Faatanoraa no te "mode accessibilité"

Search

Maiti te reo

Mau faaho'iraa ê

Eaha to roto?

Ite no Iehova

Tahiti

No te aha te mau Ite no Iehova e ore ai e faatupu i te Noela?

No te aha te mau Ite no Iehova e ore ai e faatupu i te Noela?

Mana‘o hape matauhia

Tei faaroo-pinepine-hia: E ore te mau Ite no Iehova e faatupu i te Noela no te mea aita ratou e tiaturi ra ia Iesu.

Te mea mau: Ei Kerisetiano, te tiaturi nei matou e o Iesu Mesia ana‘e te faaora i te taata.—Ohipa 4:12.

Tei faaroo-pinepine-hia: Ma te haapii eiaha e faatupu i te Noela, te faataa nei outou i te mau utuafare.

Te mea mau: Mea faufaa iho â no matou te utuafare, te faaohipa nei ïa matou i te Bibilia ia piri atu â te mau taairaa.

Tei faaroo-pinepine-hia: I Noela hoi e itehia ’i te aau horoa noa, te hau i nia i te fenua e te hamani maitai i te taata.

Te mea mau: I te mau mahana atoa matou e tutava ’i i te faaite i te aau horoa e te faatupu i te hau. (Maseli 11:25; Roma 12:18) Te pee nei ïa matou i ta Iesu i faaue ia putuputu e ia poro matou: “I horoa-noa-hia mai ta outou, e horoa noa hoi outou.” (Mataio 10:8) Hau atu â, te poro ra matou e o te Basileia o te Atua ana‘e te ravea e tupu ai te hau i te fenua nei.—Mataio 10:7.

No te aha te mau Ite no Iehova e ore ai e faatupu i te Noela?

  • Ua faaue Iesu ia haamana‘ohia to ’na poheraa eiaha râ to ’na fanauraa.—Luka 22:19, 20.

  • Aita ta Iesu mau aposetolo e te mau Kerisetiano matamua i faatupu i te Noela. Ia au i te hoê buka ite rahi (New Catholic Encyclopedia), “ua haamauhia te Oroa fanauraa o Iesu i te area matahiti 243 [o to tatou tau],” hau atu ïa i te hoê senekele i muri a‘e i te poheraa o te aposetolo hopea.

  • Aita e haapapuraa e ua fanauhia Iesu i te 25 no Titema; aita te Bibilia e faaite ra i to ’na mahana fanauraa.

  • I te mea e no ǒ mai te Noela i te ta‘ere e peu a te mau nunaa, no matou, eita te Atua e farii i te reira.—Korinetia 2, 6:17.

Eaha hoi te fifi ia faatupu i te oroa Noela?

E faatupu noa iho â e rave rahi i te Noela noa ’tu e ua ite ratou no ǒ mai te reira i te mau nunaa etene e aita e tuea ra i te Bibilia. E na ô paha ïa ratou: “No te aha te mau Ite no Iehova e ore ai e rave mai te rahiraa? Eaha hoi te fifi?”

Te faaitoito maira te Bibilia ia feruri maite a faaoti atu ai no tatou iho e ia haafaufaa i te parau mau. (Roma 12:1, 2; Ioane 4:23, 24) No tatou, mea faufaa iho â te mana‘o o vetahi ê. O te mau faaueraa Bibilia râ ta tatou e haapao noa ’tu e e au-ore-hia mai.

Noa ’tu e aita tatou e faatupu ra i te Noela, e tiamâraa to te taata ia maiti e na reira anei aore ra aita. Na ratou iho â e rave i te faaotiraa. E faatura ana‘e atu ïa.