Eaha to roto?

Mau faaho'iraa ê

Tapura tumu parau

Ite no Iehova

Tahiti

Bibilia i nia i te reni | HURIRAA O TE AO APÎ O TE MAU PAPAI HELENI KERISETIANO

Apokalupo 8:1-13

HAAPOTORAA O TE MAU TUMU PARAU

  • Ofatihia te hitu o te tapao (1-6)

  • Faaotoraa i na pu matamua e maha (7-12)

  • E toru ati faaitehia (13)

8  I to te Arenio* ofatiraa i te hitu o te tapao taati, mamû a‘era to te ra‘i afa hora.  E ite atura vau i na melahi e hitu e tia noa ra i mua i te Atua e e hitu pu tei horoahia na ratou.  Tae maira te tahi atu melahi e tia noa ihora i pihai iho i te fata, e farii auro mea no‘ano‘a* ta ’na. Horoahia maira ia ’na e rave rahi mea no‘ano‘a no te pûpû i nia i te fata auro e vai ra i mua i te terono, a pûpû ai te feia mo‘a atoa i ta ratou mau pure.  Pee a‘era te au auahi o te mea no‘ano‘a mai roto atu i te rima o te melahi, e te mau pure a te feia mo‘a i mua i te Atua.  Rave ihora râ te melahi i te farii mea no‘ano‘a, faaî ihora i taua farii ra maa auahi no nia mai i te fata, e taora ’tura i taua auahi ra i nia i te fenua. Haruru maira te patiri e te reo atoa e anapa maira te uira e aueue ihora te fenua.  Faaineine a‘era na melahi e hitu i te faaoto i ta ratou na pu e hitu.  Faaoto ihora te melahi matamua i ta ’na pu. Mairi maira te ûa paari e te auahi, anoihia i te toto, i nia i te fenua. Paapaa roa a‘era te toru o te tuhaa o te fenua e te toru o te tuhaa o te mau tumu raau e pauroa te aihere.  Faaoto ihora te piti o te melahi i ta ’na pu. Taorahia maira te tahi mea e au i te hoê mou‘a rahi e ura ra i te auahi i roto i te miti. Riro atura te toru o te tuhaa o te miti ei toto,  e pohe a‘era te toru o te tuhaa o te mau animara* i roto i te miti, e tuino–roa-hia ’tura te toru o te tuhaa o te mau pahi. 10  Faaoto ihora te toru o te melahi i ta ’na pu. Mairi maira te hoê fetia rahi anaana mai te mori mai te ra‘i mai i nia i te toru o te tuhaa o te mau anavai e i nia i te mau pape pihaa. 11  O Apesineto* te i‘oa o taua fetia ra. Toavaava ihora te toru o te tuhaa o te mau pape e mea rahi te taata tei pohe i taua mau pape ra, no te mea ua toavaavahia. 12  Faaoto ihora te maha o te melahi i ta ’na pu. Tairihia a‘era te toru o te tuhaa o te mahana e te toru o te tuhaa o te ava‘e e te toru o te tuhaa o te mau fetia, ia poiri hoi te toru o te tuhaa o te reira, e ia ore te toru o te tuhaa o te ao e maramarama mai, e to te po atoa. 13  E ite e faaroo atura vau i te hoê aeto e rere ra na te reva i te parauraa ma te reo puai: “Ua ati, ua ati, ua ati te feia e parahi ra i te fenua no te faaotoraa pu a na melahi e toru e toe ra tei fatata i te faaoto i ta ratou pu!”

Nota i raro i te api

Aore ra “Fanau‘a mamoe.”
Aore ra “farii auro no te tutui i te mea no‘ano‘a.”
Heleni pusuke. A hi‘o i te titionare.
Mea toavaava e te taero teie raau tupu.