Eaha to roto?

Mau faaho'iraa ê

Tapura tumu parau

Ite no Iehova

Tahiti

Bibilia i nia i te reni | HURIRAA O TE AO APÎ O TE MAU PAPAI HELENI KERISETIANO

Apokalupo 12:1-17

HAAPOTORAA O TE MAU TUMU PARAU

  • Te vahine, te tamarii tamaroa, e te teni (1-6)

  • Aroraa Mikaela i te teni (7-12)

    • Hurihia te teni i raro i te fenua (9)

    • Ua ite te Diabolo e taime poto to ’na e toe ra (12)

  • Hamani ino te teni i te vahine (13-17)

12  Itehia ’tura te hoê ohipa taipe faahiahia roa i nia i te ra‘i: te hoê vahine tei vehîhia* i te mahana, e to raro a‘e te ava‘e i to ’na na avae, e e hei 12 fetia to nia i to ’na upoo,  e ua hapû oia. E te auê ra oia no to ’na mauiui e te mauiui rahi fanau.  Itehia ’tura te tahi atu ohipa taipe i nia i te ra‘i. Inaha, te hoê teni rahi uteute mai te auahi. E hitu afii e e ahuru tara to ’na. E hitu atoa hei* to ’na, hoê i nia i te afii tataitahi.  E te arato ra to ’na aero i te toru o te tuhaa o te mau fetia o te ra‘i, e huri maira i raro i te fenua. E te tia noa ra te teni i mua i te vahine o te fatata i te fanau, ia nehenehe oia e horomii i ta ’na tamarii ia fanau oia.  Fanau maira te vahine i te hoê tamaiti, te hoê tamaroa, o te faatere i te mau nunaa atoa ma te sepeta auri. Afai-oioi-hia ’tura ta ’na tamarii i te Atua ra e i to ’na terono.  Horo ê atura te vahine i te medebara, i reira to te Atua faaineineraa i te hoê vahi no ’na e i reira oia e faatamaahia ’i 1 260 mahana.  Tupu ihora te tama‘i i nia i te ra‘i: aro atura Mikaela* e ta ’na mau melahi i te teni, aro atoa maira te teni e ta ’na mau melahi,  aita râ ratou i upootia.* Aita ’tura e parahiraa faahou to ratou i te ra‘i.  Hurihia ihora i raro te teni rahi, te ophi i tahito ra tei piihia te Diabolo e Satani, o te haavare nei i to te ao atoa nei, ua hurihia mai ïa i raro i te fenua, e ua hurihia mai ta ’na mau melahi i raro na muri ia ’na. 10  Faaroo ihora vau i te hoê reo puai i te ra‘i i te na ôraa: “Teie mai nei te faaoraraa e te puai e te Faatereraa arii a to tatou Atua* e te mana o ta ’na Mesia, no te mea ua hurihia mai i raro tei pari i to tatou mau taeae, o te pari ra ia ratou i te po e te ao i mua i te aro o to tatou Atua! 11  E ua upootia ratou i nia ia ’na maoti te toto o te Arenio* e maoti te poroi ta ratou i faaite, e aita ratou i nounou i to ratou ora* noa ’tu e e pohe ratou. 12  No reira, a oaoa outou e ora ra i nia i te ra‘i! Ua ati râ to te fenua e to te miti, no te mea ua haapouhia te Diabolo ia outou ma te riri rahi, ua ite hoi o ’na e e taime poto to ’na e toe ra.” 13  I to te teni râ iteraa e ua hurihia mai oia i raro i te fenua, hamani ino atura oia i te vahine tei fanau i te tamarii tamaroa. 14  Tera râ, horoahia maira na pererau e piti o te aeto rahi i te vahine ia nehenehe oia e maue ê i te medebara i to ’na ra vahi, i reira oia e faatamaahia ’i hoê tau e e piti tau e e afa tau,* i te atea ê i te ophi. 15  Piha‘e atura te ophi i te pape mai te anavai ra te huru mai roto mai i to ’na vaha, ia raea te vahine i taua anavai ra e ia paremo oia. 16  Tauturu maira râ te fenua i te vahine e hamǎmǎ ihora te fenua i to ’na vaha a horomii atu ai i te anavai ta te teni i piha‘e mai roto mai i to ’na vaha. 17  Hae roa ihora te teni i te vahine, e haere atura e faatupu i te tama‘i i te toea o te huaai* o te vahine, o te haapao ra i te mau faaueraa a te Atua e tei ia ratou ra te ohipa faaiteraa i te parau no Iesu.

Nota i raro i te api

Aore ra “ahuhia.”
Aore ra “hei arii.”
“O vai mai te Atua ra?” te auraa.
Nehenehe atoa e hurihia “ua pau râ o ’na,” oia hoi te teni.
Aore ra “Basileia o to tatou Atua.”
Aore ra “Fanau‘a mamoe.”
Heleni pusuke. A hi‘o i te titionare.
Oia hoi e toru tau e te afa.
“Huero” na roto i te reo Heleni.