Eaha to roto?

Mau faaho'iraa ê

Tapura tumu parau

Ite no Iehova

Tahiti

Bibilia i nia i te reni | HURIRAA O TE AO APÎ O TE MAU PAPAI HELENI KERISETIANO

Ephesia 5:1-33

HAAPOTORAA O TE MAU TUMU PARAU

  • Haerea e parau viivii ore (1-5)

  • Mai to te tamarii o te maramarama to outou haerea (6-14)

  • Ia î outou i te varua mo‘a (15-20)

    • Faaohipa maitai i to outou taime (16)

  • A‘oraa no te mau tane faaipoipo e vahine faaipoipo (21-33)

5  No reira, a pee i te haerea o te Atua mai te tamarii herehia.  E ei haerea here noa to outou, mai te Mesia atoa i here ia tatou* e i horoa ia ’na iho no tatou* mai te hoê tusia no‘ano‘a pûpûhia i te Atua.  Eiaha roa ’tu te mau peu taotoraa tia ore,* e te peu viivii e rave rau, e te nounou ia faahitihia i rotopu ia outou, mai tei au i te feia mo‘a.  Eiaha atoa to outou ei haerea haama, eiaha ei parau maamaa e ei parau hoata faufau, e mea au ore roa hoi. Tera râ, ei parau haamauruuru ta outou i te Atua.  Ua ite hoi outou, o ta outou atoa hoi i farii, e eita roa te taata o te rave i te mau peu taotoraa tia ore* aore ra i te peu viivii aore ra te taata nounou o te au i te haamori idolo, eita roa ïa e fatu i te Faatereraa arii a te Atua* ta te Mesia e faatere.  Eiaha ei taata e haavare ia outou i te parau rii faufaa ore, no taua mau mea ra hoi e roohia ’i te mau tamarii* faaroo ore i te riri o te Atua.  No reira, eiaha outou e apiti ia ratou.  Mai te poiri hoi outou na mua ’‘e, area i teie nei, mai te maramarama ïa outou, no te mea no te Fatu outou. Mai to te tamarii o te maramarama noa to outou haerea e tia ’i,  e ta te maramarama e faatupu,* o te mau mea maitatai huru rau ïa e te parau-tia e te parau mau. 10  A tamau i te imi i ta te Fatu e farii. 11  E eiaha faahou e apiti i te mau ohipa faufaa ore o te poiri. A faaite râ i to outou au ore i te reira. 12  E ta ratou hoi e rave huna ra, e mea haama ia faahiti noa ’tu. 13  E teie nei, e ite-maitai-hia te mau mea atoa e hohorahia i te maramarama,* e te mau mea atoa hoi e faaite-maitai-hia ra, o te riro ïa ei maramarama. 14  No reira, te na ôhia ra: “A ara mai, e teie taata taoto, a tia mai te pohe mai, e e turama te Mesia ia oe.” 15  A haapao maite i to outou haerea, e ia au hoi i to te feia feruriraa paari eiaha râ i to te maamaa, 16  ma te faaohipa maitai* i to outou taime, e tau ino mau hoi ta tatou e ora nei. 17  No reira, a faaea i te riro mai te maamaa ra, ia taa noa râ ia outou te hinaaro o Iehova.* 18  Eiaha atoa outou ia taero i te uaina a tupu atu ai te taiata,* tera râ, ia î noa outou i te varua mo‘a. 19  A faaitoito te tahi i te tahi* ma te salamo, te arueraa i te Atua, te himene haamoriraa e te himene navenave ia Iehova* ma to outou aau atoa, 20  e ma te haamauruuru noa i to tatou Atua e Metua no te mau mea atoa i te i‘oa o Iesu Mesia to tatou Fatu. 21  E auraro te tahi i te tahi ma te mǎta‘u i te Mesia. 22  Ia auraro te mau vahine faaipoipo i ta ratou iho tane mai ta ratou e auraro i te Fatu, 23  o te tane faaipoipo hoi te upoo o ta ’na vahine, mai te Mesia atoa, o te upoo ïa o te amuiraa e te faaora o taua tino ra. 24  Oia mau, mai ta te amuiraa e auraro i te Mesia, ia na reira atoa te mau vahine faaipoipo i te auraro noa i ta ratou iho tane e tia ’i. 25  Outou te mau tane faaipoipo, e here noa i ta outou iho vahine, mai te Mesia atoa i here i te amuiraa e i horoa i to ’na ora no te amuiraa, 26  no te haamo‘a ïa e no te tamâ i te amuiraa ma te horoi atu i te pape, oia hoi te parau a te Atua, 27  e ia tia te amuiraa i mua ia ’na ma te unauna, aita e tafetafeta aore ra e miomio e te tahi mea mai te reira te huru, ma te mo‘a râ e te hapa ore. 28  Ia na reira atoa te mau tane faaipoipo i te here i ta ratou iho vahine mai to ratou iho tino e tia ’i. Te tane hoi e here i ta ’na vahine, e here atoa ïa ia ’na iho, 29  aita hoi e taata i au ore roa a‘enei i to ’na iho tino,* e faatamaa râ e e aupuru oia i te reira, mai te Mesia atoa ra i te amuiraa, 30  no te mea e mero ana‘e tatou no to ’na tino. 31  “No reira te hoê tane e faarue ai i to ’na metua tane e to ’na metua vahine, a ati atu ai* i ta ’na vahine faaipoipo, e riro hoi raua ei hoê.” 32  E parau huna mo‘a faufaa mau â teie. E teie nei, te parau nei au no te Mesia e no te amuiraa. 33  Tera râ, ia here te tane faaipoipo tataitahi i rotopu ia outou i ta ’na vahine mai ta ’na e here ia ’na iho. Area te vahine faaipoipo ra, ia faatura maite ïa i ta ’na tane e tia ’i.

Nota i raro i te api

Nehenehe atoa e hurihia “outou.”
Nehenehe atoa e hurihia “outou.”
A hi‘o i te titionare.
A hi‘o i te titionare.
Aore ra “Basileia o te Atua”
“Tamaiti” na roto i te reo Heleni.
“E te hotu o te maramarama” na roto i te reo Heleni.
Aore ra “a‘ohia.”
Aore ra “ma te faaherehere maite.”
A hi‘o i te titionare.
Aore ra “te ohipa haapaoraa ore.”
Nehenehe atoa e hurihia “outou ia outou iho”
A hi‘o i te titionare.
“I‘o” na roto i te reo Heleni.
Aore ra “a faaea ’tu ai.”