Eaha to roto?

Mau faaho'iraa ê

Tapura tumu parau

Ite no Iehova

Tahiti

Bibilia i nia i te reni | HURIRAA O TE AO APÎ O TE MAU PAPAI HELENI KERISETIANO

Apokalupo 19:1-21

HAAPOTORAA O TE MAU TUMU PARAU

  • Arue ia Ia no ta ’na mau haavaraa (1-10)

    • Faaipoiporaa o te Arenio (7-9)

  • Tei parahi i nia i te puaarehenua uouo (11-16)

  • Tamaaraa rahi a te Atua (17, 18)

  • E pau te puaa taehae (19-21)

19  I muri iho, faaroo ihora vau i nia i te ra‘i te hoê reo puai mai to te hoê nahoa rahi, o tei na ô hoi: “Arue ia Ia!* Tei to tatou Atua te faaoraraa e te hanahana e te puai,  no te mea e haavaraa parau mau ta ’na e te parau-tia. Ua faautua hoi te Atua i te vahine taiata rahi tei haaviivii i te fenua i ta ’na mau peu taotoraa tia ore,* e ua tahoo oia i te toto o ta ’na mau tavini ta taua vahine ra i haamanii.”*  I reira iho, parau a‘era ratou no te piti o te taime: “Arue ia Ia!* E te pee noa ra te au auahi o to ’na taninaraahia i nia e a muri noa ’tu.”  Tipapa ihora na matahiapo e 24 e na melahi e maha, haamori atura i te Atua e parahi ra i nia i te terono, e parau atura: “Amene! Arue ia Ia!”*  Na ô atoa maira te hoê reo no roto mai i te terono: “Arue i to tatou Atua, outou paatoa ta ’na mau tavini e mǎta‘u ra ia ’na, te feia riirii e te feia tiaraa teitei.”  E faaroo atura vau i te hoê reo mai to te hoê nahoa rahi, e te haruru mai to te pape e rave rahi e mai to te patiri puai. Te na ô ra ratou: “Arue ia Ia,* no te mea ua haamata Iehova* to tatou Atua, te Mana hope, i te faatere ei Arii!  E oaoa e e oaoa ’tu â e e faahanahana ana‘e ia ’na, no te mea ua tae mai te oroa faaipoiporaa o te Arenio* e ua ineine ta ’na vahine no te faaipoiporaa.  Oia mau, ua faatiahia i te vahine a te Arenio ia ahu i te ahu lino maitai roa e te mâ e te anaana, no te mea o te mau ohipa parau-tia a te feia mo‘a taua ahu lino maitai roa ra.”  Parau maira te melahi ia ’u: “A papai: E oaoa te mau manihini o te tamaaraa faaipoiporaa a te Arenio.” Na ô atoa maira oia: “Teie mau parau, e parau mau ïa no ǒ mai i te Atua.” 10  Tipapa ihora vau i to ’na pae avae no te haamori ia ’na. Parau maira râ oia: “A haapao maitai! Eiaha roa e na reira! E tavini noa vau mai ia oe e mai to oe mau taeae, tei ia ratou ra te ohipa faaiteraa i te parau mau no nia ia Iesu. A haamori i te Atua! No te faaite hoi i te parau no Iesu te mau parau tohu.” 11  Ite atura vau e ua matara te ra‘i, e a hi‘o na, te hoê puaarehenua uouo. E tei parahi ra i nia iho, o Haapao maitai ïa e o Parau mau te i‘oa, e te haava ra oia e te tama‘i ra ma te parau-tia. 12  To ’na na mata, e auahi ura ïa, e mea rahi te hei* i nia i to ’na upoo. E i‘oa tei papaihia i nia iho ia ’na aita hoê i ite i te reira o ’na ana‘e râ, 13  e ua ahuhia oia i te hoê ahu tapo‘i tei tafetafeta i te toto, e o Te Parau a te Atua to ’na i‘oa. 14  Apee atoa maira te mau nuu o te ra‘i ia ’na na nia i te mau puaarehenua uouo, e ua ahuhia ratou i te ahu lino maitai roa e te mâ e te uouo. 15  E na roto maira i to ’na vaha te hoê ‘o‘e roa e te oi no te tairi i te mau nunaa, e e faatere oia ia ratou ma te sepeta auri. Te taataahi atoa ra oia i te apoo taataahiraa vine o te riri rahi o te Atua, te Mana hope. 16  E i‘oa tei papaihia i nia iho i to ’na ahu tapo‘i, oia hoi i to ’na huha: Arii o te mau arii e Fatu o te mau fatu. 17  Ite atoa ’tura vau i te hoê melahi i te tia-noa-raa i mua i te mahana, e tuô ihora oia e na ô atura i te mau manu atoa e rere ra na te reva: “A rere mai i ǒ nei, a putuputu mai no te tamaaraa rahi a te Atua, 18  ia amu outou i te i‘o o te mau arii e te i‘o o te mau raatira o te nuu e te i‘o o te feia pautuutu e te i‘o o te mau puaarehenua e to tei parahi i nia iho, e te i‘o o te mau taata atoa, to te feia tiamâ e oia atoa to te mau tîtî, e to te feia riirii e to te feia tiaraa teitei.” 19  E ite atura vau i te puaa taehae e te mau arii o te fenua e ta ratou mau nuu i te tahoêraa no te tama‘i i tei parahi ra i nia i te puaarehenua e i ta ’na nuu. 20  Haruhia ’tura te puaa taehae e oia atoa te peropheta haavare tei faatupu i te mau ohipa maere i mua ia ’na, i vare ai te feia tei tapaohia i te tapao o te puaa taehae e te feia e haamori ra i to ’na tii. Huri-ora-noa-hia ’tura raua toopiti atoa i raro i te roto auahi e ura puai noa ra. 21  Area te toea o te taata, ua pohe ïa i te ‘o‘e roa no roto mai i te vaha o tei parahi ra i nia iho i te puaarehenua. Paia a‘era te mau manu atoa i to ratou mau i‘o.

Nota i raro i te api

Aore ra “Haleluia!” “Ia” e haapotoraa ïa o te i‘oa Iehova.
A hi‘o i te titionare.
“Tei manii i to ’na rima” na roto i te reo Heleni.
Aore ra “Haleluia!” “Ia” e haapotoraa ïa o te i‘oa Iehova.
Aore ra “Haleluia!” “Ia” e haapotoraa ïa o te i‘oa Iehova.
Aore ra “Haleluia!” “Ia” e haapotoraa ïa o te i‘oa Iehova.
A hi‘o i te titionare.
Aore ra “Fanau‘a mamoe.”
Aore ra “hei arii.”