Eaha to roto?

Eaha te hoê haapiiraa Bibilia?

Eaha te hoê haapiiraa Bibilia?

Te pûpû nei te mau Ite no Iehova i te hoê haapiiraa Bibilia o te pahono i e rave rahi uiraa mai teie:

  • O vai te Atua?

  • Te tâuˈa mau ra anei te Atua ia ˈu?

  • E nafea ia haamaitai i to ˈu faaipoiporaa?

  • E nafea vau e oaoa ˈi i te oraraa nei?

Teie te tahi mau pahonoraa i te mau uiraa a te taata no nia i ta matou haapiiraa Bibilia.

Eaha te tereraa o te haapiiraa? E rave matou i te tahi tumu parau mai “te Atua” aore ra “te faaipoiporaa” ma te hiˈopoa e te faaau i te mau irava Bibilia rau tei taaihia i tera tumu parau. E taa ïa ia matou ta te Bibilia taatoa e parau ra no nia i tera tumu parau, e mea na reira ïa te Bibilia iho e faataa ˈi i te auraa.

E faaohipa matou i te buka Eaha ta te Bibilia e haapii mai? i roto i ta matou haapiiraa Bibilia. Te faaite maitai ra teie buka i ta te Bibilia e haapapu ra no nia i te Atua, ia Iesu e to tatou a muri aˈe.

Ehia moni te haapiiraa Bibilia? Mea tamoni ore e eita e titauhia te moni no te aufau i te mau papai haapiiraa.

Ehia hora te haapiiraa? E faataa te rahiraa o te taata hoê hora aore ra hau atu i te hebedoma no te haapii i te Bibilia e o matou. E faatanohia râ te roa o te haapiiraa. Tei to oe ïa vataraa.

Ia ani au i te hoê haapiiraa Bibilia, eaha te tupu? Ia ani oe i te hoê haapiiraa Bibilia, e farerei te hoê Ite no Iehova ia oe i te hora e te vahi ta oe e maiti. E rave oia maa minuti no te faaite atu i te tereraa o te haapiiraa. Na oe e faaoti e farii anei i teie haapiiraa.

Ia farii au i te hoê haapiiraa Bibilia, e riro anei au ei Ite no Iehova? Eita. Mea au na te Ite no Iehova e haapii i te taata i te Bibilia, eita roa ˈtu râ matou e faahepo ia ratou ia haere mai i roto i ta matou haapaoraa. E faaite matou i ta te Bibilia e parau ra ma te faatura i to ratou tiamâraa e maiti i ta ratou e tiaturi.—Petero 1, 3:15.