petero.
Aore ra “ei hoa ohipa.”
Pii-atoa-hia Petero.
Aore ra “aro.”
Aore ra “ua au ia ’na te faahaparaa.”
Pii-atoa-hia Petero.
“I‘o” na roto i te reo Heleni.
Aore ra “Aita vau e tuu ra i te hiti.”