Eaha to roto?

Mau faaho'iraa ê

Tapura tumu parau

Ite no Iehova

Tahiti

Bibilia i nia i te reni | HURIRAA O TE AO APÎ O TE MAU PAPAI HELENI KERISETIANO

Apokalupo 2:1-29

HAAPOTORAA O TE MAU TUMU PARAU

  • Poroi i to Ephesia (1-7), to Semurina (8-11), to Peregamo (12-17), to Tuatira (18-29)

2  Teie ta oe e papai i te melahi o te amuiraa i Ephesia: Te na ô mai ra o ’na e tapea ra i na fetia e hitu i roto i to ’na rima atau e e haere ra na ropu i na mori auro* e hitu:  ‘Ua ite au i ta oe mau ohipa e ta oe tutavaraa e to oe faaoromai tamau, e eita oe e farii i te feia ino, e ua tamata oe i te feia e parau ra e e aposetolo ratou e ere râ, e ua itehia ia oe e e haavare ratou.  Te faaite atoa ra oe i te faaoromai tamau e ua faaruru noa oe i te fifi no to ’u nei i‘oa e aita oe i toaruaru.  Teie râ ta ’u faahaparaa ia oe, ua ere oe i to oe here matamua.  No reira, a haamana‘o i to oe huru na mua ’‘e oe a hi‘a ’i, e a tatarahapa e a rave i te mau ohipa ta oe i rave na. Ia ore oe e tatarahapa, e haere mai au ia oe ra, a tatara ’tu ai i ta oe mori* i to ’na vairaa.  Teie râ te tahi ohipa maitai ta oe e rave nei: mea au ore roa na oe i te mau ohipa a te mau pǐpǐ a Nikola, o ta ’u atoa e au ore roa nei.  E tari‘a to ’na, ia faaroo ïa i ta te varua mo‘a e parau ra i te mau amuiraa: E faatia vau i te taata e upootia ia amu i te maa o te tumu raau o te ora e vai ra i roto i te paradaiso a te Atua.’  Teie ta oe e papai i te melahi o te amuiraa i Semurina: Te na ô mai ra o ’na, ‘te Matamua e te Hopea,’ tei pohe na e tei ora faahou mai:  ‘Ua ite au i to oe hamani-ino-raahia e to oe veve, tera râ, e tao‘a rahi ta oe. Ua ite atoa vau i to oe faainoraahia e te feia e parau ra e e ati Iuda ratou e ere hoi. E pǔpǔ* râ ratou na Satani. 10  Eiaha oe e mǎta‘u i ta oe e fatata i te faaruru. Inaha, e tamau te Diabolo i te huri vetahi o outou i roto i te tapearaa ia tamata-roa-hia outou, e e hamani-ino-hia outou ahuru mahana. A tapea i to oe haapao maitai e tae noa ’tu i te pohe, e e horoa ’tu vau i te hei upoo o te ora no oe. 11  E tari‘a to ’na, ia faaroo ïa i ta te varua mo‘a e parau ra i te mau amuiraa: E ore roa te taata o te upootia e roohia i te piti o te pohe.’ 12  Teie ta oe e papai i te melahi o te amuiraa i Peregamo: Te na ô mai ra o ’na, e ‘o‘e mata piti oi e te roa ta ’na: 13  ‘Ua ite au ihea oe e parahi ai, oia hoi i te vahi to reira te terono o Satani. Te mau maite noa nei râ oe i to ’u i‘oa, e te tapea maite ra oe i to oe faaroo ia ’u i te mau mahana atoa o Anitipa, to ’u ite haapao maitai, tei haapohehia i te vahi ta oe e faaea ra, te vahi ta Satani e parahi ra. 14  Teie râ te tahi faahaparaa ta ’u ia oe, te vai ra i ǒ oe te feia e turu ra i te haapiiraa a Balaama, tei haapii ia Balaka ia faahema i te mau tamarii Iseraela ia hara, ia amu i te mau mea pûpûhia ei tusia na te idolo e ia rave i te mau peu taotoraa tia ore.* 15  Te vai atoa ra i ǒ oe te feia e turu ra i te haapiiraa a te mau pǐpǐ a Nikola. 16  No reira, a tatarahapa. Ia ore oe e tatarahapa, te haere oioi atu nei au ia oe ra, e e aro atu vau ia ratou i te ‘o‘e roa o to ’u vaha. 17  E tari‘a to ’na, ia faaroo ïa i ta te varua mo‘a e parau ra i te mau amuiraa: E horoa vau maa mâna hunahia na te taata e upootia, a horoa ’tu ai na ’na i te hoê ofai uouo ua papaihia i nia iho te hoê i‘oa apî aita hoê a‘e taata i ite, o te taata ana‘e râ i mairihia i taua i‘oa ra.’ 18  Teie ta oe e papai i te melahi o te amuiraa i Tuatira: Te na ô mai ra te Tamaiti a te Atua, mai te ura auahi to ’na na mata e mai te veo anaana to ’na na avae: 19  ‘Ua ite au i ta oe mau ohipa, e to oe here e to oe faaroo e ta oe taviniraa e to oe faaoromai tamau, e mea rahi a‘e ta oe mau ohipa i rave iho nei i ta oe i rave na i te omuaraa. 20  Teie râ ta ’u faahaparaa ia oe, te farii ra oe i tera Iezebela o te parau ra e e peropheta vahine o ’na, e te haapii ra e te faahema ra o ’na i ta ’u mau tavini ia rave i te mau peu taotoraa tia ore* e ia amu i te mau mea pûpûhia ei tusia na te idolo. 21  Ua horoa hoi au i te taime ia tatarahapa o ’na, aita râ o ’na i hinaaro e tatarahapa i ta ’na mau peu taotoraa tia ore.* 22  Inaha, e tairi au ia ’na i te ma‘i rahi e e faautua vau i te feia e faaturi ra ia ’na ia ore ratou e tatarahapa i ta ’na mau raveraa. 23  E haapohe au i ta ’na mau tamarii i te ma‘i pohe, ia ite hoi te mau amuiraa atoa e o vau te hi‘opoa i te mau mana‘o hohonu roa* e te aau, e e horoa ’tu vau na outou tataitahi ia au i ta outou mau ohipa. 24  Teie râ ta ’u e parau i te tahi pae o outou i Tuatira, te feia atoa aita e pee ra i te haapiiraa a Iezebela, te feia aita i ite i tei parauhia “te mau mea hohonu a Satani”: Aita ’tu ta ’u e hopoia e horoa na outou. 25  Teie noa râ, a tapea papu i tei noaa ia outou e ia tae roa mai au. 26  Te taata e upootia e e haapao i ta ’u i faaue atu e tae roa i te hopea, e horoa vau ia ’na i te mana i nia i te mau nunaa, 27  mai ia ’u nei tei horoahia mai te mana e to ’u Metua, e e faatere oia ia ratou ma te sepeta auri ia hu‘ahu‘a roa hoi ratou mai te farii araea ra. 28  E e horoa vau na ’na i te fetia poipoi. 29  E tari‘a to ’na, ia faaroo ïa i ta te varua mo‘a e parau ra i te mau amuiraa.’

Nota i raro i te api

E mori avae auro teie e hitu amaa.
E mori avae auro teie e hitu amaa.
“Sunago” na roto i te reo Heleni.
A hi‘o i te titionare.
A hi‘o i te titionare.
A hi‘o i te titionare.
“Mape” na roto i te reo Heleni.