Eaha to roto?

Mau faaho'iraa ê

Ite no Iehova

Tahiti

Ua faaitoito te Tino Aratai i te mau Ite no Iehova no Rusia e no Ukraine

Ua faaitoito te Tino Aratai i te mau Ite no Iehova no Rusia e no Ukraine

“Mai te huru ra e ua î roa to matou aau i te here!” Teie te mana‘o o te hoê vahine no Ukraine i to Stephen Lett taioraa mai i te hoê rata a te Tino Aratai a te mau Ite no Iehova. Ua apiti teie vahine i na 165 000 Ite no Iehova tei ruru no te faaroo i te oreroraa parau a taeae Lett i to ’na tereraa ’tu i reira i te 10 e te 11 no Me 2014.

Ua taiohia taua rata ra a te Tino Aratai e ua horoahia te tahi mau oreroraa parau Bibilia na Ukraine taatoa na roto e pae reo, i roto hau atu 1 100 Piha a te Basileia.

Area o Mark Sanderson, te tahi atu ïa melo no te Tino Aratai, ua taio atu ïa o ’na i taua rata ra i to tatou mau taeae na te fenua Rusia. Ua huri-atoa-hia te porotarama na roto 14 reo, e ua haapurorohia te reira i roto e 2 500 amuiraa no Rusia e no Biélorussie. Ua faaroo 180 413 taata i teie mau parau.

Ua papaihia taua rata ra e te Tino Aratai no te mau amuiraa atoa no Rusia e no Ukraine. Na taeae Sanderson i taio i te reira i te fenua no Rusia, e ua papai roa mai te tomite amaa no Rusia i teie mau parau: “Ua putapû roa te aau o te mau taeae e tuahine i te mea e te haapeapea ra te Tino Aratai no ratou e faaea ra i Rusia. Mai te huru ra e ua tamahanahanahia e ua tauahihia matou e te Tino Aratai.”

Ua papai te Tino Aratai i teie rata no te tamahanahanaraa e te faaitoitoraa i te mau Ite no Iehova na te reira mau vahi ra e faatupuhia ra te tahi orureraa hau. Ua haamana‘o-atoa-hia ratou e ‘e ere ratou i to teie nei ao.’ E ere ïa i te mea tano ia amui ratou i te mau fifi i te pae poritita.—Ioane 17:16.

No reira, ua faaitoito te Tino Aratai i te mau taeae e tuahine ia vai piri noa ratou ia Iehova na roto i te pure, te haapiiraa, e te feruriruriraa i nia i te Parau a te Atua. E noa ’tu te mau tamataraa ta ratou e faaruru ra, ia tiaturi noa ratou i te mau parau e taiohia i roto i te Isaia 54:17, o te na ô ra: “Te mauhaa ra no oe i hamanihia ’i ra, e ore ïa e tupu.”

Mea na roto i teie mau parau te Tino Aratai i te puohuraa i ta ’na rata: “E here iti rahi to matou ia outou. Ia ite outou e e haamana‘o noa matou ia outou e tae noa ’tu i roto i ta matou mau pure ia Iehova e ia tiaihia outou e ana.”

Te na ô ra te amaa no Ukraine i roto i ta ’na rata: “Ua hitimahuta roa te mau taeae i te haapao maitai e te here no ǒ mai i te Tino Aratai. I to matou fariiraa ia taeae Lett i Rusia e ia taeae Sanderson i Ukraine i te hoê â taime, ua haapapu mai te reira i te hoêraa o te nunaa o te Atua. E ua faaite mai te reira, e te haapao mai ra Iehova raua Iesu ia ratou. Ua papu ia matou paatoa, ua tano roa raua i te tonoraahia mai i tera iho â râ taime, e ua faaitoitohia matou ia tavini noa ia Iehova noa ’tu te mau haafifiraa e farereihia.”

No te ite atu â

UIRAA A TE TAATA

No te aha e vai amui ore ai te mau Ite no Iehova i roto i te mau ohipa poritita?

Mea atâta anei ratou no te hau o te fenua?