Eaha to roto?

Mau faaho'iraa ê

Tapura tumu parau

Ite no Iehova

Tahiti

Bibilia i nia i te reni | HURIRAA O TE AO APÎ O TE MAU PAPAI HELENI KERISETIANO

Apokalupo 3:1-22

HAAPOTORAA O TE MAU TUMU PARAU

  • Poroi i to Saradi (1-6), to Philadelephia (7-13), to Laodikea (14-22)

3  Teie ta oe e papai i te melahi o te amuiraa i Saradi: Te na ô mai ra o ’na tei ia ’na ra na varua mo‘a e hitu o te Atua e na fetia e hitu: ‘Ua ite au i ta oe mau ohipa, e au ra e mea ora oe, tera râ, mea pohe oe.  A ara, e a faaitoito i tei fatata i te pohe, aita hoi oe i faaoti i te ohipa ta to ’u Atua e hinaaro ia rave oe.  No reira, a haamana‘o noa i tei noaa mai ia oe e ta oe i faaroo, e a haapao noa i te reira e a tatarahapa. Ia ore oe e ara mai, e haere atu vau mai te eiâ, e e ore roa oe e ite eaha te hora e haere ai au ia oe ra.  Tera râ, te vai ra i ǒ oe te tahi mau taata* i Saradi aita i haaviivii i to ratou ahu, e e apee mai ratou ia ’u ma te ahu uouo, mea tano hoi ia fana‘o ratou i tera haamaitairaa.  E oomo ïa te taata o te upootia i te ahu uouo, e e ore roa vau e faaore* i to ’na i‘oa i roto i te buka o te ora, e faaite râ vau e ua ite au ia ’na i mua i to ’u Metua e i mua i ta ’na mau melahi.  E tari‘a to ’na, ia faaroo ïa i ta te varua mo‘a e parau ra i te mau amuiraa.’  Teie ta oe e papai i te melahi o te amuiraa i Philadelephia: Te na ô mai ra tei mo‘a, te parau mau, tei ia ’na ra te taviri a Davida, o te iriti e aore roa e taata e tapiri e o te tapiri e aore roa e taata e iriti:  ‘Ua ite au i ta oe mau ohipa. Inaha, ua tuu vau i mua ia oe i te hoê uputa matara noa, aore roa e taata e tia ia tapiri. E ua ite au e maa puai iti to oe, e ua haapao oe i ta ’u parau e aita oe i huna i to ’u i‘oa.  A hi‘o na i te pǔpǔ* a Satani e parau ra e e ati Iuda ratou e ere hoi, tera râ, te haavare ra ratou. E faahaere mai au ia ratou a faatuturi* atu ai i to oe na pae avae e e faaite au ia ratou e ua here au ia oe. 10  No te mea ua haapao oe i te parau o to ’u faaoromai tamau,* e haapao atoa ïa vau ia oe i te hora tamataraa e tae mai i nia i te fenua taatoa no te tamata i te feia e parahi ra i reira. 11  Te haere oioi atu nei au. A tapea papu noa i tei noaa ia oe, ia ore to oe hei upoo e riro ia vetahi ê. 12  Te taata o te upootia, e faariro ïa vau ia ’na ei pou i roto i te hiero o to ’u Atua, e ore roa o ’na e haere faahou i rapae, e e papai au i nia iho ia ’na i te i‘oa o to ’u Atua e i te i‘oa o te oire o to ’u Atua, te Ierusalema apî o te pou mai te ra‘i mai no ǒ mai i to ’u Atua, e i to ’u iho i‘oa apî. 13  E tari‘a to ’na, ia faaroo ïa i ta te varua mo‘a e parau ra i te mau amuiraa.’ 14  Teie ta oe e papai i te melahi o te amuiraa i Laodikea: Te na ô mai ra te Amene, te ite haapao maitai e te parau mau, te matamua ta te Atua i poiete: 15  ‘Ua ite au i ta oe mau ohipa, e ere oe mea to‘eto‘e, e ere atoa mea veavea. E hinaaro hoi au ia to‘eto‘e aore ra ia veavea oe. 16  No te mea râ mea pumahana oe, oia hoi e ere mea veavea, e ere atoa mea to‘eto‘e, e piha‘e au ia oe i rapae i to ’u nei vaha. 17  Te parau ra hoi oe: “E tao‘a rahi ta ’u e mea rahi te tao‘a i noaa mai ia ’u e aita vau e ere ra i te tahi mea,” tera râ, aita oe i ite e mea aroha roa oe e te veve e te matapo e te vai tahaa, 18  te a‘o atu nei au ia hoo mai oe ia ’u nei i te auro tamâhia i te auahi ia tao‘ahia oe, e i te ahu uouo ia oomo oe a ore atu ai e itehia te haama o to oe vai-tahaa-raa, e i te raau mata no te parai i to oe mata ia ite oe. 19  Te feia atoa mea here* na ’u, e faaite au i ta ratou hapa e e a‘o vau ia ratou. No reira, a haa ma te itoito rahi e a tatarahapa. 20  Inaha, te tia nei au i te pae uputa e te patoto nei. Ia faaroo mai te hoê taata i to ’u reo e ia iriti mai i te uputa, e tomo vau i roto i to ’na fare e e tamaa mâua. 21  E faatia vau i te taata e upootia ia parahi e o vau atoa i nia i to ’u terono, mai ia ’u tei upootia e tei parahi e to ’u Metua i nia i to ’na terono. 22  E tari‘a to ’na, ia faaroo ïa i ta te varua mo‘a e parau ra i te mau amuiraa.’”

Nota i raro i te api

“Te tahi mau i‘oa” na roto i te reo Heleni.
Aore ra “tumâ.”
“Sunago” na roto i te reo Heleni.
Aore ra “tahopu.”
Nehenehe atoa e hurihia “ua pee oe i to ’u faaoromai tamau.”
Heleni phileo.