Eaha to roto?

Mau faaho'iraa ê

Tapura tumu parau

Ite no Iehova

Tahiti

Bibilia i nia i te reni | HURIRAA O TE AO APÎ O TE MAU PAPAI HELENI KERISETIANO

Apokalupo 11:1-19

HAAPOTORAA O TE MAU TUMU PARAU

  • Na ite e piti (1-13)

    • E tohu ma te ahu oto 1 260 mahana (3)

    • Taparahi-pohe-hia e aita i hunahia te tino (7-10)

    • Faatiahia mai e toru mahana e te afa i muri iho (11, 12)

  • Mairi te piti o te ati, e haere mai te toru (14)

  • Te hitu o te pu (15-19)

    • Faatereraa arii a to tatou Fatu e a ta ’na Mesia (15)

    • E haamouhia te feia e tuino ra i te fenua (18)

11  E horoahia maira ia ’u te hoê aeho mai te raau faito ra te hoho‘a a na ôhia mai ai: “A tia i nia, a faito i te nao* o te hiero o te Atua e te fata e a taio i te feia e haamori ra i roto.  Area te aua i rapaeau i te nao o te hiero, vaiiho noa ïa, eiaha e faito atu, ua horoahia hoi te reira i te mau nunaa, e e taataahi ratou i te oire mo‘a e 42 ava‘e.  E poroi atu vau i ta ’u na ite e piti ia tohu 1 260 mahana ma te ahuhia i te ahu oto.”  O na tumu olive e piti e na mori* e piti na ite e piti, e te tia ra raua i mua i te Fatu o te fenua.  Ia hinaaro te tahi taata e rave ino ia raua, e na roto mai te auahi i to raua vaha e e mou to raua mau enemi i taua auahi ra. Ia hinaaro noa ’tu te tahi taata e rave ino ia raua, mea na reira ïa oia e haapohehia ’i.  E mana to raua no te opani i te ra‘i ia ore te ûa ia mairi i te mau mahana e tohu ai raua, e e mana to raua no te faariro i te pape ei toto e no te tairi i te fenua i te mau ati huru rau atoa i te mau taime atoa e hinaaro ai raua.  Ia oti ta raua pororaa, e tama‘i te puaa taehae tei na roto mai i te abuso ia raua e e upootia i nia ia raua, e e taparahi pohe ia raua.  E vai noa to raua tino i te aroâ o te oire rahi parau-taipe-hia Sodoma e Aiphiti, i reira atoa to raua Fatu i te haapoheraahia i nia i te pou.  E e hi‘o noa to te mau opu e reo e nunaa atoa i to raua tino e toru mahana e te afa, e eita ratou e faatia ia hunahia to raua tino. 10  E e oaoa te feia e parahi ra i nia i te fenua e e arearea ratou. E hapono atoa ratou i te ô te tahi i te tahi, no te mea ua haamauiui teie na peropheta e piti ia ratou. 11  Hope a‘era na mahana e toru e te afa, e ô atura te aho* ora no ǒ mai i te Atua i roto ia raua, e tia a‘era raua i nia, e mǎta‘u roa a‘era te feia i ite ia raua. 12  Faaroo a‘era raua i te hoê reo puai no te ra‘i mai i te na ôraa ia raua: “Haere mai i nia nei.” Haere a‘era raua i nia i te ra‘i na roto i te ata e ite atura* to raua mau enemi ia raua. 13  Tupu ihora te hoê aueueraa fenua rahi i taua hora ra, e topa ’tura te ahuru o te tuhaa o te oire. E 7 000 taata tei pohe i taua aueueraa fenua ra. Mehameha ihora te feia e toe ra e faahanahana ’tura ratou i te Atua o te ra‘i. 14  Ua mairi te piti o te ati. Inaha, te haere oioi mai ra te toru o te ati. 15  Faaoto maira te hitu o te melahi i ta ’na pu. Faaroohia a‘era te tahi mau reo puai no te ra‘i mai i te na ôraa: “Ua riro te faatereraa o te ao i te Faatereraa arii a to tatou Fatu* e a ta ’na Mesia, e e faatere oia ei Arii e a muri noa ’tu.” 16  Tipapa ihora na matahiapo e 24 o te parahi ra i nia i to ratou terono i mua i te aro o te Atua e haamori atura i te Atua, 17  a na ô ai: “Te haamauruuru nei matou ia oe te Atua ra o Iehova,* te Mana hope, o te vai nei e o tei vai na, no te mea ua faaohipa oe i to oe mana rahi e ua haamata i te faatere ei Arii. 18  Ua riri râ te mau nunaa atoa, e ua faaite mai oe i to oe riri, e ua tae mai te tau faataahia no te haava i tei pohe e no te haamaitai i ta oe mau tavini te mau peropheta e te feia mo‘a, te feia riirii e te feia tiaraa teitei e mǎta‘u ra i to oe i‘oa, e no te haamou i te feia e tuino ra i te fenua.” 19  Ua matara te nao o te hiero o te Atua i nia i te ra‘i, e ua itehia te afata o ta ’na faufaa i roto i te nao o to ’na hiero. Anapa maira te uira e haruru maira te patiri e te reo atoa e aueue ihora te fenua e mairi maira te ûa paari rahi.

Nota i raro i te api

A hi‘o i te titionare.
E mori avae auro teie e hitu amaa.
Heleni peneuma. A hi‘o i te titionare.
Aore ra “e hi‘o noa ’tura.”
Aore ra “Basileia o to tatou Fatu.”
A hi‘o i te titionare.