Eaha to roto?

No te aha te mau Ite no Iehova e ore ai e faatupu i te tahi mau oroa?

No te aha te mau Ite no Iehova e ore ai e faatupu i te tahi mau oroa?

 E nafea te mau Ite no Iehova e ite ai e e farii te Atua i te tahi oroa aore ra aita?

Hou a rave ai i te hoê faaotiraa no nia i te tahi oroa, e hi‘o te mau Ite no Iehova i te mana‘o o te Bibilia. Te ofati mau ra te tahi mau oroa i te mau faaueraa tumu Bibilia. I roto i tera tupuraa, eita te mau Ite no Iehova e apiti atu. No te tahi atu mau oroa, na te Ite no Iehova tataitahi e rave i ta ’na iho faaotiraa ma te faaitoito i te “tapea noa i te hoê mana‘o haava maitai i te aro o te Atua e o te taata.”—Ohipa 24:16.

Teie te tahi mau uiraa ta te mau Ite no Iehova e feruri hou a faaoti ai e faatupu i te tahi oroa aore ra eiaha e faatupu i te reira. *

  • Ua niuhia anei te oroa i nia i te hoê haapiiraa o te ore e tu i te Bibilia?

    Aratairaa Bibilia: “‘A haere ê mai i rapae mai rotopu mai ia ratou, e a faataa ê mai ia outou’ te na reira mai ra Iehova, ‘atira i te tapea i te mea viivii.’”—Korinetia 2, 6:15-17.

    No te faataa ê roa mai ia ratou i te mau haapiiraa viivii i te pae varua, oia hoi o te ore e tuati i ta te Bibilia e parau ra, eita te mau Ite no Iehova e faatupu i te mau oroa e itehia ’i te mau mea i muri nei.

    Te mau oroa niuhia i nia i te tiaturiraa aore ra te haamoriraa i te tahi atu mau atua. Ua parau Iesu: “O Iehova to oe Atua ta oe e haamori, e ia ’na ana‘e e pûpû ai oe i te hoê taviniraa mo‘a.” (Mataio 4:10) Te pee nei te mau Ite no Iehova i teie faaararaa. Eita ïa ratou e faatupu i te Noela, te Pakate aore ra te 1 no Me, i te mea ua niuhia teie mau oroa i nia i te haamoriraa i te mau atua taa ê atu ia Iehova. Eita atoa ratou e apiti i teie mau oroa i muri nei.

    • Kwanzaa. No roto mai te i‘oa Kwanzaa “i te hoê parau reo Swahili (matundaya kwanza) o ‘oho matamua’ te auraa. No roto mai teie oroa i te mau oroa auhuneraa matamua faatupuhia i Afirika.” (Encyclopedia of Black Studies) No vetahi, aita tera oroa i taaihia i te faaroo. Te faataa nei râ te hoê buka ite rahi i tera oroa i te hoê oroa no Afirika i reira te mau oho matamua “e pûpûhia ’i i te mau atua e te mau tupuna no te haamauruuru ia ratou.” Te na ô nei â: “Hoê â huru feruriraa haamauruuru te itehia i roto i te Kwanzaa. Haamauruuru no te mau maitai o te oraraa vaiihohia mai e te mau tupuna.”—Encyclopedia of African Religion.

      Kwanzaa

    • Te oroa faatupuhia i Tetepa aore ra Atopa. E parauhia teie oroa fête de la mi-automne i reira e “faahanahanahia ’i te ruahine o te ava‘e.” (Holidays, Festivals, and Celebrations of the World Dictionary) I tera oroa, “e tuturi te mau vahine o te fare i mua i te ruahine.”—Religions of the World—A Comprehensive Encyclopedia of Beliefs and Practices.

    • Norouz (Nowruz). ‘No roto mai teie oroa i te haapaoraa a Zoroastre. Hoê teie o te mau mahana mo‘a roa ’‘e o te tarena o tera haapaoraa. I tera mahana, i te avatea, e faatupuhia te oroa no te ho‘iraa mai o te varua o te avatea parauhia Rapithwin. Ua mana‘ohia hoi e ua tapea te varua o te tau to‘eto‘e ia ’na i raro a‘e mai i te fenua i te mau ava‘e to‘eto‘e.’—United Nations Educational, Scientific and Cultural Organization.

    • Shab-e-Yalda. Ia au i te hoê buka no nia i te fenua Peresia, “ua taai-mau-hia teie oroa i te haamoriraa a Mithra,” te atua o te maramarama. (Sufism in the Secret History of Persia) Te mana‘o atoa nei vetahi e ua taaihia teie oroa i te haamoriraa i te mau atua o te mahana a to Roma e to Heleni. *

    • Thanksgiving. Mai te Kwanzaa, ua niuhia teie oroa i nia i te mau oroa auhuneraa tahito o tei faahanahana i te mau atua rau. A nuu ai te tau, “ua ravehia teie mau peu tutuu e te Ekalesia.”—A Great and Godly Adventure—The Pilgrims and the Myth of the First Thanksgiving.

    Te mau oroa tei niuhia i nia i te peu tahutahu aore ra te tiaturiraa i te manuïa. Te parau ra te Bibilia no te feia “ua faanahonaho i te amuraa na Gada” e tei rotopu ratou i te feia “tei faarue ia Iehova.” (Isaia 65:11) Eita ïa te mau Ite no Iehova e faatupu i te mau oroa i muri nei:

    • Te po o te Kupala. Te na ô ra te hoê buka: “Ia au i tei tiaturihia, i te po o te Kupala, e matara mai te mana o te natura. O te feia manuïa e te itoito noa te nehenehe e haavî i te reira.” (The A to Z of Belarus) I te omuaraa, e oroa teie no ǒ mai i te nunaa ěê te faatupuhia i Tiunu. Teie râ, ia au i te tahi atu buka ite rahi, ‘i to te feia nunaa ěê fariiraa i te Kerisetianoraa, ua amuihia tera oroa i te oroa a te Ekalesia parauhia Saint-Jean aore ra te oroa a Ioane Bapetizo.’—Encyclopedia of Contemporary Russian Culture.

    • Matahiti apî Tinito aore ra Matahiti apî Korea. “I tera taime o te matahiti, te mea faufaa a‘e no te mau utuafare e te hoa, o te fana‘oraa ïa i te hoê matahiti manuïa, te faahanahanaraa i te mau atua e te mau varua e te euheraa ia manuïa te mau mea atoa i te matahiti apî.” (Mooncakes and Hungry Ghosts—Festivals of China) Hoê â huru no te Matahiti apî Korea. O te “haamoriraa i te tupuna, te raveraa i te mau mea no te tiahi i te mau varua ino e no te fana‘o i te hoê matahiti manuïa, e te raveraa i te mau tapao [e au ra o te faaite mai i te ananahi] no te ite mai te aha te huru o te matahiti e haere mai ra.”—Encyclopedia of New Year’s Holidays Worldwide.

      Matahiti apî Tinito

    Te mau oroa niuhia i nia i te mana‘o e te vai ra te hoê mea e ora ’tu ia pohe tatou. Mea papu maitai ta te Bibilia e parau ra, aita e mea pohe ore te ora ’tu i muri a‘e i te pohe. (Ezekiela 18:4) Eita ïa te mau Ite no Iehova e faatupu i te mau oroa i muri nei o te paturu ra hoi i te tiaturiraa e e ora ’tu te tahi mea i roto i te taata ia pohe oia:

    • Te mahana o te feia pohe. Ia au i te hoê buka ite rahi (New Catholic Encyclopedia), e mahana teie no te ‘haamana‘o i te feia taiva ore tei pohe. I te matahiti 500 e tae atu 1500, i mana‘ohia na e i tera mahana e nehenehe te feia i roto i te vahi tamâraa hara e fa i te taata tei haamauiui na ia ratou ma te rave i te huru o te hoê vahine tahutahu, o te animara parauhia crapaud e te vai ra ’tu â.’

    • Te oroa o Qingming (Qingming Jie) e te oroa tupapau. Te fa o na oroa e piti, o te faahanahanaraa ïa i te tupuna. Ia au i te hoê buka, i tera mahana, “e tutuihia te maa, te inu e te moni ia ore te feia pohe ia poia, ia poihâ e ia ere i te moni.” (Celebrating Life Customs Around the World—From Baby Showers to Funerals) Te parau nei â teie buka e te tiaturi nei te feia apiti e “i te oroa tupapau, i te po atiraa ava‘e iho â râ, e itehia te taairaa taa ê i rotopu i te feia pohe e te feia ora. Mea faufaa roa ïa ia tamǎrû i te feia pohe e ia faahanahana i te mau tupuna.”

    • Te Chuseok. Te faataa nei te hoê buka e i tera oroa “e pûpûhia te maa e te uaina i te feia pohe. . . . Ua niuhia te reira i nia i te tiaturiraa e te vai ra te hoê mea e ora ’tu ia pohe tatou.”—The Korean Tradition of Religion, Society, and Ethics.

    Te mau oroa tei taaihia i te peu tahutahu. Te na ô ra te Bibilia no nia i te feia e ohipa ra ei “pifao, e te hi‘o ata, e tei imi i te tapao, e te hi‘ohi‘o, e te hebere, e te feia imi i te varua ino, e te taura, e te feia uiui i tei pohe ra . . . e feia faufau ïa na Iehova.” (Deuteronomi 18:10-12) No te vai viivii ore noa i te peu tahutahu, te peu hi‘o fetia atoa, eita te mau Ite no Iehova e faatupu i te Halloween e te mau oroa i muri nei:

    • Te matahiti apî a te mau cinghalais e tamoul. ‘I roto i te mau peu matauhia taaihia i tera mahana, e ravehia te tahi mau mea i te hoê taime taa maitai e manuïa ’i oe ia au i te feia hi‘o fetia.’—Encyclopedia of Sri Lanka.

    • Songkran. No roto mai te i‘oa o teie oroa no Asia i ‘te hoê ta‘o reo Sanskrit o tereraa aore ra tauiraa te auraa. Ua riro teie oroa ei tapao o te tereraa o te mahana i roto i te pueraa fetia o te Mamoe oni.’—Food, Feasts, and Faith—An Encyclopedia of Food Culture in World Religions.

    Te mau oroa taaihia i te haamoriraa i raro a‘e i te ture a Mose, tei hope hoi e te tusia o Iesu. Te na ô ra te Bibilia: “Ua hope te ture a Mose na roto i te Mesia.” (Roma 10:4) Te faufaahia nei te mau Kerisetiano i te mau aratairaa a te ture a Mose horoahia ia Iseraela i tahito. Eita râ ratou e faatupu i te mau oroa faatupuhia i raro a‘e i te ture a Mose, tera iho â râ tei faaite atea i te Mesia no te mea te tiaturi nei ratou e ua haere ê na mai oia. Te parau ra te Bibilia: “E ata ana‘e teie mau mea no te mau mea e tupu a muri a‘e, area te mea mau ra, o te Mesia ïa.” (Kolosa 2:17) No teie tumu e no te mea atoa ua anoihia mai te mau peu tuati ore e te mau Papai, eita te mau Ite no Iehova e faatupu i te mau oroa i muri nei:

    • Hanoukka. E oroa teie o te haamana‘o i te avariraa o te hiero i Ierusalema. Te haapii nei râ te Bibilia e ua riro mai Iesu ei tahu‘a rahi o te hoê “tiahapa [aore ra hiero] rahi a‘e e te maitai roa ’tu â e ere mea hamanihia e te rima taata, oia hoi e ere mea poietehia i te fenua nei.” (Hebera 9:11) No te mau Kerisetiano, ua mono te hiero pae varua i te hiero avarihia i Ierusalema.

    • Rosh ha-Shana. O te mahana matamua o te matahiti o te tarena ati Iuda. I tahito ra, e pûpûhia te mau tusia taa ê i te Atua i taua oroa ra. (Numera 29:1-6) I to Iesu râ haereraa mai ei Mesia, ua ‘faaore oia i te tusia e te ô.’ (Daniela 9:26, 27) No te Atua, mea faufaa ore ïa tera mau tusia i teie nei.

  • E turu anei tera oroa i te amuitahiraa i te pae faaroo?

    Aratairaa Bibilia: “E apiti anei te taata e tiaturi ra ia Iesu i te taata e ore e tiaturi ra? E parahiraa anei to te idolo i roto i te hiero o te Atua?”—Korinetia 2, 6:15-17.

    Te faaitoito nei te mau Ite no Iehova i te ora ma te hau e o vetahi ê e te faatura nei ratou i te tiaraa o te taata tataitahi e maiti eaha te tiaturi. Eita râ ratou e faatupu aore ra e apiti i te oroa o te turu i te amuitahiraa i te pae faaroo mai teie:

    Te mau oroa no te hoê taata faaroo aore ra te mau tupuraa e turu ra i te amuitahiraa i te pae faaroo. I to te Atua aratairaa i to ’na nunaa i te hoê fenua apî e haapaoraa taa ê to te taata, ua parau atu oia: “Eiaha oe e faaau i te faufaa ia ratou, e to ratou mau atua atoa. . . . Ia haamori hoi oe i to ratou ra mau atua, e riro ïa ei marei no oe.” (Exodo 23:32, 33) Eita ïa te mau Ite no Iehova e apiti i teie mau oroa:

    • Loy Kratong. I tera oroa no Thaïlande mai, “e hamani te taata i te au‘a maoti te rauere, e tuu i te tahi mori ama i nia iho a vaiiho atu ai e fano i nia i te pape. Ua parauhia e e afai atea te au‘a i te mau mea ino. I te tanoraa mau râ, e faahanahana teie oroa ia Bouddha.”—Encyclopedia of Buddhism.

    • Te mahana tatarahapa. Ia au i te hoê tia a te hau faahitihia i roto i te vea no te fenua Papua, The National, te faaite nei te feia o te apiti i tera oroa e “te farii nei ratou i te mau haapiiraa faufaa o te faaroo Kerisetiano.” Te na ô nei â o ’na e “te tauturu nei teie oroa ia paturu i te mau aratairaa Kerisetiano i tera fenua.”

    • Vesak. “O te oroa faufaa roa ’‘e teie no te feia e pee ra ia Bouddha. E faahanahanahia hoi to Bouddha fanauraa, maramaramaraa e poheraa.”—Holidays, Festivals, and Celebrations of the World Dictionary.

      Vesak

    Te mau oroa niuhia i nia i te mau peu faaroo aore ra tutuu o te ore e tuati i te Bibilia. Ua parau Iesu i te mau tia faaroo: “Ua haafaufaa ore . . . outou i te parau a te Atua na roto i ta outou tutuu.” Ua parau atoa ’tu e mea faufaa ore ta ratou haamoriraa no te mea te haapii noa ra ratou i “te mau faaueraa a te taata.” (Mataio 15:6, 9) I te mea hoi e mea faufaa roa no te mau Ite no Iehova teie faaararaa, mea rahi te oroa faaroo ta ratou e ore e faatupu.

    • Te Épiphanie (Timkat aore ra te oroa a te mau Arii). E oroa teie o te haamana‘o i te haereraa te feia hi‘o fetia e farerei ia Iesu aore ra i ta ’na bapetizoraa. “Ua faariro te reira i te mau oroa i te tau uaaraa tiare, tei ore e tuati i te mau Papai, ei oroa Kerisetiano. Mai te mau oroa o tei faahanahana i te mau atua o te mau anavai pape nainai e rarahi.” E te Timkat, o te i‘oa ïa i Etiopia, e “e a‘a papu maitai to te reira i roto i te tutuu.”—Encyclopedia of Society and Culture in the Ancient World.

    • Te mahana o te Assomption. E oroa teie faatupuhia e te taata e tiaturi ra e ua reva tino o Maria, te metua vahine o Iesu, i nia i te ra‘i. Te faahiti ra te hoê buka (Religion and Society—Encyclopedia of Fundamentalism): “Aita i itehia a‘e teie tiaturiraa i te tau o te mau Kerisetiano matamua e aita atoa e faahitihia ra i roto i te mau Papai.”

    • Te mahana o te Immaculée conception. ‘Aita teie oroa e faahitihia ra i roto i te mau Papai. E haapiiraa noa teie na te Ekalesia.’—New Catholic Encyclopedia.

    • Te haapaeraa maa. Ia au i te hoê buka ite rahi Katolika (New Catholic Encyclopedia), ua haamauhia teie taime haapaeraa maa e tatarahaparaa i “te senekele maha,” e piti hanere ïa matahiti i muri a‘e i te otiraa mai te papairaa o te Bibilia. Te parau nei teie buka ite rahi no nia i te mahana matamua o te haapaeraa maa: “I tuuhia na maa rehu i nia i te rae o te feia faaroo i te Mahana toru o te rehu. E ua purara teie peu na te ao mai te Apooraa faaroo no Bénévent i 1091.”

    • Te Mesqel. Ia au te hoê buka ite rahi (Encyclopedia of Society and Culture in the Medieval World), i tera oroa no Etiopia mai, e faahanahanahia “te iteraahia mai te satauro mau (te satauro i nia iho te Mesia i te haapoheraahia) ma te faaama i te tahi auahi e ma te ori na pihai iho.” Aita râ te mau Ite no Iehova e faaohipa nei i te satauro i roto i ta ratou haamoriraa.

  • Te faahanahana ra anei teie oroa i te hoê taata, i te tahi faanahoraa aore ra i te hoê taipe o te ai‘a?

    Aratairaa Bibilia: “Te na ô maira Iehova, Ia katarahia te taata e tiaturi i te taata ra, o tei faariro i te taata ei rima tauturu ia ’na, o tei taiva to ’na aau ia Iehova.”—Ieremia 17:5.

    Noa ’tu e te faatura ra e te pure atoa ra te mau Ite no Iehova no vetahi ê, aita ratou e apiti atu i te mau oroa mai teie:

    Te oroa e faahanahana ra i te hoê taata faatere aore te tahi taata tuiroo. Te parau ra te Bibilia: “Atira na i te tiaturi i te taata, tei te apoo ihu hoi to ’na aho; eaha hoi oia ia mana‘o atu ia ’na?” (Isaia 2:22) Aita ïa te mau Ite no Iehova e faatupu ra, ei hi‘oraa, i te mahana fanauraa o te hoê arii aore ra arii vahine.

    Te oroa e faahanahana ra i te reva. Eita te mau Ite no Iehova e faahanahana i te reva a te hoê nunaa. No te aha? Te parau ra te Bibilia: “A maue ê atu i te idolo.” (Ioane 1, 5:21) No vetahi, e ere te reva i te idolo, oia hoi i te ohipa e haamorihia. Ua papai râ te taata tuatapapa o Carlton Hayes: “I roto i te here ai‘a, o te reva te taipe matamua roa o te faaroo e e ohipa haamoriraa faufaa atoa.”

    Te oroa e faahanahana ra i te hoê taata mo‘a aore ra peata. Eaha tei tupu a tuturi ai te hoê taata i mua i te aposetolo Petero? Te faataa ra te Bibilia: “Faatia maira Petero ia ’na a na ô ai: ‘A tia, e taata noa hoi au mai ia oe.’” (Ohipa 10:25, 26) I te mea hoi aita o Petero e te tahi atu mau aposetolo i farii ia faahanahanahia aore ra ia haamorihia ratou, eita te mau Ite no Iehova e apiti i te mau oroa e faahanahana ra i te feia te faarirohia e mea mo‘a. Teie te tahi mau oroa:

    • Te mahana o te mau peata. ‘Te hoê oroa e faahanahana ra i te mau taata mo‘a, aore ra peata. Mea papu ore nohea mai tera oroa.’—New Catholic Encyclopedia.

    • Te oroa no Notre-Dame no Guadalupe. Te faahanahana ra teie oroa i “te tia vahine mo‘a no Mehiko.” No vetahi, o Maria ïa, te metua vahine o Iesu. Te parauhia ra e ua fa semeio mai oia i te hoê taata riirii i 1531.—The Greenwood Encyclopedia of Latino Literature.

      Oroa no te Notre-Dame no Guadalupe

    • Te oroa no te toparaa i‘oa. Ia au i te hoê buka (Celebrating Life Customs Around the World—From Baby Showers to Funerals), e oroa teie no te taata mo‘a ua tuuhia to ’na i‘oa i nia i te hoê tamarii i to ’na bapetizoraa aore ra confirmation. Te faahiti nei te buka e i tera mahana e rave te taata i te ohipa taaihia i te haapaoraa.

    Te mau oroa no te mau ohipa taaihia i te poritita e te ohipa totiare. Te parau ra te Bibilia: “E mea maitai te tiaturi ia Iehova, i te tiaturi i te taata nei.” (Salamo 118:8, 9) Ia ore ia mana‘ohia e te tiaturi nei te mau Ite no Iehova i te taata, eiaha râ i te Atua, no te faaore i te mau fifi o teie nei ao, eita te mau tavini a Iehova e apiti i te Mahana no te vahine e i te Mahana no te u‘i api. No reira atoa ratou e ore ai e apiti i te mahana haamana‘oraa o te faaoreraahia te ohipa tîtî e te vai ra ’tu â. Te tiaturi nei ratou i te Faatereraa arii no te faaore i te mau fifi taaihia i te au-ore-raa i te nunaa ê e te aifaito-ore-raa.—Roma 2:11; 8:21.

  • Te faateniteni ra anei teie oroa i te hoê fenua aore ra nunaa a haafaufaa ore ai i te tahi atu?

    Aratairaa Bibilia: “E ore te Atua e maitiiti i te taata, i roto râ i te mau nunaa atoa, e farii oia i te taata o te mǎta‘u ia ’na e o te rave i te mea tia.”—Ohipa 10:34, 35.

    Noa ’tu mea au roa na te mau Ite no Iehova to ratou fenua, aita ratou e apiti i te mau oroa e faateniteni ra i te hoê fenua aore ra nunaa mai te mau tupuraa faahitihia i muri nei.

    Te mau oroa e faahanahana ra i te faehau. Aita Iesu i turu i te ohipa tama‘i, ua parau râ o ’na i ta ’na mau pǐpǐ: “A here noa i to outou mau enemi e a pure noa no tei hamani ino ia outou.” (Mataio 5:44) Aita ïa te mau Ite no Iehova e apiti i te mau oroa e faahanahana ra i te mau faehau, oia atoa te mau oroa mai teie:

    • Te mahana o te Anzac. “No roto mai teie ta‘o Anzac i te mau reta matamua o te nuu faehau parauhia Australian and New Zealand Army Corps.” E “ua riro mai te reira ei mahana haamana‘oraa i te mau taata atoa i pohe i te tama‘i.”—Historical Dictionary of Australia.

    • Te Armistice. Te faahanahana ra teie oroa i “te faehau ua ruau i teie nei e i te faehau tei pohe i te tama‘i no to ratou fenua.”—Encyclopædia Britannica.

    Te mau oroa e faahanahana ra i te aamu aore ra i te tiamâraa o te hoê fenua. No nia i ta ’na mau pǐpǐ, ua parau Iesu: “E ere ratou no teie nei ao, mai ia ’u nei e ere no teie nei ao.” (Ioane 17:16) Noa ’tu e anaanatae ratou i te haapii i te aamu o te hoê nunaa, aita te mau Ite no Iehova e apiti atu i te mau oroa mai teie:

    • Te mahana no Auteralia. Ia au i te hoê buka (Worldmark Encyclopedia of Cultures and Daily Life), e haamana‘o teie oroa i “te mahana a tuu ai te mau faehau Beretane i to ratou reva i Auteralia i 1788 e i faariro ai ia Auteralia ei fenua aihuaraau apî.”

    • Te mahana o Guy Fawkes. Te faatupu ra “teie oroa i to Guy Fawkes e vetahi mau Katolika mairiraa i te haapohe i te arii Iakobo 1 no Beretane e te mau mero o ta ’na faatereraa i 1605.”—A Dictionary of English Folklore.

    • Te mahana o te tiamâraa. I te fenua e rave rahi, e mahana haamana‘oraa teie i te omuaraa o te tiamâraa o te hoê nunaa.

  • E oroa anei o te turu i te mau haerea taotia ore aore ra tano ore?

    Aratairaa Bibilia: “Ua ravai hoi te tau i mutaa iho ra i rave ai outou i te hinaaro o te feia o teie nei ao, oia hoi te mau peu faufau, te mau hinaaro vî ore, te inu-hua-raa, te mau arearearaa ahoahoa, te inu faataero e te haamoriraa idolo faufau.”—Petero 1, 4:3.

    Ia au i teie aratairaa, aita te mau Ite no Iehova e apiti ra i te mau oroa i reira te taata e inu hua ’i e e haa ’i aore a‘e taotiaraa. Mea au roa na ratou e amui e to ratou mau hoa e ia inu ratou i te ava, mea tanotano noa ïa. E tutava ratou i te pee i teie a‘oraa Bibilia: “Te amu ra outou, te inu ra aore ra te rave ra i te tahi atu ohipa, a rave i te mau mea atoa ia hanahana te Atua.”—Korinetia 1, 10:31.

    Aita ïa te mau Ite no Iehova e apiti i te mau oroa taravanaraa, aore ra te mau oroa o te turai i te faaite i te hoê huru faahapahia e te Bibilia. A hi‘o na i te oroa ati Iuda o Pourim. Noa ’tu i faatupuhia na teie oroa no te haamana‘o i to te ati Iuda tiamâraa mai i te senekele 5 hou te Mesia, te faataa ra te buka Essential Judaism e mea taa ê i teie mahana. ‘E au teie oroa i teie nei i te Mardi Gras aore ra mahana no te taravanaraa ati Iuda. E pinepine te tane i te oomo i te ahu vahine, aita e taotiaraa faahou, e itehia te inu-hua-raa e te maniania rahi.’

 Noa ’tu aita te mau Ite no Iehova e faatupu ra i te tahi mau oroa, te here noa ra anei ratou i to ratou utuafare?

E. Te haapii nei te Bibilia ia here e ia faatura i te mau mero taatoa o te utuafare noa ’tu ta ratou haapaoraa. (Petero 1, 3:1, 2, 7) Papu maitai, ia faaea te hoê Ite no Iehova i te apiti i te tahi mau oroa, e huru ê mai paha vetahi o ta ’na fetii, e mauiui aore ra e inoino mai. No reira, mea rahi te Ite no Iehova te haapapu oioi i to ratou fetii i to ratou here, te faataa ma te tura i te tumu o ta ratou mau faaotiraa e te haere e hi‘o i te fetii i te tahi atu mahana.

 Te faahepo ra anei te mau Ite no Iehova i te tahi atu eiaha e faatupu i te tahi mau oroa?

Aita. Te mana‘o nei ratou e na te taata iho e faaoti no ’na iho. (Iosua 24:15) Te “faatura” ra te mau Ite no Iehova “i te mau huru taata atoa” noa ’tu eaha ta ratou mau tiaturiraa.—Petero 1, 2:17.

^ par. 7 Aita teie tumu parau e faahiti ra i te taatoaraa o te oroa ta te mau Ite no Iehova e ore e faatupu aore ra te taatoaraa o te mau aratairaa Bibilia e pee.

^ par. 15 Mithra, Mithraism, Christmas Day & Yalda, na K. Eduljee, api 31-33.