Eaha to roto?

Mau faaho'iraa ê

Tapura tumu parau

Ite no Iehova

Tahiti

Bibilia i nia i te reni | HURIRAA O TE AO APÎ O TE MAU PAPAI HELENI KERISETIANO

Apokalupo 22:1-21

HAAPOTORAA O TE MAU TUMU PARAU

  • Te anavai pape o te ora (1-5)

  • Parau hopea (6-21)

    • ‘Haere mai! A rave noa mai i te pape o te ora’ (17)

    • “Haere mai, to ’u Fatu Iesu” (20)

22  Faaite maira te melahi ia ’u i te hoê anavai pape o te ora, marama mai te kerehe, e tahe ra no roto mai i te terono o te Atua e to te Arenio*  e na ropu atu i te aroâ o te oire. I na pae e piti o te anavai, te vai ra te mau tumu raau o te ora o te horoa mai i te maa 12 taime i te matahiti, hoê ïa hoturaa i te ava‘e. E te rauere o te mau tumu raau, no te faaora ïa i te ma‘i o te mau nunaa.  E ore roa te faaino i reira. E vai râ te terono o te Atua e to te Arenio i roto i te oire, e e pûpû te mau tavini a te Atua i te hoê taviniraa mo‘a ia ’na.  E ite ratou i to ’na aro, e e papaihia to ’na i‘oa i nia iho i to ratou rae.  E ore atoa e po faahou, e eita ratou e hinaaro faahou i te maramarama o te mori aore ra o te mahana, na te Atua ra hoi o Iehova* e turama ia ratou, e e faatere ratou ei arii e a muri noa ’tu.  Na ô maira te melahi ia ’u: “E parau papu* teie e te parau mau. Ua tono mai hoi Iehova,* te Atua tei paraparau na roto i te mau peropheta, i ta ’na melahi e faaite i ta ’na mau tavini i te mau mea e fatata i te tupu.  Inaha, te haere oioi atu nei au. E oaoa te taata e haapao ra i te mau ta‘o o te parau tohu o teie otaro.”  O vau, o Ioane, tei faaroo e tei ite i teie mau mea. I to ’u iho â faarooraa e iteraa i te reira, tipapa ihora vau no te haamori i te melahi tei faaite mai ia ’u i teie mau mea.  Parau maira râ oia: “A haapao maitai! Eiaha roa e na reira! E tavini noa vau mai ia oe e mai to oe mau taeae te mau peropheta e te feia e haapao ra i te mau parau o teie otaro. A haamori i te Atua.” 10  Parau atoa maira oia: “Eiaha e tapea huna noa i te mau ta‘o o te parau tohu o teie otaro, ua fatata hoi te tau faataahia. 11  Ia tamau â te taata parau-tia ore i te rave i te ohipa parau-tia ore, e ia tamau â te taata faufau i te rave i te mea faufau. Area te taata parau-tia, ia tamau â ïa i te rave i te ohipa parau-tia, e te taata mo‘a i te mea mo‘a. 12  ‘Inaha, te haere oioi atu nei au, e tei ia ’u ra te haamaitairaa e te faautuaraa ia faaho‘i au i ta te taata tataitahi ia au i ta ’na ohipa. 13  O vau te Alepha e te Omega,* te matamua e te faahopea, te haamataraa e te hopea. 14  E oaoa te feia tei tamâ i to ratou ahu roa, ia faatiahia ratou ia amu i te maa o te mau tumu raau o te ora e ia tomo na te mau uputa i roto i te oire. 15  I rapae, te mau urî ïa* e te feia e rave ra i te peu tahutahu e te feia e rave ra i te mau peu taotoraa tia ore* e te taparahi taata e te haamori idolo e te taata atoa mea au na ratou e haavare e o te parau ra i te haavare.’ 16  ‘O vau nei, o Iesu, ua tono atu vau i ta ’u melahi no te faaite ia outou i teie mau mea no te maitai o te mau amuiraa. O vau te a‘a e te huaai o Davida e te fetia poipoi anaana.’” 17  E te parau noa ra te varua mo‘a e te vahine o te faaipoipo i te Arenio: “A haere mai!” Ia parau atoa te taata e faaroo ra: “A haere mai!” E te taata e poihâ ra, ia haere mai ïa, e te taata atoa e hinaaro, ia rave noa mai ïa i te pape o te ora. 18  “Te haapapu nei au i te taata atoa e faaroo ra i te mau ta‘o o te parau tohu o teie otaro: Ia tuu te hoê taata i te tahi parau i roto i teie mau parau tohu, e tuu te Atua i te mau ati i papaihia i roto i teie otaro i nia ia ’na. 19  E ia tatara te hoê taata i te tahi parau o te mau parau tohu o teie otaro, e tatara te Atua i ta ’na tuhaa o te mau tumu raau o te ora e o te oire mo‘a, tei papaihia i roto i teie otaro. 20  Te na ô ra tei haapapu i teie mau parau: ‘Te haere oioi atu nei iho â vau.’” “Amene! A haere mai, to ’u Fatu Iesu.” 21  Ei te feia mo‘a ra te hamani maitai rahi o te Fatu ra o Iesu.

Nota i raro i te api

Aore ra “Fanau‘a mamoe.”
A hi‘o i te titionare.
Aore ra “te nehenehe e tiaturi.”
A hi‘o i te titionare.
Te Alepha e te Omega, o te reta matamua ïa e te reta hopea o te piapa Heleni.
Oia hoi te feia e rave ra i te mau mea faufau i te aro o te Atua.
A hi‘o i te titionare.