Eaha to roto?

Mau faaho'iraa ê

Tapura tumu parau

Ite no Iehova

Tahiti

Bibilia i nia i te reni | HURIRAA O TE AO APÎ O TE MAU PAPAI HELENI KERISETIANO

Apokalupo 16:1-21

HAAPOTORAA O TE MAU TUMU PARAU

  • Hitu au‘a o te riri o te Atua (1-21)

    • Maniihia i nia i te fenua (2), te miti (3), te anavai e te pape pihaa (4-7), te mahana (8, 9), te terono o te puaa taehae (10, 11), te Eupharate (12-16), e i roto i te reva (17-21)

    • Tama‘i a te Atua i Aramagedo (14, 16)

16  Faaroo atura vau i te hoê reo puai mai roto mai i te nao* i te na ôraa i na melahi e hitu: “A haere, a manii i na au‘a e hitu o te riri o te Atua i nia i te fenua.”  Reva ’tura te melahi matamua e manii ihora i ta ’na au‘a i nia i te fenua. E te feia tei tapaohia i te tapao o te puaa taehae e o te haamori ra i to ’na tii, roohia ihora ïa i te taupo ino roa.  Manii atura te piti o te melahi i ta ’na au‘a i roto i te miti, e riro maira te reira ei toto mai to te taata pohe ra. E pohe a‘era te mau animara* atoa i roto i te miti.  Manii atura te toru o te melahi i ta ’na au‘a i roto i te mau anavai e te mau pape pihaa, e riro maira te reira ei toto.  Faaroo ihora vau i te melahi e mana to ’na i nia i te pape i te na ôraa: “O oe e vai nei e i vai na, te Atua haapao maitai, e Atua parau-tia oe, ua faatupu hoi oe i teie mau haavaraa,  no te mea ua haamanii ratou i te toto o te feia mo‘a e o te mau peropheta. Ua faainu oe ia ratou i te toto e ua tano roa.”  Faaroo ihora vau i te fata i te na ôraa: “Oia mau, te Atua ra o Iehova,* te Mana hope, e haavaraa* parau mau e te parau-tia ta oe.”  Manii atura te maha o te melahi i ta ’na au‘a i nia i te mahana, e ua faatiahia i te mahana ia paapaa te taata i te auahi.  Paapaa a‘era te taata i te veavea rahi, tera râ, faaino a‘era ratou i te i‘oa o te Atua, tei ia ’na ra hoi te mana i nia i teie mau ati, e aita ratou i tatarahapa e i faahanahana ia ’na. 10  Manii atura te pae o te melahi i ta ’na au‘a i nia i te terono o te puaa taehae. Poirihia ihora te hau ta te puaa taehae e faatere ra, e haamata ’tura te niho o te taata i te ma‘u‘u no to ratou mauiui, 11  tera râ, faaino a‘era ratou i te Atua o te ra‘i no to ratou mauiui e no te taupo i nia ia ratou, e aita ratou i tatarahapa i ta ratou mau ohipa. 12  Manii atura te ono o te melahi i ta ’na au‘a i nia i te anavai rahi o Eupharate. Mǎrô a‘era te anavai no te faaineine i te e‘a no na arii no te hitiraa mai o te mahana.* 13  Ite atura vau e toru poroi viivii* mai te rana ra i te na rotoraa mai i te vaha o te teni e te vaha o te puaa taehae e te vaha o te peropheta haavare. 14  No ǒ mai teie mau poroi i te mau demoni e e faaroo te mau arii o te ao atoa i te reira. E faatupu teie mau poroi i te mau ohipa maere no te haaputu mai i te mau arii atoa o te fenua nei no te tama‘i o te mahana rahi o te Atua Mana hope. 15  “A ara! Te haere mai nei au mai te hoê eiâ. E oaoa te taata e vai ara noa e aita i tatarahia to ’na mau ahu, ia ore oia ia haere tahaa noa a itehia ’i to ’na haama.” 16  Haaputuputu maira ratou i te mau arii i te vahi parauhia Aramagedo* na roto i te reo Hebera. 17  Manii atura te hitu o te melahi i ta ’na au‘a i roto i te reva. Faaroohia ihora te hoê reo puai no roto mai i te nao e mai te terono mai i te na ôraa: “Ua tupu te reira!” 18  Anapa maira te uira, haruru ihora te patiri e te reo atoa, e tupu atura te hoê aueueraa fenua rahi aita i tupu a‘enei mai te hamaniraahia mai te taata i nia i te fenua, e aueueraa fenua rahi mau â e te puai. 19  Amaha ’tura te oire rahi ei toru tuhaa, e hu‘ahu‘a a‘era te mau oire o te mau nunaa. Haamana‘o atura te Atua ia Babulonia rahi no te horoa ia ’na i te au‘a uaina o to ’na riri rahi. 20  E mou atura te mau motu atoa, e aita e mou‘a faahou. 21  E mai te ra‘i mai, mairi maira i nia i te taata te ûa paari rahi, hoê taleni* to te ofai tataitahi. Faaino atura te taata i te Atua no te ati o te ûa paari, e ati ino mau hoi.

Nota i raro i te api

A hi‘o i te titionare.
Heleni pusuke. A hi‘o i te titionare.
A hi‘o i te titionare.
Aore ra “faaotiraa haavaraa.”
Aore ra “no hitia o te râ mai.”
“Varua viivii” na roto i te reo Heleni.
Heleni Ara Magedona, no roto mai i te hoê ta‘o Hebera o “Mou‘a no Megido” te auraa.
Hoê taleni Heleni, e 20,4 ïa kilo.