Eaha to roto?

Mau faaho'iraa ê

Tapura tumu parau

Ite no Iehova

Tahiti

Bibilia i nia i te reni | HURIRAA O TE AO APÎ O TE MAU PAPAI HELENI KERISETIANO

Apokalupo 17:1-18

HAAPOTORAA O TE MAU TUMU PARAU

  • Faautuaraa o “Babulonia rahi” (1-18)

    • Parahi ra te vahine taiata rahi i nia i te hoê puaa taehae uteute (1-3)

    • ‘I vai na te puaa taehae, aita faahou nei, ua fatata râ i te na roto mai i te abuso’ (8)

    • E tama‘i na tara hoê ahuru i te Arenio (12-14)

    • E hae na tara hoê ahuru i te vahine taiata (16, 17)

17  Haere maira hoê o na melahi e hitu e hitu au‘a ta ratou, e parau maira ia ’u: “A haere mai, e faaite atu vau ia oe i te faautuaraa o te vahine taiata rahi e parahi ra i nia iho i te pape e rave rahi,  ua taiata hoi o ’na i te mau arii o te fenua, e ua taero to te fenua i te uaina o ta ’na mau peu taotoraa tia ore.”*  Afai atura te melahi ia ’u i te medebara maoti te puai o te varua mo‘a. Ite atura vau i te hoê vahine e parahi ra i nia i te hoê puaa taehae uteute e hitu afii e e ahuru tara to ’na e mea rahi roa te i‘oa faaino na nia iho ia ’na.  E ahu vareau e te uteute to te vahine, e ua faanehenehe o ’na ia ’na i te auro e te mau ofai moni rahi e te poe. E i roto i to ’na rima, e au‘a auro ïa î i te mau mea faufau e te viivii o ta ’na mau peu taotoraa tia ore.*  I nia iho i to ’na rae, ua papaihia te hoê i‘oa, te hoê parau huna: “Babulonia rahi, te metua vahine o te mau vahine taiata e o te mau mea faufau o te fenua.”  Ite atura vau e ua taero te vahine i te toto o te feia mo‘a e te toto o te mau ite no Iesu. Ua maere roa vau i to ’u iteraa ia ’na.  Parau maira te melahi ia ’u: “Eaha oe i maere ai? E faaite atu vau ia oe i te parau huna no nia i te vahine e te puaa taehae e hitu afii e e ahuru tara to ’na o te uta ra i te vahine:  I vai na te puaa taehae ta oe i ite, aita faahou nei râ. Ua fatata râ oia i te na roto mai i te abuso, e e haamouhia oia. E te feia e parahi ra i te fenua, oia hoi te feia aita te i‘oa i papaihia i roto i te otaro o te ora mai te omuaraa mai â o teie nei ao,* e maere ïa ia ite ratou i te puaa taehae tei vai na, e aita faahou nei, o te ho‘i faahou mai râ.  I ǒ nei e titauhia ’i te maramarama e te paari: Na afii e hitu, e hitu ïa mou‘a i reira te vahine i te parahiraa, 10  e hitu atoa ïa arii: ua taahuri e pae, te tia noa ra hoê, aita â te tahi atu i tae mai atura. Ia tae ana‘e mai râ, e vai ïa oia no te hoê tau poto. 11  E te puaa taehae tei vai na, aita faahou nei râ, o te va‘u ïa o te arii, no roto mai râ i na arii e hitu, e e haamouhia oia. 12  Na tara hoê ahuru ta oe i ite, e ahuru ïa arii, tera râ, aita â i horoahia ’tura te hoê faatereraa na ratou, e horoahia râ no ratou te mana ei arii no te hoê noa hora e te puaa taehae. 13  No te mea hoê â mana‘o to ratou, e horoa ïa ratou i to ratou puai e to ratou mana no te puaa taehae. 14  E tama‘i ratou e te Arenio,* no te mea râ e Fatu o ’na o te mau fatu e e Arii o te mau arii, e upootia te Arenio. E upootia atoa tei to ’na ra pae o tei titau-manihini-hia e tei maitihia e te taiva ore.” 15  Parau maira oia ia ’u: “Te mau pape ta oe i ite i reira te vahine taiata i te parahiraa, e nahoa taata ïa e e nunaa e e reo atoa. 16  E na tara hoê ahuru ta oe i ite e te puaa taehae, e hae ïa i te vahine taiata. E haru ratou i ta ’na mau tao‘a e to ’na ahu e te mau faaneheneheraa i nia ia ’na. E amu atoa ratou i to ’na i‘o e e tanina roa ia ’na i te auahi. 17  E tuu hoi te Atua i te mana‘o i roto i to ratou aau e rave i to ’na hinaaro, oia hoi e faatupu i to ratou mana‘o hoê roa e horoa i ta ratou faatereraa na te puaa taehae e ia tupu roa ’tu te mau parau a te Atua. 18  E te vahine ta oe i ite, o te oire rahi ïa e faatere ra i te mau arii o te fenua.”

Nota i raro i te api

A hi‘o i te titionare.
A hi‘o i te titionare.
Oia hoi a tamariihia ’i Adamu raua Eva.
Aore ra “Fanau‘a mamoe.”