Eaha to roto?

Mau faaho'iraa ê

Tapura tumu parau

Ite no Iehova

Tahiti

Bibilia i nia i te reni | HURIRAA O TE AO APÎ O TE MAU PAPAI HELENI KERISETIANO

Ephesia 3:1-21

HAAPOTORAA O TE MAU TUMU PARAU

  • No te feia o te mau nunaa ěê atoa te parau huna mo‘a (1-13)

    • E fatu atoa te feia o te mau nunaa ěê i ta te Mesia i fatu (6)

    • Opuaraa mure ore a te Atua (11)

  • Pure no to Ephesia ia noaa ia ratou te ite hohonu (14-21)

3  No reira o vau nei o Paulo tei mau i te fare tapearaa no te Mesia ra o Iesu e no to outou maitai te feia o te mau nunaa ěê . . .  Ua faaroo iho â outou e ua horoahia mai ia ’u te hopoia e tauturu ia outou ia fana‘o i te hamani maitai rahi o te Atua,  e e mea na roto i te hoê heheuraa i faaitehia mai ai te parau huna mo‘a ia ’u, mai ta ’u i papai poto atu ia outou.  E ia taio outou i te reira e taa ia outou to ’u maramarama i te parau huna mo‘a o te Mesia.  I te mau u‘i i mahemo, aita teie parau huna i faaitehia i te mau tamaiti a te taata, mai tei faaitehia mai i teie nei e te varua mo‘a i ta ’na mau aposetolo mo‘a e i te mau peropheta,  oia hoi e fatu atoa te feia o te mau nunaa ěê, tei hoê e te Mesia ra o Iesu na roto i te parau apî oaoa, i ta te Mesia i fatu, e e riro atoa ratou ei mero no te hoê â tino e e apiti ratou mai ia matou i te parau fafau a te Atua.  Ua riro vau ei tavini na teie parau huna mo‘a ia au i te ô o te hamani maitai rahi o te Atua tei horoa-noa-hia mai ia ’u na roto i te ohiparaa mai o to ’na puai.  Ua horoahia mai teie hamani maitai rahi ia ’u nei tei iti roa i te feia mo‘a atoa, e ia faaite au i te parau apî oaoa i te mau nunaa ěê no nia i te mau haamaitairaa faito ore a te Mesia  e ia ite te taata atoa i te tereraa ohipa o te parau huna mo‘a tei hunahia mai te matamua mai â i roto i te Atua, o tei poiete i te mau mea atoa, 10  ia nehenehe te mau faatereraa e te huimana i te ra‘i ia ite i teie nei, na roto i te amuiraa, i te rauraa o te paari o te Atua. 11  Ua au te reira i te opuaraa mure ore ta ’na i mana‘o atea no nia i te Mesia ra o Iesu to tatou Fatu, 12  na roto hoi i to tatou faaroo i te Mesia e parau roa ’i e e faafatata ’i tatou i te Atua ra ma te tiaturi. 13  No reira, te ani atu nei au eiaha outou ia toaruaru, no to outou hoi maitai i faaruru ai au i te ati, ia aruehia hoi outou. 14  . . . No reira, te tuturi nei au i mua i te Metua, 15  na ’na i mairi i te i‘oa o te mau fetii atoa, to te ra‘i e to te fenua. 16  Te pure nei au e, na roto i te rahi o to ’na hanahana, ia faaitoito oia ia outou i te taata o roto ra i te puai o to ’na varua, 17  e na roto i to outou faaroo, ia parahi te Mesia i roto i to outou aau ma te here. Ia a‘ahia outou e ia mau papu i nia i te niu, 18  ia taa maite ia outou e te feia mo‘a atoa te aano e te roa e te teitei e te hohonu, 19  e ia ite i te here o te Mesia, tei hau ê i te ite, e ia noaa ia outou te mau huru maitatai atoa no ǒ mai i te Atua ra. 20  E teie nei, ei te Atua ra o te nehenehe e faatupu hau ê roa ’tu i ta tatou e ani aore ra e mana‘o ia au i to ’na puai o te ohipa ra i roto ia tatou, 21  ei ia ’na te hanahana na roto i te amuiraa e na roto i te Mesia ra o Iesu i tera e tera u‘i e a muri noa ’tu. Amene.

Nota i raro i te api