Eaha to roto?

Mau faaho'iraa ê

Tapura tumu parau

Ite no Iehova

Tahiti

Bibilia i nia i te reni | HURIRAA O TE AO APÎ O TE MAU PAPAI HELENI KERISETIANO

Ephesia 6:1-24

6  Outou te mau tamarii, a faaroo i to outou na metua mai tei au i te Fatu, e mea tia hoi te reira.  “A faatura i to metua tane e to metua vahine,” teie te faaueraa matamua i taaihia i te hoê parau fafau:  “Ia maitai noa oe* e ia ora maoro oe i nia i te fenua.”  Outou te mau metua tane, eiaha e faariri i ta outou mau tamarii, a tamau râ i te aupuru ia ratou i te a‘o e te faaararaa* a Iehova.*  Outou te mau tîtî, a auraro i to outou mau fatu i te fenua nei ma te mǎta‘u e te rûrû e ma te aau atoa, mai ta outou e auraro i te Mesia,  eiaha noa ia hi‘ohia mai outou e te taata* e ia au mai ratou ia outou, e auraro râ ma to outou aau e puai* atoa mai tei au i te mau tavini a te Mesia o te rave ra i te hinaaro o te Atua.  A tavini ma te aau tae, mai te mea ra e no Iehova,* eiaha râ no te taata,  ua ite hoi outou e e haamaitai Iehova* i te taata atoa, e tîtî anei aore ra e tiamâ, no te maitai atoa ta ’na e rave.  Outou atoa e te mau fatu, a na reira noa atoa ia ratou e eiaha ei parau haamǎta‘u, ua ite hoi outou e tei te ra‘i to ratou Fatu e to outou atoa, e e ore oia e maitiiti i te taata. 10  E i te hopea, a tapi e ia noaa ia outou te puai no ǒ mai i te Fatu e i te mana rahi o to ’na puai. 11  A ahu na i te haana tama‘i taatoa no ǒ mai i te Atua ia nehenehe outou ia mau papu i mua i te mau ravea paari* a te Diabolo. 12  E ere hoi te taata* ta tatou e aro* nei, te mau faatereraa râ, te mau tia mana, te mau arii o teie nei ao poiri e te mau varua ino i te ra‘i. 13  No reira, a rave mai i te haana tama‘i taatoa no ǒ mai i te Atua ia nehenehe outou ia faaruru i te mahana ino. E ua hope roa ana‘e teie mau mea atoa i te ravehia e outou, ia mau papu outou. 14  No reira, a mau papu ma te tauupu taamuhia i te hatua o te parau mau, ma te ahu mai i te tapo‘i ouma o te parau-tia, 15  ma te tiaa i to outou mau avae no te poro i te parau apî oaoa o te hau. 16  Hau atu â, a rave i te paruru rahi o te faaroo, e na reira ïa outou e tupohe ai i te mau te‘a* auahi atoa a te varua ino.* 17  A tuu atoa i te taupoo o te faaoraraa, e a mau i te ‘o‘e o te varua mo‘a, oia hoi te parau a te Atua, 18  e na roto i te pure e te taparuraa e rave rau, ia pure outou ma te tuutuu ore ia au i te varua mo‘a. No reira, a vai ara e a taparuparu noa no te feia mo‘a atoa. 19  A pure atoa no ’u, ia noaa ia ’u te aravihi ia parau atu ma te mǎta‘u ore, ia faaite hoi au i te parau huna mo‘a o te parau apî oaoa, 20  i riro ai hoi au ei tia no te Faatereraa arii* i taamuhia i te fifi auri, e ia paraparau vau ma te mǎta‘u ore mai tei tia ia ’u. 21  E teie nei, na Tuhiko, te hoê taeae herehia e te haapao maitai i roto i te taviniraa i te Fatu, e faaite maitai ia outou i to ’u nei parau e eaha to ’u huru. 22  No reira oia i tonohia ’tu ai e au, ia ite hoi outou eaha to matou huru e ia tamahanahana oia i to outou aau. 23  Ei te mau taeae te hau e te here e te faaroo atoa no ǒ mai i te Atua ra te Metua e i te Fatu ra o Iesu Mesia. 24  Ia vai â te hamani maitai rahi i te feia atoa e here ra ia Iesu Mesia to tatou Fatu i te here o te ore roa e mou.

Nota i raro i te api

Aore ra “Ia faufaahia oe.”
Aore ra “haapiiraa,” “aratairaa.” “Te tuuraa i roto i te feruriraa” na roto i te reo Heleni.
A hi‘o i te titionare.
“Eiaha noa i mua i te mata o te taata a tavini ai outou” na roto i te reo Heleni.
Heleni pusuke. A hi‘o i te titionare.
A hi‘o i te titionare.
A hi‘o i te titionare.
Aore ra “opuaraa.”
“Te toto e te i‘o” na roto i te reo Heleni.
“Taputô” na roto i te reo Heleni.
Aore ra “ihe.”
Aore ra “Satani.”
Aore ra “Basileia.”