Eaha to roto?

Mau faaho'iraa ê

Tapura tumu parau

Ite no Iehova

Tahiti

Bibilia i nia i te reni | HURIRAA O TE AO APÎ O TE MAU PAPAI HELENI KERISETIANO

Apokalupo 21:1-27

HAAPOTORAA O TE MAU TUMU PARAU

  • Te hoê ra‘i apî e te hoê fenua apî (1-8)

    • E ore roa te pohe (4)

    • Hamanihia te mau mea apî atoa (5)

  • Ierusalema apî faataahia (9-27)

21  E ite atura vau i te hoê ra‘i apî e te hoê fenua apî, ua mou hoi te ra‘i tahito e te fenua tahito, e aita faahou te miti.  Ua ite atoa vau i te oire mo‘a, o Ierusalema apî, i te pouraa mai te ra‘i mai no ǒ i te Atua, e tei faaineinehia mai te hoê vahine i faanehenehehia no te tane ta ’na e faaipoipo.  Faaroo atura vau i te hoê reo puai no roto mai i te terono i te na ôraa: “Inaha, tei te huitaata ra te tiahapa o te Atua, e e faaea oia ia ratou ra, e e riro ratou ei nunaa no ’na. Ei pihai iho te Atua ia ratou.  E tamǎrô oia i te mau roimata atoa o to ratou mata. E ore roa te pohe, e ore atoa te oto e te auê e te mauiui. Ua mou hoi te mau mea tahito.”  Parau atura te Atua o te parahi ra i nia i te terono: “Inaha, te hamani nei au i te mau mea apî atoa.” Na ô atoa maira oia: “A papai, e parau papu* hoi teie e te parau mau.”  Na ô maira oia ia ’u: “Ua tupu te reira! O vau te Alepha e te Omega,* te haamataraa e te hopea. I tei poihâ ra e horoa noa ’tu vau* i te pape o te ora no roto i te pape pihaa.  E fatu te taata e upootia i teie mau mea, e e riro vau ei Atua no ’na, e e riro oia ei tamaiti na ’u.  Area te feia mǎta‘u hanoa e te feia tiaturi ore i te Atua e te feia viivii e te faufau e te taparahi taata e te rave i te mau peu taotoraa tia ore* e te feia e rave i te mau peu tahutahu e te haamori idolo e te mau taata haavare atoa, e hurihia ïa i raro i te roto auahi e ura puai noa ra. O te piti o te pohe teie.”  Haere maira hoê o na melahi e hitu tei ia ratou ra na au‘a e hitu tei î i na ati hopea e hitu, e parau maira: “A haere mai, e faaite atu vau ia oe i te vahine o te riro mai ei vahine faaipoipo na te Arenio.”* 10  Afai atura oia ia ’u maoti te puai o te varua mo‘a i nia te hoê mou‘a rahi teitei, e faaite maira i te oire mo‘a o Ierusalema i te pouraa mai te ra‘i mai no ǒ i te Atua 11  e ma te hanahana o te Atua. To ’na anaana, mai to te hoê ïa ofai moni rahi, mai te hoê ofai isephe e anaana ra mai te kerehe. 12  E patu rahi teitei e 12 uputa to taua oire ra, 12 hoi melahi i te uputa tataitahi. E ua papaihia te i‘oa o na opu 12 o na tamaiti a Iseraela i nia mai i te mau uputa. 13  I hitia o te râ, e toru uputa, i apatoerau, e toru uputa, i apatoa, e toru uputa, i tooa o te râ, e toru uputa. 14  Oia atoa, 12 ofai niu to te patu o taua oire ra, e i nia iho i te reira na i‘oa 12 ïa o na aposetolo 12 a te Arenio. 15  Te tapea ra te melahi e paraparau ra ia ’u i te hoê aeho auro no te faito i te oire e te mau uputa e te patu o taua oire ra. 16  E maha pae to te oire, hoê â roa e hoê â aano. Faito atura oia i te oire i te aeho, 12 000 ïa setadia,* ua aifaito hoi te roa e te aano e te teitei. 17  Faito atoa ’tura oia i te patu o taua oire ra, 144 ïa kubiti* ia au i te faito a te taata, ta te melahi atoa ïa i faaohipa. 18  Ua hamanihia te patu i te isephe, e te oire e auro maitai ïa mai te hi‘o e itehia na roto. 19  Ua faaunaunahia te niu o te patu o te oire i te mau ofai moni rahi e rave rau: te ofai niu matamua e isephe, te piti e saphira, te toru e halekedoni, te maha e semaradino, 20  te pae e saredonu, te ono e adama, te hitu e tarisisa, te va‘u e sema, te iva e phetade, te ahuru e herusoparasa, te ahuru ma hoê e huakineto, te ahuru ma piti e aheleme.* 21  E na uputa 12, 12 ïa poe, e poe te uputa tataitahi. E te aroâ o te oire, e auro maitai ïa mai te hi‘o e itehia na roto. 22  Aita vau i ite i te hoê hiero i roto, o Iehova* hoi te Atua Mana hope te hiero o taua oire ra, e te Arenio atoa. 23  Aita e faufaa ia turama te mahana e te ava‘e i te oire, na te hanahana hoi o te Atua e turama, e o te Arenio te maramarama o taua oire ra. 24  E haere te mau nunaa ma te turamahia e te maramarama o taua oire ra, e e afai te mau arii o te fenua i to ratou hanahana i roto. 25  Eita roa ’tu te mau uputa o te oire e tapirihia ia ao, e eita roa ’tu e po i reira. 26  E afaihia mai i roto te hanahana e te tura o te mau nunaa. 27  Eita roa râ te mea viivii e te taata e rave ra i te mea faufau e te mea haavare e ô atu i roto, o te feia noa râ ua papaihia to ratou i‘oa i roto i te otaro o te ora a te Arenio.

Nota i raro i te api

Aore ra “te nehenehe e tiaturi.”
Te Alepha e te Omega, o te reta matamua ïa e te reta hopea o te piapa Heleni.
Aore ra “e horoa ’tu vau ma te tamoni ore.”
A hi‘o i te titionare.
Aore ra “Fanau‘a mamoe.”
E 2 220 kilometera. Hoê setadia, 185 ïa metera.
Hau atu i te 64 metera.
Ua rau te û o teie mau ofai moni rahi.
A hi‘o i te titionare.