Eaha to roto?

Mau faaho'iraa ê

Tapura tumu parau

Ite no Iehova

Tahiti

Bibilia i nia i te reni | HURIRAA O TE AO APÎ O TE MAU PAPAI HELENI KERISETIANO

Apokalupo 13:1-18

HAAPOTORAA O TE MAU TUMU PARAU

  • Te puaa taehae e hitu afii mai roto mai i te miti (1-10)

  • Te puaa taehae e piti tara mai roto mai i te fenua (11-13)

  • Te tii o te puaa taehae e hitu afii (14, 15)

  • Te tapao e te numera o te puaa taehae (16-18)

13  E te tia noa ra oia* i nia i te one tahatai. Ite atura vau i te hoê puaa taehae mai roto mai i te miti i te fauraraa mai, hoê ahuru tara e e hitu afii to ’na, e i nia iho i to ’na mau tara, hoê ahuru ïa hei,* hoê i nia i te tara tataitahi. I nia iho râ i to ’na mau afii, e i‘oa faaino ïa.  Mai te nemera te puaa taehae ta ’u i ite. To ’na râ mau avae, mai to te daba ïa, e to ’na vaha mai to te liona. Horoa maira te teni i to ’na puai e to ’na terono e te mana rahi no te puaa.  Ite atura vau, mai te mea ra e ua pepe roa hoê afii to ’na, ua ora râ taua pepe ra. Pee atura to te fenua atoa i te puaa taehae no to ratou faahiahia ia ’na.  Haamori atura ratou i te teni, no te mea ua horoa oia i te mana no te puaa taehae, e haamori atura ratou i te puaa taehae a na ô ai: “O vai tei au i te puaa taehae ra, e o vai te nehenehe e aro ia ’na?”  Ua horoahia no te puaa taehae te hoê vaha o te parau i te mau parau teoteo e te faaino, e ua horoahia ia ’na te mana no te ohipa e 42 ava‘e.  Hamǎmǎ ’tura te puaa taehae i to ’na vaha no te faaino i te Atua, to ’na i‘oa e to ’na nohoraa, e oia atoa i tei ora ra i nia i te ra‘i.  Vaiihohia ihora oia ia tama‘i i te feia mo‘a e ia upootia i nia ia ratou, e horoa-atoa-hia ’tura no ’na te mana i nia i te mau opu e reo e nunaa atoa.  E te feia atoa e parahi ra i nia i te fenua, e haamori ïa ia ’na. Mai te omuaraa mai â o teie nei ao,* aita hoê a‘e o to ratou i‘oa i papaihia i roto i te otaro o te ora a te Arenio* tei haapohehia ei tusia.  E tari‘a to ’na ra, ia faaroo ïa. 10  Ia faatîtîhia hoê o outou, e faatîtîhia ïa oia. Ia haapohe oia i te taata i te ‘o‘e,* ia pohe ïa oia i te ‘o‘e e tia ’i. O te faaoromai tamau e te faaroo te titauhia i te feia mo‘a. 11  Ite atura vau i te tahi atu puaa taehae mai roto mai i te fenua i te fauraraa mai. E piti tara to ’na mai to te fanau‘a mamoe, paraparau ihora râ mai te hoê teni. 12  E faaohipa taua puaa taehae ra i te mana atoa o te puaa taehae matamua i mua ia ’na. E turai oia i to te fenua ia haamori i te puaa taehae matamua, no ’na hoi te hoê afii tei pepe roa e tei ora râ. 13  E e faatupu oia i te tahi mau ohipa maere rahi, oia atoa te haamairiraa i te auahi mai te ra‘i mai i te fenua nei i mua i te huitaata. 14  Na roto i te mau ohipa maere rahi tei vaiihohia ia ’na ia faatupu i mua i te puaa taehae matamua, te haavare ra oia i te feia e parahi ra i te fenua, a parau atoa ’i ia ratou ia hamani i te tii o te puaa taehae tei tairihia i te ‘o‘e e tei ora faahou mai râ. 15  Vaiihohia ’tura te piti o te puaa taehae ia horoa i te aho* i te tii o te puaa taehae matamua, a nehenehe atu ai teie tii e paraparau e e faaue ia haapohehia te feia atoa aita e haamori ra i taua tii ra. 16  Te faahepo ra oia i te mau taata atoa, te feia riirii e te feia tiaraa teitei, te feia tao‘a rahi e te feia veve, te feia tiamâ e te mau tîtî, ia tapaohia ratou i nia i to ratou rima atau aore ra to ratou rae, 17  e ia ore roa te hoê taata ia hoo mai aore ra ia hoo atu, te taata ana‘e râ ua tapaohia te i‘oa aore ra te numera o te i‘oa o te puaa taehae i nia i to ’na rima atau aore ra to ’na rae. 18  I ǒ nei e titauhia ’i te paari: Ia numera te taata maramarama i te numera o te puaa taehae, e numera taata hoi, 666 ïa to ’na numera.

Nota i raro i te api

Oia hoi te teni.
Aore ra “hei arii.”
Oia hoi a tamariihia ’i Adamu raua Eva.
Aore ra “Fanau‘a mamoe.”
Nehenehe atoa e hurihia “Ia pohe te hoê taata ia ’na i te ‘o‘e.”
Heleni peneuma. A hi‘o i te titionare.