Faatanoraa no te "mode accessibilité"

Search

Maiti te reo

Mau faaho'iraa ê

Eaha to roto?

Ite no Iehova

Tahiti

Faanahoraa î i te here: 19 000 tere manureva

Faanahoraa î i te here: 19 000 tere manureva

I Tiurai 2013, ua hapono te Tino aratai a te mau Ite no Iehova i te tahi rata i te mau mitionare e te tahi atu tei roto i te taviniraa taime taatoa taa ê i te fenua ê. Ua ravehia te tahi faanahoraa no te tauturu ia ratou ia haere i te tairururaa e toru mahana aore ra nunaa rau i tupu i 2014 e te omuaraa o te matahiti 2015.

Eaha te tumu? E ere noa no te tauturu i te tavini ra i te fenua ê ia tae i te tairururaa. No te farerei atoa râ i to ratou fetii aore ra hoa. Ua faaitehia i roto i te rata, e aufau te faanahonahoraa i te mau titeti no te haere e no te ho‘i i te fenua e tavini ai ratou.

Noa ’tu ua rave-a‘ena-hia tera faanahoraa, mea taa ê to teie matahiti. Aita i maoro a‘enei, ua haamauhia hoê tuhaa apî o te tiaauhia e te Tomite haapiiraa (WHQ). Na ratou e haapao ia hoohia mai te mau titeti manureva atoa.

Ua haponohia te mau rata e aita i maoro, ua tae mǎrû noa mai te mau parau aniraa. I Tenuare 2014, ua rahi roa te reira! Ua imi te pǔpǔ o tera tuhaa ohipa i te mau reni manureva e ua hoo mai i te mau titeti no te tavini ra i tera e tera fenua na te ao nei.

E ere i te mea ohie ia faanaho i te tahi mau reni manureva. No te feia i Reykjavík, Islande, e titauhia ia tere na mua i Cochabamba, Bolivia. No to Taratoni, ia reva na mua i Antananarivo, Madagascar. E haere na mua to Port Moresby, Papua, i Seattle i Marite. No te tahi atu, no Ouagadougou, Burkina Faso, e tere na mua ïa i Winnipeg, Kanada.

E pae to roto i te pǔpǔ i faanaho 19 000 tere ma te faaohipa i te mau ô ta te mau amuiraa i tuu i roto i te afata faataahia no tera tumu. Ua haponohia te mau titeti manureva i na 4 300 taeae e tuahine i 176 fenua.

Ua mauruuru te taatoaraa i tera faanahoraa. Ua papai na hoa faaipoipo mitionare: “I teie mahana, te ho‘i ra mâua i Asia apatoa hitia o te râ. Auê te mauruuru no ta outou i rave ia tae mâua i Beretane, to mâua fenua tumu. Aita mâua i farerei i te fetii e pae matahiti. Ua tia râ maoti tera faanahoraa. Mauruuru mau i te feia atoa i turu i te reira.”

Ua papai te tahi mitionare e tavini ra i Paraguay: “E hinaaro mâua ta ’u vahine e faaite i to mâua mauruuru rahi i te taeraa i te tairururaa nunaa rau i New Jersey, Marite. I te haamataraa o te matahiti 2011, ua opua mâua e reva i Marite no te mataitai i te pu rahi. Ua haaputu mâua i te tahi tuhaa moni. I Tiunu râ, ua titau-manihini-hia mai ia faaitoito i te mau amuiraa reo apǎraa rima i Paraguay. I ǒ, e ere i te mea ohie ia haere i tera e tera vahi. Ua feruri maite mâua e ua faaoti i te haapae i te tere i Marite no te hoo mai hoê pereoo no te faaohie i ta mâua taviniraa apî. I muri iho, ua haponohia mai hoê rata no te haere i te tairururaa nunaa rau. Ua horoahia mai ta mâua i hinaaro! Auê te mauruuru ia Iehova no te faaiteraa mai i to ’na maitai rahi e here na roto i tera faanahoraa.”

Ua papai na hoa faaipoipo no Malawi: “Ua hinaaro mâua e hapono atu hoê poroi na roto i te Internet no te parau ‘Mauruuru roa!’ Ua ite mâua mea rahi te ohipa, te taime e te moni i ravehia no te faanaho i te mau tere manureva. Mauruuru no ta outou ohipa rahi e hau roa ’tu â no te maitai o te faanahonahoraa a Iehova. Ua nehenehe mâua e tae i te tairururaa nunaa rau e e farerei i te fetii e hoa.”

Ua au roa te pǔpǔ i faanaho i te mau tere i ta ratou ohipa. Ua na ô Mileivi: “Mea faufaa roa ia tauturu i te mau mitionare ia ho‘i i to ratou fenua no te farerei i te fetii e hoa.” Ua parau atoa Dorise: “Ua tauturu te reira ia ’u ia ite i te here rahi o te faanahonahoraa no te mau Kerisetiano e tavini ra i te fenua ê.” Ua na ô Rodney, te tiaau o tera tuhaa ohipa: “Ua oaoa roa vau i te tururaa i tera faanahoraa.”

Ua oaoa roa te mau Ite no Iehova na te ao i te turu i tera faanahoraa î i te here no te mau taeae e tuahine itoito tei haapae ia ratou no te tavini atu â ia Iehova.

No te ite atu â

No te aha te mau Ite no Iehova e haere ai i te mau tairururaa?

I te mau matahiti atoa, te farerei nei tatou i roto e toru haaputuputuraa taa ê. E nafea tatou e faufaahia ’i i teie mau haaputuputuraa?