Eaha to roto?

Mau faaho'iraa ê

Tapura tumu parau

Ite no Iehova

Tahiti

Bibilia i nia i te reni | HURIRAA O TE AO APÎ O TE MAU PAPAI HELENI KERISETIANO

Apokalupo 5:1-14

HAAPOTORAA O TE MAU TUMU PARAU

  • Hoê otaro taatihia e hitu tapao taati (1-5)

  • E rave te Arenio i te otaro (6-8)

  • Mea tia e na te Arenio e ofati i na tapao taati (9-14)

5  E ite atura vau i roto i te rima atau o Tei parahi ra i nia i te terono i te hoê otaro ua papaihia na pae e piti* e ua taatihia e hitu tapao taati.  E ite atura vau i te hoê melahi puai i te parauraa ma te reo puai: “O vai te tia ia ofati i na tapao taati, a hohora ’tu ai i te otaro?”  Aita râ hoê a‘e i nia i te ra‘i, aita atoa i nia i te fenua e aita atoa i raro a‘e i te fenua e tia ia hohora i te otaro aore ra ia hi‘o i roto.  Ta‘i roa ’tura vau no te mea aita hoê a‘e e tia ia hohora i te otaro aore ra ia hi‘o i roto.  Na ô maira râ hoê o te mau matahiapo: “A faaea na i te ta‘i. Inaha, ua upootia te Liona o te opu o Iuda, te a‘a o Davida, a nehenehe atu ai o ’na e ofati i na tapao taati e hitu, a hohora ’tu ai i te otaro.”  E ite atura vau i pihai iho roa i te terono, i ropu atoa i na melahi e maha e i te mau matahiapo, i te hoê arenio* e tia ra e au ra e ua haapohehia ei tusia. E hitu tara to ’na e e hitu mata. E na mata, o to te Atua ïa na varua mo‘a e hitu tei tonohia e ati a‘e te fenua.  Haere ihora te Arenio e rave maira i te otaro i roto i te rima atau o Tei parahi ra i nia i te terono.  I to ’na raveraa mai i te otaro, tuturi ihora na melahi e maha e na matahiapo e 24 i mua i te Arenio. E kinura e e au‘a auro î i te mea no‘ano‘a ta te matahiapo tataitahi. (Te mea no‘ano‘a, o te mau pure ïa a te feia mo‘a.)  E te himene ra ratou i te hoê himene apî, a na ô ai: “Mea tia e na oe e rave i te otaro, a ofati atu ai i na tapao taati, ua haapohehia hoi oe ei tusia e i to oe toto ua hoo mai oe i te taata no te Atua no te mau opu e reo e nunaa atoa, 10  e ua faariro oe ia ratou ei faatereraa arii* e ei tahu‘a na to tatou Atua, e ia faatere mai ratou ei arii i te fenua e tia ’i.” 11  E ite atura vau e rave rahi melahi e ati a‘e te terono e na melahi e maha e te mau matahiapo, e faaroo atoa ’tura vau i to ratou reo. To ratou numera, ua ahuru tausani i te ahuru tausaniraa ïa e ua tausani i te tausaniraa, 12  e te na ô ra ratou ma te reo puai: “Mea tia ia noaa i te Arenio tei haapohehia ei tusia te mana e te faufaa e te paari e te puai e te tura e te hanahana e te haamaitairaa.” 13  Faaroo atura vau i to te ra‘i e to nia i te fenua e to raro a‘e i te fenua e to nia iho i te miti, ratou paatoa, i te na ôraa: “Ei te Atua ra e parahi ra i nia i te terono e ei te Arenio te haamaitairaa e te tura e te hanahana e te mana e a muri noa ’tu.” 14  Na ô a‘era na melahi e maha: “Amene!” e tuturi ihora te mau matahiapo e haamori atura i te Atua.

Nota i raro i te api

“I roto e i rapaeau” na roto i te reo Heleni.
Aore ra “fanau‘a mamoe.”
Aore ra “basileia.”