Faatanoraa no te "mode accessibilité"

Search

Maiti te reo

Mau faaho'iraa ê

Eaha to roto?

Ite no Iehova

Tahiti

Eaha te mana‘o o te mau Ite no Iehova no nia i te hunaraa ma‘i?

Eaha te mana‘o o te mau Ite no Iehova no nia i te hunaraa ma‘i?

Ua niuhia to matou mana‘o e ta matou mau peu no nia i te hunaraa ma‘i i nia i te mau aratairaa Bibilia mai teie:

  • Ia pohe tei herehia, e ere i te mea ê ia oto. Ua oto te mau pǐpǐ a Iesu a pohe ai te feia ta ratou i here. (Ioane 11:33-35, 38; Ohipa 8:2; 9:39) Eita râ matou e faaohipa i te taime hunaraa ma‘i no te arearea. (Koheleta 3:1, 4; 7:1-4) E taime teie no te faaite i te aumihi.—Roma 12:15.

  • Eita ta te feia pohe e parau itea. Noa ’tu te fenua aore ra te ta‘ere, eita matou e pee i te mau peu aore ra te mau ohipa niu-ore-hia i nia i te Bibilia. Te mau peu iho â râ o te faaite ra e e tamau te feia pohe i te ora e e nehenehe ratou e ohipa i nia i te feia ora. (Koheleta 9:5, 6, 10) Ei hi‘oraa, eita matou e faatupu i te mau peu araraa i te po taatoa no tei pohe. Eita atoa matou e faarahi a faanaho ai i te hunaraa ma‘i aore ra a haamana‘o ai i te mahana o te poheraa o te tahi taata. Eita ’toa matou e pûpû i te ô i te feia pohe, e paraparau ia ratou, e faatae atu i te tahi aniraa e e tuama i te mau mori hinu no te haamana‘o i to ratou pohe. E haapae matou i teie mau peu e i teie mau huru raveraa atoa no te auraro i teie faaueraa Bibilia: “Ia taa ê outou, e eiaha e rave noa ’tu i te mea viivii ra.”—Korinetia 2, 6:17.

  • E tiaturiraa no te feia pohe. Te haapii mai ra te Bibilia e e tupu iho â te tia-faahou-raa e e tae mai te mahana e ore roa ’i te pohe. (Ohipa 24:15; Apokalupo 21:4) Ua tauturu teie tiaturiraa i te mau Kerisetiano matamua e e tauturu atoa te reira ia matou ia ore e pee i te mau peu otoraa tano ore ravehia ia pohe te taata.—Tesalonia 1, 4:13.

  • Te faaitoito mai ra te Bibilia ia faaite i te haehaa. (Maseli 11:2) Eita matou e tiaturi e e taime te hunaraa ma‘i no te faaite i te “ahaaha,” oia hoi no te faaiteite i ta tatou moni aore ra tiaraa totiare. (Ioane 1, 2:16) Eita matou e faanaho i te mau hunaraa ma‘i moni roa no te faaanaanatae i te mau taata aore ra no te faaiteite i te mau afata ma‘i moni rahi. E haapao maitai atoa tatou ia ore e faarahi roa i te pae o te faaahuraa i te taata pohe aore ra ia tatou iho. Eita matou e hinaaro e faatietie ia matou iho i mua i te taata.

  • Eita matou e faahepo ia vetahi ê ia pee i to matou iho mana‘o no nia i te hunaraa ma‘i. E pee matou i te faaueraa Bibilia o te faaite ra e e amo tatou tataitahi i te hopoia no ’na iho i mua i te Atua. (Roma 14:12) Teie râ, ia nehenehe, e faataa matou i ta matou mau tiaturiraa “ma te mǎrû e te auraro maite atu.”—Petero 1, 3:15.

Eaha te huru o te mau hunaraa ma‘i arataihia e te mau Ite no Iehova?

Te vahi: Ia faaoti te tahi utuafare i te faatupu i te hoê hunaraa ma‘i, na ratou e faaoti i te vahi: i te Piha a te Basileia anei, i te fare vairaa taata pohe, i to ratou fare, i te vahi taninaraa taata pohe aore ra i te menema.

Te faanahoraa: E vauvauhia te hoê oreroraa parau no te tamahanahana i te feia oto. E faataahia eaha ta te Bibilia e haapii ra no nia i te pohe e te tia-faahou-raa. (Ioane 11:25; Roma 5:12; Petero 2, 3:13) I te hunaraa ma‘i, e haamana‘ohia te mau huru maitatai o te taata pohe. E faahiti atoa paha te taata orero i te tahi mau haapiiraa ta tatou e nehenehe e huti mai maoti te hi‘oraa taiva ore o te taata pohe.—Samuela 2, 1:17-27.

E nehenehe e himenehia te tahi himene e au i te Bibilia. (Kolosa 3:16) E faaotihia te oroa na roto i te hoê pure tamahanahana.—Philipi 4:6, 7.

Te titauraa moni: Eita matou e titau i te mau mero Ite no Iehova ia aufau i te pureraa, oia atoa i te hunaraa ma‘i. Eita atoa matou e titau i te moni i ta matou mau putuputuraa.—Mataio 10:8.

Te feia e tae mai: E nehenehe atoa te feia e ere i te Ite no Iehova e haere i te faanahoraa hunaraa ma‘i ravehia i te tahi Piha a te Basileia. No te taatoaraa teie faanahoraa, mai ta matou mau putuputuraa atoa.

E haere anei te mau Ite no Iehova i te mau hunaraa ma‘i faaterehia e te tahi atu mau haapaoraa faaroo?

Na te Ite no Iehova taitahi e faaoti i te reira, ia au i to ’na mana‘o haava niuhia i nia i te Bibilia. (Timoteo 1, 1:19) Eita râ matou e apiti i roto i te mau oroa faaroo eita e niuhia i nia i te Bibilia.—Korinetia 2, 6:14-17.