Eaha to roto?

Mau faaho'iraa ê

Tapura tumu parau

Ite no Iehova

Tahiti

Bibilia i nia i te reni | HURIRAA O TE AO APÎ O TE MAU PAPAI HELENI KERISETIANO

Apokalupo 14:1-20

HAAPOTORAA O TE MAU TUMU PARAU

  • Te Arenio e na 144 000 (1-5)

  • E toru melahi e ta ratou poroi (6-12)

    • Parau apî oaoa ta te hoê melahi e rere ra na te reva (6, 7)

  • E oaoa tei pohe a vai hoê noa ’i e te Mesia (13)

  • Piti ootiraa i te fenua (14-20)

14  Ite atura vau, e inaha, te Arenio* e tia ra i nia i te mou‘a Ziona, e 144 000 tei papaihia to ’na i‘oa e te i‘oa o to ’na Metua i nia i to ratou rae.  Faaroo ihora vau i te hoê haruru no roto mai i te ra‘i, mai te haruru pape ra e te haruru puai o te patiri. E te haruru ta ’u i faaroo, mai te reo ïa o te tahi mau taata himene e faata‘i ra i ta ratou kinura.  Mai te mea ra e e himene apî ta ratou e himene ra i mua i te terono e i mua i na melahi e maha e na matahiapo, e aita hoê i tia ia himene i tera himene, na 144 000 ana‘e râ o tei hoohia mai te fenua mai.  O te feia teie aita i viivii i te vahine, inaha aita ratou i taoto i te hoê apiti. O te feia teie e pee tamau ra i te Arenio i te mau vahi atoa ta ’na e haere. Ua hoohia mai ratou no roto mai i te huitaata ei hotu matamua pûpûhia i te Atua e i te Arenio.  Aita atoa e haavare i roto i to ratou vaha. Mea hapa ore ratou.  Ite atura vau i te tahi atu melahi e rere ra na te reva, e e parau apî oaoa e te mure ore ta ’na no te faaite atu i te feia e parahi ra i te fenua, i te mau nunaa e opu e reo atoa.  Te parau ra oia ma te reo puai: “A mǎta‘u i te Atua e a faahanahana ia ’na, no te mea ua tae mai te hora o ta ’na haavaraa. No reira, a haamori i te Atua tei hamani i te ra‘i e te fenua e te miti e te mau pape pihaa.”  Na muri maira te tahi atu melahi, o te piti ïa, e na ô ihora: “Ua topa oia! Ua topa o Babulonia rahi, oia tei faainu i te mau nunaa atoa i ta ’na uaina o te faatupu i te hinaaro rahi e rave i* te mau peu taotoraa tia ore!”*  Na muri maira te tahi atu melahi ia raua, o te toru ïa, e na ô ihora ma te reo puai: “Ia haamori noa ’tu te tahi taata i te puaa taehae e to ’na tii e ia tapaohia oia i te tapao o te puaa taehae i nia i to ’na rae aore ra to ’na rima, 10  e inu atoa oia i te uaina anoi-ore-hia o te riri o te Atua, tei niniihia i roto i te au‘a o te riri rahi o te Atua. E haamauiui-atoa-hia oia i te auahi e te ofai ura i mua i te mau melahi mo‘a e i mua i te Arenio. 11  E pee te au auahi o te haamauiui ia ratou i nia e a muri noa ’tu. I te po e te ao aita e faaearaa, e haamauiuihia te feia e haamori ra i te puaa taehae e to ’na tii e te taata atoa ua tapaohia te i‘oa o te puaa taehae i nia i to ’na rae aore ra to ’na rima. 12  E titauhia ïa ia faaoromai tamau te feia mo‘a, oia hoi te feia e haapao ra i te mau faaueraa a te Atua e e pee ra i te faaroo o Iesu.” 13  Faaroo ihora vau i te hoê reo no roto mai i te ra‘i i te parauraa mai: “A papai: Mai teie atu nei, e oaoa te feia tei pohe a vai hoê noa ’i e te Fatu. Oia mau, ta te varua mo‘a ïa e parau, ia faaea ratou i ta ratou mau ohipa e tia ’i, e apee hoi ta ratou i rave ia ratou.” 14  Ite atura vau, e inaha, te hoê ata uouo, e i nia iho i taua ata ra te parahi ra te hoê mai te tamaiti a te taata nei te huru, e hei auro to nia i to ’na upoo e e tipi fefe oi tei to ’na rima. 15  Na roto maira te tahi atu melahi i te nao* o te hiero, a pii atu ai i tei parahi ra i nia iho i te ata ma te reo puai, a na ô ai: “A rave i ta oe tipi fefe e a ooti, no te mea ua tae te hora no te ooti, ua paari roa hoi te maa o te fenua.” 16  Ooti atura tei parahi ra i nia iho i te ata i te maa o te fenua i ta ’na tipi fefe, e ootihia ihora te fenua. 17  Na roto maira te tahi atu melahi i te nao o te hiero e vai ra i nia i te ra‘i, e e tipi fefe oi atoa ta ’na. 18  E na roto maira te tahi atu melahi i te fata, e e mana to ’na i nia i te auahi. Pii atura oia i te melahi e tipi fefe oi ta ’na ma te reo puai, a na ô ai: “A rave i ta oe tipi fefe oi e a haaputu i te mau pupa vine o te fenua, ua para hoi te vine.” 19  Ooti atura te melahi i te fenua i ta ’na tipi fefe, e haaputu maira i te vine o te fenua, e huri atura i roto i te apoo taataahiraa vine rahi o te riri o te Atua. 20  Ua taataahihia te vine i rapae i te oire, e tahe maira te toto no roto mai i taua apoo ra e raea roa a‘era te tavaha o te mau puaarehenua no te hoê atearaa 1 600 setadia.*

Nota i raro i te api

Aore ra “Fanau‘a mamoe.”
Aore ra “ta ’na uaina o te riri no.”
A hi‘o i te titionare.
A hi‘o i te titionare.
E 296 ïa kilometera. Hoê setadia, 185 ïa metera.