Eaha to roto?

Mau faaho'iraa ê

Tapura tumu parau

Ite no Iehova

Tahiti

Bibilia i nia i te reni | HURIRAA O TE AO APÎ O TE MAU PAPAI HELENI KERISETIANO

Galatia 1:1-24

HAAPOTORAA O TE MAU TUMU PARAU

  • Aroharaa (1-5)

  • Aita e parau apî oaoa ê atu (6-9)

  • Na te Atua te parau apî oaoa ta Paulo i poro (10-12)

  • To Paulo fariuraa i te Atua e haamataraa i te poro (13-24)

1  O Paulo, e aposetolo tei faatoroahia, eiaha e te taata, aore ra na roto i te hoê taata, na roto râ ia Iesu Mesia e te Atua to tatou Metua tei faatia ia ’na mai te pohe mai.  Te papai nei au e te mau taeae atoa ia ’u nei i te mau amuiraa i Galatia:  Ei ia outou te hamani maitai rahi e te hau no ǒ mai i te Atua ra to tatou Metua e i te Fatu ra o Iesu Mesia.  Ua pûpû te Mesia ia ’na iho no ta tatou mau hara no te faaora ia tatou i te faanahoraa ino nei o te ao nei,* ia au hoi i te hinaaro o to tatou Atua e Metua,  ei ia ’na ra hoi te hanahana e a muri noa ’tu. Amene.  Ua maere au e oioi roa outou i te fariu-ê-raa i te Atua o tei titau manihini ia outou na roto i te hamani maitai rahi o te Mesia, no te farii i te hoê poroi ê atu ei parau apî oaoa.*  Aita ’tu â râ parau apî oaoa ê atu. Tera râ, te haapeapea nei vetahi ia outou e te hinaaro ra ratou e taviri i te parau apî oaoa no nia i te Mesia.  Ia faaite noa ’tu râ hoê o matou aore ra te tahi melahi no te ra‘i mai i te hoê parau apî oaoa ê atu i ta matou i faaite ia outou, ia vai noa ïa te ino i nia ia ’na.  Mai ta matou i parau iho nei, te parau faahou atu nei au, o tei faaite ia outou i te hoê parau apî oaoa ê atu i ta outou i tiaturi na, ia vai noa ïa te ino i nia ia ’na, o vai noa ’tu oia. 10  To te taata farii maitai anei ta ’u e titau ra aore ra to te Atua? Te titau ra anei au ia auhia vau e te taata? Ahiri e au noa mai te taata ia ’u, e ere ïa vau i te tavini na te Mesia. 11  Taeae ma, te hinaaro nei hoi au ia ite outou e e ere no ǒ mai i te taata te parau apî oaoa ta ’u i faaite ia outou, 12  e ere atoa na te taata i horoa mai aore ra i haapii mai ia ’u i te reira, tera râ, na Iesu Mesia iho teie i heheu mai. 13  Ua faaroo iho â ïa outou i te huru o to ’u haerea na mua ’‘e i roto i te haapaoraa ati Iuda, i hamani ino e i vavahi noa na vau i te amuiraa a te Atua ma te u‘ana.* 14  I roto i te haapaoraa ati Iuda, to mua roa vau i te taata e rave rahi hoê â matahiti o to ’u iho nunaa, e e itoito hau ê to ’u no te mau peu tutuu a to ’u mau tupuna. 15  Te Atua râ, tei tatara ia ’u i te opu o to ’u metua vahine e tei titau manihini ia ’u na roto i to ’na hamani maitai rahi, ua mana‘o ïa e mea maitai 16  ia faaohipa ia ’u no te faaite haere i te parau apî oaoa no nia i ta ’na Tamaiti i te tahi atu mau nunaa, ia ite ratou o vai oia. I to ’na maitiraa ia ’u, aita vau i imi oioi i te aratairaa a te tahi atu taata.* 17  Aita atoa vau i pauma i Ierusalema i te mau aposetolo tei faatoroahia na mua ia ’u, ua haere râ vau i Arabia. E mai reira mai ua ho‘i au i Damaseko. 18  E toru matahiti i muri a‘e, pauma ’tura vau i Ierusalema e farerei ia Kepha,* faaea ihora vau ia ’na ra 15 mahana. 19  Aita râ vau i ite i te tahi atu mau aposetolo, o Iakobo ana‘e râ te taeae o te Fatu. 20  E teie nei, no nia i te mau parau ta ’u e papai nei ia outou, te haapapu atu nei au i te aro o te Atua e aita vau e haavare ra. 21  I muri a‘e, haere atura vau na te mau tuhaa fenua o Suria e o Kilikia. 22  Aita râ te mau amuiraa i Iudea tei hoê e te Mesia i ite mata a‘enei ia ’u. 23  I faarooroo noa na ratou: “Te taata tei hamani ino na ia tatou, o ’na hoi teie e faaite nei i te parau apî oaoa no nia i te faaroo ta ’na i tuino na.” 24  No ta ratou i ite no nia ia ’u i haamata ’i ratou i te faahanahana i te Atua.

Nota i raro i te api

Aore ra “te tau ino nei.” A hi‘o i te titionare.
Aore ra “evanelia.”
“Aita e faaauraa” na roto i te reo Heleni.
“Te i‘o e te toto” na roto i te reo Heleni.
Pii-atoa-hia Petero.