Eaha to roto?

Mau faaho'iraa ê

Tapura tumu parau

Ite no Iehova

Tahiti

Bibilia i nia i te reni | HURIRAA O TE AO APÎ O TE MAU PAPAI HELENI KERISETIANO

Apokalupo 18:1-24

HAAPOTORAA O TE MAU TUMU PARAU

  • Toparaa “Babulonia rahi” (1-8)

    • “A haere ê mai i rapae ia ’na, to ’u nunaa” (4)

  • Te oto i te toparaa Babulonia (9-19)

  • Oaoa to te ra‘i i te toparaa Babulonia (20)

  • E taorahia Babulonia i raro i te miti mai te hoê ofai (21-24)

18  I muri iho, ite atura vau i te tahi atu melahi i te pouraa mai te ra‘i mai ma te mana rahi, e maramarama ihora te fenua i to ’na hanahana.  Tuô ihora oia a na ô ai: “Ua topa oia! Ua topa o Babulonia rahi, e ua riro oia ei parahiraa no te mau demoni e ei vairaa no te mau varua* viivii atoa e te mau manu viivii au-ore-roa-hia atoa!  No ta ’na hoi uaina o te faatupu i te hinaaro rahi e rave i* te mau peu taotoraa tia ore,* ua taero te mau nunaa atoa, e ua taiata te mau arii o te fenua ia ’na, e ua tao‘a-rahi-hia te mau ona* o te fenua no to ’na oraraa fana‘o roa ino.”  Faaroo atura vau i te tahi atu reo mai te ra‘i mai i te na ôraa: “A haere ê mai i rapae ia ’na, to ’u nunaa, ia ore outou ia apiti i ta ’na mau hara a roohia ’tu ai outou i to ’na mau ati.  Ua pue hoi ta ’na mau hara e ua tae roa i te ra‘i, e ua haamana‘o te Atua i ta ’na mau ohipa parau-tia ore.*  A faaho‘i atu i ta ’na mai ta ’na i rave i nia ia vetahi ê, ia tataipiti hoi ia faaho‘ihia ’tu no te mau ohipa ta ’na i rave. Te inu ta ’na i faaineine i roto i te au‘a, ia tataipitihia ïa no ’na.  Ua faatietie rahi oia ia ’na e ua ora i te hoê oraraa fana‘o roa ino, mai te reira atoa ïa te mauiui e te oto ia faaho‘ihia ’tu. Te parau noa ra hoi oia i roto i to ’na aau: ‘Te parahi nei au ei arii vahine, e e ere au i te vahine ivi, e eita roa ’tu vau e roohia i te oto.’  No reira, i te hoê noa mahana e tae mai ai to ’na mau ati, oia hoi te pohe e te oto e te o‘e. E e tanina-roa-hia oia i te auahi, no te mea e Atua puai o Iehova* tei haava ia ’na.  E te mau arii o te fenua tei taiata ia ’na e tei apiti i to ’na oraraa fana‘o roa ino, e ta‘i ïa e e tupaipai i to ratou ouma no to ratou oto ia ’na ia ite ratou i te au auahi o to ’na taninaraahia. 10  E tia noa ratou i te atea no to ratou riaria i to ’na mauiui e e parau ratou: ‘Auê, auê oe te oire rahi o Babulonia, te oire tao‘a rahi, no te mea i te hoê noa hora to oe faautuaraahia!’ 11  E ta‘i e e oto atoa te mau ona o te fenua ia ’na, no te mea aita e taata faahou no te hoo mai i ta ratou mau tao‘a atoa, 12  ta ratou auro, ario, ofai moni rahi, poe, ahu lino maitai roa, ahu vareau, ahu tirita, ahu uteute, e te mau mea atoa i hamanihia i te raau no‘ano‘a, e te taihaa atoa i hamanihia i te niho elefani e te raau maitatai ra, e te veo, e te auri, e te mapura, 13  oia atoa te kinamo, te faano‘ano‘a maa no Initia, te mea no‘ano‘a, te mono‘i no‘ano‘a, te libano, te uaina, te hinu olive, te faraoa ota maitai, te sitona, te puaatoro, te mamoe, te puaarehenua, te pereoo, te tîtî e te taata.* 14  Oia mau, aita faahou te maa hotu maitai ta oe* i hiaai, e ua ore roa te mau maa maitai atoa e te mau mea faahiahia atoa. 15  E te mau ona i hoo atu i teie mau tao‘a e tei tao‘a-rahi-hia ia ’na, e tia noa ïa i te atea no to ratou riaria i to ’na ati. E e ta‘i e e oto ratou, 16  a na ô ai: ‘Auê, auê te oire rahi, tei ahuhia i te ahu lino maitai roa, te ahu vareau e te uteute, e tei faanehenehe-rahi-hia i te tao‘a auro, te ofai moni rahi e te poe, 17  no te mea i te hoê noa hora i pau roa ’i taua mau tao‘a rahi ra!’ E te mau raatira pahi atoa e te mau horopatete atoa e te mau mataro atoa e te feia hoo atoa na te moana, e tia noa ïa i te atea 18  e e tuô ratou a hi‘o noa ’i i te au auahi o to ’na taninaraahia, a parau ai: ‘O vai ïa oire mai te oire rahi ra?’ 19  E ueue ratou i te repo i nia i to ratou upoo, a ta‘i ai e a oto ai, e e parau ratou: ‘Auê, auê te oire rahi, i reira hoi te mau fatu pahi atoa i te tao‘araahia i ta ’na faufaa, no te mea i te hoê noa hora i mou ai oia!’ 20  Outou to te ra‘i, e outou te feia mo‘a e te mau aposetolo e te mau peropheta, a oaoa ïa no te mea ua haava te Atua ia ’na no ta ’na i rave i nia ia outou!” 21  Amo a‘era te hoê melahi puai i te hoê ofai mai te ofai oro rahi ra te hoho‘a, e taora ihora i raro i te miti, a parau ai: “Mea na reira Babulonia te oire rahi e taorahia ’i i raro, e eita oia e ite-faahou-hia. 22  Eita e faaroo-faahou-hia i roto ia oe te hoê taata e himene ra e e faata‘i ra i te kinura, aore ra te hoê taata e faata‘i ra i te upaupa, te vivo, aore ra e faaoto ra i te pu. Eita e ite-faahou-hia i roto ia oe te mau rimaî atoa, e eita e faaroo-faahou-hia te ofai oro. 23  Eita te maramarama o te mori e ama faahou i roto ia oe, e eita te reo o te tane faaipoipo e ta ’na vahine e faaroo-faahou-hia i roto ia oe, no te mea ta oe mau ona na mua ’‘e, o te feia tiaraa teitei ïa o te fenua, e ua vare te mau nunaa atoa i ta oe ra mau peu tahutahu. 24  Oia mau, ua itehia i roto ia ’na te toto o te mau peropheta e to te feia mo‘a e to te feia atoa i taparahi-pohe-hia i nia i te fenua.”

Nota i raro i te api

Nehenehe atoa e hurihia “aho,” “puhiraa aho,” “poroi faauruhia.”
Aore ra “No ta ’na hoi uaina o te riri no.”
A hi‘o i te titionare.
Aore ra “ona ratere.”
Aore ra “ta ’na mau ohipa ino.”
A hi‘o i te titionare.
Heleni pusuke. A hi‘o i te titionare.
Heleni pusuke. A hi‘o i te titionare.