Faatanoraa no te "mode accessibilité"

Search

Maiti te reo

Mau faaho'iraa ê

Eaha to roto?

Ite no Iehova

Tahiti

No te aha eita te mau Ite no Iehova e faatupu ai i te mau oroa mahana fanauraa?

No te aha eita te mau Ite no Iehova e faatupu ai i te mau oroa mahana fanauraa?

Eita te mau Ite no Iehova e faatupu i te mau oroa mahana fanauraa, no te mea te tiaturi nei ratou e e mea au ore na te Atua i teie mau oroa. Noa ’tu e aita te Bibilia e faataa roa ra ia ore e faatupu i te mau oroa mahana fanauraa, e tauturu râ te reira ia tatou ia feruri i nia i te tahi mau tupuraa e ia taa i to te Atua mana‘o. E hi‘opoa mai tatou e maha tuhaa e te mau faaueraa ta te Bibilia e faataa ra.

  1. No roto mai te mau oroa mahana fanauraa i te haapiiraa etene. Te faataa ra te hoê buka nohea mai teie mau oroa: te mana‘o ra vetahi e ia faatupuhia te oroa mahana fanauraa o te hoê taata, “e nehenehe te mau varua ino e haafifi ia ’na,” oia atoa “na roto i te taeraa mai o to ’na mau hoa e i ta ratou mau parau maitatai, e paruru ïa te reira ia ’na maoti te oroa mahana fanauraa.” (Funk & Wagnalls Standard Dictionary of Folklore, Mythology, and Legend) Te faataa ra te hoê buka e i tahito ra “mea faufaa ia haamau i te mau tarena no te mau mahana fanauraa ia noaa mai te hoê tohuraa tapao” o tei niuhia i te “ihi peu hi‘o fetia ma te peu tahutahu.” Te faataa atoa ra teie buka e “ia au i te tiaturiraa a te taata, e mana tahutahu te mau mori hinu faaohipahia no te oroa mahana fanauraa no te faatupu i te mau mea hinaarohia.”—Peu tumu e tutuu o te mau oroa fanauraa (Beretane).

    Ia au i te Bibilia, eiaha roa ’tu râ tatou e faaohipa i te peu tahutahu atoa, te peu hi‘ohi‘o, aore ra “ia na reira.” (Deuteronomi 18:14; Galatia 5:19-21) No reira, i faahapa ’i te Atua i te oire tahito ra o Babulonia, no te raveraa ïa te mau taata no ô i te peu hi‘o fetia, mai te peu hi‘ohi‘o ra te huru. (Isaia 47:11-15) Eita te mau Ite no Iehova e imi roa nohea mai te mau peu tumu atoa. Ia horoa râ te Bibilia i te mau haapapuraa tano, e haapao maite ratou i te reira.

  2. Aita te mau Kerisetiano o te senekele matamua i faatupu i te oroa fanauraa. Te parau ra te hoê buka ite rahi no nia i te mau Kerisetiano o te senekele matamua, “e haapiiraa etene te oroa mahana fanauraa no ratou.” (The World Book Encyclopedia) Te faaite ra te Bibilia e mea titauhia ia pee te mau Kerisetiano atoa i te hi‘oraa o te mau aposetolo e te tahi atu mau pǐpǐ o ta Iesu i haapii tia ’tu.—Tesalonia 2, 3:6.

  3. Hoê noa oroa ta te mau Kerisetiano e titauhia ia faatupu, o te poheraa o Iesu, eiaha râ te mahana fanauraa. (Luka 22:17-20) Eita tatou e maere, te parau ra te Bibilia, “e maitai ae . . . te mahana o te poheraa i te mahana o te fanauraa.” (Koheleta 7:1, Te Bibilia Mo’a V.C.J.S., 1976) I te pae hopea o to ’na oraraa i te fenua, ua haamau Iesu i te hoê i‘oa maitai i mua i te Atua. No reira, mea faufaa roa ’tu â te mahana o to ’na poheraa i te mahana o to ’na fanauraa.—Hebera 1:4.

  4. Aita roa ’tu te Bibilia e faahiti ra e ua faatupu hoê noa ’‘e tavini a te Atua i to ’na mahana fanauraa. Aita te reira i haamoehia. Ua faahiti iho â râ te Bibilia e piti oroa mahana fanauraa no te mau taata aita e tavini ra i te Atua. Te faatia râ na oroa e piti e ua riro te reira ei tupuraa ino mau.—Genese 40:20-22; Mareko 6:21-29.

Te faaerehia ra anei te mau tamarii a te mau Ite no Iehova no te oreraa e faatupu i te mau oroa?

Mai te mau metua maitai atoa, te faaite ra te mau Ite no Iehova i te here i ta ratou mau tamarii i te roaraa o na matahiti: e horoa ratou i te mau tao‘a horoa na ta ratou mau tamarii e e faanaho i te mau taime oaoa mau e te mau hoa. Te tutava nei ratou i te pee i te hi‘oraa tia roa o te Atua o te horoa ma te aau tae i te mau mea maitatai na ta ’na mau tamarii. (Mataio 7:11) Aita te mau tamarii a te mau Ite no Iehova e faaerehia ra. Te haapapu ra teie mau parau:

  • “Mea au a‘e ia horoahia mai te hoê tao‘a horoa aita ana‘e oe e tiai mau ra.”—Tammy, 12 matahiti.

  • “Noa ’tu e aita ta ’u e tao‘a horoa i to ’u mahana fanauraa, e hoo mai iho â to ’u na metua i te tahi atu taime. Mea au a‘e na ’u mai tera no te mea e maere au.”—Gregory, 11 matahiti.

  • “Te mana‘o ra anei oe e ahuru minuti, te tahi mau monamona e te hoê himene, e oroa tera? Ia haere mai oe i to ’u fare, e ite ïa oe eaha mau na te hoê oroa!”—Eric, 6 matahiti.

No te ite atu â

Eaha te maitai o te mau ture a te Atua?

Ua faataa Iesu no te aha e hinaarohia ’i te aratairaa e eaha na faaueraa Bibilia faufaa roa.