Eaha to roto?

Mau faaho'iraa ê

Tapura tumu parau

Ite no Iehova

Tahiti

Bibilia i nia i te reni | HURIRAA O TE AO APÎ O TE MAU PAPAI HELENI KERISETIANO

Apokalupo 1:1-20

HAAPOTORAA O TE MAU TUMU PARAU

  • Heheuraa no ǒ mai i te Atua na roto ia Iesu (1-3)

  • Aroharaa i na amuiraa e hitu (4-8)

    • “O vau te Alepha e te Omega” (8)

  • Ioane i arataihia e te varua mo‘a i te mahana o te Fatu (9-11)

  • Orama no nia ia Iesu tei faahanahanahia (12-20)

1  Heheuraa* a Iesu Mesia, ta te Atua i horoa ’tu ia ’na no te faaite i ta ’na mau tavini i te mau mea e fatata i te tupu. Ua tono mai Iesu i ta ’na melahi e ua faaite mai na roto ia ’na i taua mau mea ra ei taipe i ta ’na ra tavini o Ioane,  tei faaite papu i te parau ta te Atua i horoa e te parau ta Iesu Mesia i faaite, oia hoi te mau mea atoa ta ’na i ite.  E oaoa te taata e taio haapuai e te feia e faaroo i teie parau tohu e e haapao i tei papaihia i roto, ua fatata hoi te tau faataahia.  O Ioane i na amuiraa e hitu i te fenua Asia: Ei ia outou ra te hamani maitai rahi e te hau no ǒ mai i “te Atua e vai nei e i vai na e e haere mai ra,” e no ǒ mai i na varua mo‘a* e hitu e vai ra i mua i to ’na terono,  e no ǒ mai ia Iesu Mesia, “te Ite haapao maitai,” “te matahiapo tei faatiahia mai te pohe mai,” e “te Arii o te mau arii o te fenua.” O ’na e here nei ia tatou e tei faatiamâ ia tatou i ta tatou mau hara i to ’na iho toto,  e tei faariro ia tatou ei faatereraa arii,* ei tahu‘a na to ’na Atua e Metua, ei ia ’na te hanahana e te mana e a muri noa ’tu. Amene.  Inaha, e haere mai o ’na na nia i te mau ata, e e ite te mau mata atoa ia ’na, te feia atoa tei patia ia ’na. E tupaipai hoi te mau opu atoa o te fenua nei i to ratou ouma ma te oto no ’na. E tupu iho â te reira. Amene.  “O vau te Alepha e te Omega,”* ta te Atua ra o Iehova* ïa e parau ra, “te Atua e vai nei e i vai na e e haere mai ra, te Mana hope.”  O vau o Ioane, to outou taeae, hoê â hoi to tatou hamani-ino-raahia e faaoromai-tamau-raa e o Iesu atoa e hoê â atoa hoi to tatou apitiraa i roto i te faatereraa arii, tei te motu o Patamo vau no to ’u paraparauraa no nia i te Atua e to ’u faaiteraa i te parau no Iesu. 10  Arataihia ihora vau e te varua mo‘a i te mahana o te Fatu ra, e faaroo atura vau i muri mai ia ’u i te hoê reo puai mai te oto o te pu, 11  e na ô ra: “Ta oe e ite, a papai ïa i roto i te hoê otaro, a hapono atu ai i na amuiraa e hitu: i Ephesia, i Semurina, i Peregamo, i Tuatira, i Saradi, i Philadelephia e i Laodikea.” 12  Fariu a‘era vau no te ite o vai te paraparau mai ra ia ’u, e i to ’u fariuraa, ite ihora vau e hitu mori auro,* 13  e i ropu i na mori, te hoê ïa mai te tamaiti a te taata nei te huru. E ahu roa to ’na e tae roa i te avae e ua hatuahia to ’na ouma i te hatua auro. 14  To ’na upoo e to ’na rouru, mea uouo ïa mai te huruhuru mamoe uouo e mai te hiona. To ’na na mata, mai te ura auahi ïa. 15  To ’na na avae, mai te veo anaana ïa i roto i te umu. E to ’na reo, mai te haruru pape e rave rahi ïa. 16  E hitu fetia i roto i to ’na rima atau, e ‘o‘e mata piti oi e te roa te faura mai ra mai roto mai i to ’na vaha, e to ’na hoho‘a mata,* mai te mahana ïa te anaana i te avatea. 17  I to ’u iteraa ’tu ia ’na, topa ihora vau i to ’na pae avae mai te huru ra e ua pohe au. Tuu ihora o ’na i to ’na rima atau i nia iho ia ’u e na ô maira: “Eiaha e mǎta‘u. O vau te Matamua e te Hopea, 18  o vau teie e ora nei. I pohe na vau, inaha râ, te ora nei au e a muri noa ’tu, e tei ia ’u nei nau taviri o te pohe e o te Apoo.* 19  No reira, a papai i te mau mea ta oe i ite, e te mau mea e tupu nei, e te mau mea e tupu i muri a‘e i teie. 20  Teie te auraa o te parau huna mo‘a o na fetia e hitu ta oe i ite i roto i to ’u rima atau e o na mori auro e hitu: Na fetia e hitu, o te mau melahi* ïa o na amuiraa e hitu. E na mori e hitu, o na amuiraa ïa e hitu.

Nota i raro i te api

“Apokalupo” na roto i te reo Heleni.
Aore ra “puai ohipa o te Atua.”
Aore ra “basileia.”
Te Alepha e te Omega, o te reta matamua ïa e te reta hopea o te piapa Heleni.
A hi‘o i te titionare.
E mori avae auro teie e hitu amaa.
Aore ra “aro.”
Aore ra “Hade,” oia hoi te menema o te huitaata. A hi‘o i te titionare.
Aore ra “vea.”