Eaha to roto?

Mau faaho'iraa ê

Tapura tumu parau

Ite no Iehova

Tahiti

Bibilia i nia i te reni | HURIRAA O TE AO APÎ O TE MAU PAPAI HELENI KERISETIANO

Apokalupo 7:1-17

HAAPOTORAA O TE MAU TUMU PARAU

  • Maha melahi e tapea ra i na mata‘i o te haamouraa (1-3)

  • Na 144 000 i tapaohia (4-8)

  • E nahoa rahi ma te ahu roa uouo (9-17)

7  I muri iho, ite atura vau e maha melahi e tia noa ra i na poro e maha o te fenua, a tapea noa ’i i na mata‘i e maha o te fenua, ia ore te mata‘i e farara i nia i te fenua e i nia i te miti e i nia i te mau tumu raau atoa.  E ite atura vau i te tahi atu melahi e haere mai ra na te hitiraa mai o te mahana,* tei ia ’na ra te tapao a te Atua ora. Tuô ihora oia i na melahi e maha tei faatiahia ia rave ino i te fenua e te miti a na ô ai:  “Eiaha e rave ino i te fenua, eiaha atoa te miti e eiaha atoa te mau tumu raau e ia oti roa i te tapaohia e matou te rae o te mau tavini a to tatou Atua.”  E faaroo atura vau i te numera o te feia i tapaohia, 144 000 no te mau opu atoa o te mau tamaiti a Iseraela:  No te opu o Iuda 12 000 tei tapaohia, no te opu o Reubena 12 000, no te opu o Gada 12 000,  no te opu o Asera 12 000, no te opu o Naphatali 12 000, no te opu o Manase 12 000,  no te opu o Simeona 12 000, no te opu o Levi 12 000, no te opu o Isakara 12 000,  no te opu o Zebuluna 12 000, no te opu o Iosepha 12 000, no te opu o Beniamina 12 000 tei tapaohia.  I muri iho, ite atura vau e inaha, te hoê nahoa rahi, eita e noaa ia taio, no roto mai i te mau nunaa e opu e reo atoa, o te tia noa ra i mua i te terono e i mua i te Arenio,* ma te ahu roa uouo e ma te amaa tamara i to ratou rima. 10  E te tuô noa ra ratou a na ô ai: “No ǒ mai te faaoraraa i to tatou Atua e parahi ra i nia i te terono, e i te Arenio.” 11  E ati a‘e te terono, te tia noa ra te mau melahi atoa e te mau matahiapo e na melahi e maha. Tipapa ihora ratou i mua i te terono e haamori atura i te Atua, 12  a na ô ai: “Amene! Ei to tatou Atua te arueraa e te hanahana e te paari e te haamauruururaa e te tura e te mana e te puai e a muri noa ’tu. Amene.” 13  Parau maira hoê o te mau matahiapo ia ’u: “O vai teie nei feia e ahu roa uouo to ratou, e nohea mai ratou?” 14  Na ô ihora vau ia ’na: “To ’u fatu, o oe tei ite.” Parau maira o ’na: “Mea na roto mai teie nei feia i te ati rahi, e ua horoi e ua faauouo ratou i to ratou ahu roa i te toto o te Arenio. 15  No reira ratou e tia noa ’i i mua i te terono o te Atua, e te pûpû nei ratou i te hoê taviniraa mo‘a ia ’na i te po e te ao i roto i to ’na hiero. E hohora mai te Atua e parahi ra i nia i te terono i to ’na tiahapa i nia ia ratou. 16  E ore roa ratou e poia e e poihâ faahou, e ore atoa ratou e paapaa i te mahana e te veavea, 17  no te mea na te Arenio i pihai iho* i te terono e aupuru e e aratai ia ratou i te mau pape pihaa o te ora. E na te Atua e tamǎrô i te roimata atoa o to ratou mata.”

Nota i raro i te api

Aore ra “hitia o te râ.”
Aore ra “Fanau‘a mamoe.”
Aore ra “i ropu.”