Faatanoraa no te "mode accessibilité"

Search

Maiti te reo

Mau faaho'iraa ê

Eaha to roto?

Ite no Iehova

Tahiti

E faahepo anei te mau Ite no Iehova i te taata ia taui i ta ratou haapaoraa?

E faahepo anei te mau Ite no Iehova i te taata ia taui i ta ratou haapaoraa?

Eita roa ’tu. Teie tei papaihia i roto i Te Pare Tiairaa, te vea matamua roa ta matou e pia nei: “Mea ino te faaheporaa i te taata ia taui i ta ratou haapaoraa.” * Teie te mau tumu e ore ai matou e faahepo i te taata:

  • Aita Iesu i faahepo a‘enei i te taata ia farii i ta ’na mau haapiiraa. Ua ite oia e mea iti te taata e faaroo i ta ’na poroi. (Mataio 7:13, 14) I te huru-ê-raa te tahi o ta ’na mau pǐpǐ i ta ’na mau parau, aita o ’na i faahepo ia ratou ia faaea mai, ua vaiiho râ ia haere.—Ioane 6:60-62, 66-68.

  • Ua haapii Iesu i ta ’na mau pǐpǐ eiaha e turai ia vetahi ê ia taui i ta ratou mau tiaturiraa. Ia imi ratou i te mau taata e farii i te parau apî oaoa o te Basileia, eiaha râ e faahepo i te feia eita e hinaaro i te reira.—Mataio 10:7, 11-14.

  • Te haamoriraa ma te aau atoa ana‘e ta te Atua e farii. Aita ïa e faufaa ia faahepo i te taata ia taui i te haapaoraa.—Deuteronomi 6:4, 5; Mataio 22:37, 38.

E faatauiraa haapaoraa anei ta matou ohipa?

Parau mau, e haaparare matou i te poroi o te Bibilia e ati a‘e te fenua, “i te vahi taata, e i tera fare, i tera fare,” ia au i te faaueraa a te Bibilia. (Ohipa 1:8; 10:42; 20:20) E mai te mau Kerisetiano matamua, i te tahi taime, e parihia matou i te faatauiraa i te haapaoraa ma te ofati i te ture. (Ohipa 18:12, 13) Mea hape râ teie mau pariraa. Eita roa ’tu matou e tamata i te faahepo i te taata ia tiaturi atoa i ta matou mau tiaturiraa. Mea tia râ ia taa te taata eaha ta matou e tiaturi nei. I muri iho, e nehenehe ïa ratou e maiti i ta ratou e hinaaro e rave.

Eita matou e faahepo i te taata ia taui i te haapaoraa, eita atoa matou e rave i te ohipa poritita a parau atu ai e e ohipa faaroo te reira. Eita matou e peta i te taata ma te horoa ’tu i te tahi mau tauihaa aore ra tiaraa. E ere matou mai vetahi e parau nei e e Kerisetiano ratou, o te faatura ore nei râ i te Mesia ma te rave i teie mau peu. *

E nehenehe anei ta te hoê taata e taui i te haapaoraa?

Ua faarue te peropheta Aberahama i te haapaoraa a to ’na mau fetii

E, te faaite ra te Bibilia e e tiamâraa to te taata e taui i ta ratou haapaoraa. Te faahiti ra hoi te Bibilia e rave rahi taata tei maiti eiaha e pee i te haapaoraa a to ratou fetii, e haamori râ i te Atua mau ma te aau tae. O Aberahama, Ruta, te tahi mau taata no Ateno e te aposetolo Paulo vetahi tei na reira. (Iosua 24:2; Ruta 1:14-16; Ohipa 17:22, 30-34; Galatia 1:14, 23) Te faaite atoa ra te Bibilia e e tiamâraa to te taata e rave i te faaotiraa tano ore e faarue i te haamoriraa fariihia e te Atua.—Ioane 1, 2:19.

Te tiamâraa e taui i te haapaoraa, ua turuhia ïa e te Parau faaite i te tiaraa o te taata na te ao nei, piihia e te Nunaa Amui “te niu o te ture nunaa rau no te tiaraa o te taata.” E taiohia i roto i teie parau faaite e “e tiamâraa to te taata atoa e taui i te haapaoraa aore ra tiaturiraa” e “e imi, e apo mai, e e horoa i te tahi mau haamaramaramaraa e mana‘o,” te mau mana‘o faaroo atoa. * E titau-atoa-hia râ ia faatura ratou i te tiamâraa o vetahi ê e tapea i ta ratou mau tiaturiraa e e patoi i te mau mana‘o aita e tuati ra e to ratou.

E faatura-ore-raa anei i te fetii aore ra i te mau peu tumu te tauiraa i te haapaoraa?

E ere. Te faaitoito ra hoi te Bibilia ia faatura i te mau taata atoa, noa ’tu e e haapaoraa ê ta ratou. (Petero 1, 2:17) E pee atoa te mau Ite no Iehova i te faaueraa Bibilia e faatura i to ratou mau metua, noa ’tu e e tiaturiraa ê ta ratou.—Ephesia 6:2, 3.

E ere râ pauroa te taata te farii i te mana‘o o te Bibilia. Ua parau te hoê vahine tei paari i te fenua Zambie: “I roto i to ’u tuhaa oire . . . ia taui te hoê i ta ’na haapaoraa, e au te reira i te hoê ohipa taivaraa, te taivaraa i to ’na utuafare e to ’na tuhaa oire.” Ua faaruru teie vahine i teie tupuraa i to ’na taurearearaa, ua haamata hoi oia i te haapii i te Bibilia e te mau Ite no Iehova e ua faaoti, i muri rii noa ’‘e, e taui i ta ’na haapaoraa. Teie ta ’na i parau: “Mea pinepine to ’u nau metua i te parau mai e ua riri roa raua ia ’u no te taivaraa ia raua. Mea fifi roa teie tupuraa no ’u, mea faufaa roa hoi no ’u ia farii raua i ta ’u faaotiraa. . . . To ’u maitiraa e tapea i to ’u taiva ore ia Iehova, eiaha râ e pee i te mau peu tumu faaroo, e ere ïa te auraa e te taiva nei au i to ’u fetii.” *

^ par. 2 A hi‘o i Te Pare Tiairaa o te 1 no Tenuare 2002, api 12, paratarafa 15.

^ par. 8 Ei hi‘oraa, i te area matahiti 785, ua haamana Charlemagne i te hoê faaueraa e haapohe i te mau taata no Saxe o tei patoi ia bapetizohia ratou ei Kerisetiano. I roto atoa i te Faaauraa parau no te hau i Augsbourg i te matahiti 1555 tei tarimahia e te mau Katolika e Porotetani i te Hau emepera mo‘a Roma, ua faaotihia e ia riro te faatere o te fenua taitahi ei Katolika Roma aore ra ei Porotetani e pee ra i te mau haapiiraa a Luther. Te mau taata atoa o te tuhaa fenua a tera aore ra tera faatere, e pee atoa ïa i ta ’na haapaoraa. Aita ana‘e, e titauhia ïa ia haere ratou e ora i te tahi atu vahi.

^ par. 11 Te vai atoa ra tera mau tiaraa i roto i te Pǎpǎ ture Afirika o te tiaraa o te taata e o te nunaa, te Faaauraa parau Marite no te tiaraa o te taata e ta ’na hopoia, te Pǎpǎ ture Arabia o te tiaraa o te taata i te matahiti 2004, te Faaauraa parau no te tiaraa o te taata a te taatiraa o te mau nunaa Asia apatoa hitia o te râ, te Pǎpǎ ture Europa no te tiaraa o te taata, e te Faaauraa parau nunaa rau no te tiaraa tivira e poritita. Tera râ, noa ’tu e te parau nei te tahi mau nunaa e e haamana ratou i tera mau tiaraa, aita ratou e tapea ra i ta ratou parau.

^ par. 14 O Iehova te i‘oa o te Atua mau, mai tei papaihia i roto i te Bibilia.

No te ite atu â

E faataa ê anei te mau Ite no Iehova i te mau utuafare?

I te tahi taime, ua parihia te mau Ite no Iehova i te faataa ê i te mau utuafare. O te mau Ite iho â anei te tumu o te mau fifi?

Eaha te tupu i nia i te mau haapaoraa?

E tahoê anei te taata i te hoê mahana no te haamori i te Atua mau hoê roa?