Eaha to roto?

Mau faaho'iraa ê

Tapura tumu parau

Ite no Iehova

Tahiti

Bibilia i nia i te reni | HURIRAA O TE AO APÎ O TE MAU PAPAI HELENI KERISETIANO

Ephesia 2:1-22

HAAPOTORAA O TE MAU TUMU PARAU

  • Faaorahia ia hoê e te Mesia (1-10)

  • Vavahihia te patu faataa-ê-raa (11-22)

2  Hau atu â, ua faaora mai te Atua ia outou, pohe noa â outou i ta outou mau hapa e hara,  i au na hoi to outou haerea i teie faanahoraa o teie nei ao* e i te raatira o te reva e mana ra i nia i te taata, e o taua reva ra aore ra huru feruriraa* te ohipa nei i roto i te mau tamaiti faaroo ore.  Oia mau, i ora na tatou paatoa i rotopu ia ratou ia au i te mau hinaaro o to tatou tino, i te raveraa i te hinaaro o te tino e o to tatou mau mana‘o. E mai te tahi pae atoa ra, i au na ia tatou te riri o te Atua mai to tatou fanauraahia mai.  Tera râ, e Atua aroha hamani maitai rahi oia, e no to ’na here rahi ia tatou  ua faaora oia ia tatou ia hoê tatou e te Mesia, pohe noa ’i tatou i ta tatou mau hapa, e i te hamani maitai rahi i faaorahia ’i outou.  E ua faatia mai oia ia tatou e ua horoa mai i te hoê parahiraa i te ra‘i no te mea ua hoê tatou e te Mesia ra o Iesu,  e i roto i te mau faanahoraa o te ao nei no a muri a‘e,* ia faaite oia i te rahi hau ê o to ’na hamani maitai e to ’na anaanatae* ia tatou tei hoê e te Mesia ra o Iesu.  I taua hamani maitai rahi ra i faaorahia ’i outou na roto i te faaroo, e ere hoi no ta outou i rave, e ô râ te reira na te Atua.  E ere iho â no te ohipa ta outou i rave i faaorahia ’i outou, no reira aita ’tura e tumu to te taata ia teoteo. 10  E ohipa tatou na te rima o te Atua,* e na roto i to tatou hoêraa e te Mesia ra o Iesu ua poietehia tatou no te rave i te mau mea maitatai ta te Atua i faanaho atea ia haapao tatou. 11  No reira e te feia o te mau nunaa ěê i ta te tino, e haamana‘o na e i piihia na outou e feia “peritome-ore-hia” e te feia i “peritomehia” te tino i te rima taata nei. 12  I tera ra tau aita outou i ite i te Mesia, e taata ěê outou i te nunaa Iseraela, e aita ta outou e tuhaa i te mau faufaa o te parau fafau. E aita na to outou e tiaturiraa e aita atoa e Atua i roto i teie nei ao. 13  I te atea ê outou i mutaa ihora, i teie nei râ ua hoê outou e te Mesia ra o Iesu, ua faafatata ïa outou i te Atua na roto i te toto o te Mesia. 14  Na te Mesia hoi i hopoi mai i te hau, na ’na i tahoê i na pǔpǔ e piti e i vavahi i te patu i faataa ê i teie na pǔpǔ. 15  Na roto i to ’na tino i faaore ai oia i te tumu o te enemiraa, oia hoi te ture a Mose e ta ’na mau faaueraa, e ia riro na pǔpǔ e piti ei nunaa* apî hoê na roto ia ’na e no te faatupu i te hau, 16  e no te faahau roa i na pǔpǔ e piti i te Atua ra i roto i te hoê â nunaa* maoti te pou haamauiuiraa,* no te mea ua faaore oia i te tumu o te enemiraa maoti to ’na tino. 17  E ua haere mai oia e ua faaite i te parau apî oaoa o te hau ia outou tei atea ê i te Atua e oia atoa i te feia tei fatata i te Atua, 18  no te mea na roto ia ’na i nehenehe ai tatou, na pǔpǔ e piti, e faafatata ’tu i te Metua maoti te varua mo‘a. 19  I teie nei, e ere faahou ïa outou i te taata ěê, hoê â râ oire to outou e to te feia mo‘a e e mero outou no te utuafare o te Atua, 20  e ua patuhia outou i nia i te niu o te mau aposetolo e te mau peropheta. Area te Mesia ra o Iesu, o te ofai tihi* faufaa roa ïa. 21  Na roto ia ’na e faatuatiati-maitai-hia ’i te mau tuhaa atoa o te paturaa ia riro roa mai ei hiero mo‘a no Iehova.* 22  E na roto ia ’na, te patuhia ra outou ei vahi e parahi ai te Atua maoti to ’na varua mo‘a.

Nota i raro i te api

Aore ra “te haerea o teie nei ao.”
Heleni peneuma. A hi‘o i te titionare.
Aore ra “e i te mau tau no a muri a‘e.” A hi‘o i te titionare.
Aore ra “farii maitai.”
Aore ra “E ohipa hamanihia tatou e te Atua.”
“Taata” na roto i te reo Heleni.
“Tino” na roto i te reo Heleni.
A hi‘o i te titionare.
E tuuhia teie ofai i te poro fare i te vahi e tuati ai e piti patu.
A hi‘o i te titionare.