Eaha to roto?

Mau faaho'iraa ê

Ite no Iehova

Tahiti

Haamana‘oraa i te tairururaa o tei haaati i te ao

Haamana‘oraa i te tairururaa o tei haaati i te ao

A pae ahuru matahiti a‘enei, e 583 Ite no Iehova tei rave i te pahi no te hoê tere ahuru hebedoma no te haaati i te ao. E ere râ ratou mai te tahi atu mau ratere. Ta ratou fa matamua, o te fana‘oraa ïa i te autaeaeraa Kerisetiano mahanahana i te mau tairururaa “Te parau apî oaoa mure ore.” I te mea e ua haere teie mau Ite no Iehova i hau atu e 20 fenua, ua parauhia teie anairaa tairururaa: te tairururaa “tei haaati i te ao.”

Te hoê taime faufaa o tera mau tairururaa, o te oreroraa parau ïa “Ia faatere mai te Atua i te fenua taatoa.” Na Nathan Knorr, no te pu rahi a te mau Ite no Iehova, i vauvau i te reira i te rahiraa o te mau tairururaa. Ua faataa o ’na i te mau tupuraa na te ao e ino noa ’tura e ua faaau atu i te parau fafau faahiahia i roto i te Bibilia o te hoê paradaiso i te fenua. Ia amuihia te feia atoa na te ao nei tei faaroo i teie oreroraa parau, e naea e 580 509 taata.

Haaati i te ao i roto ahuru hebedoma

Ua haamata teie mau tairururaa i Milwaukee, i te tuhaa o te Wisconsin i Marite. I muri a‘e i te tairururaa i New York, ua fano e ua tapea ratou i Beretane, Tuete, Heremani e Italia. I te fenua taitahi, ua tia ia ratou ia poro i te parau apî oaoa o te Bibilia.

Ua rave te mau Ite no Iehova i te taime no te farerei i te taata. Ua oaoa te taata e rave rahi no ǒ i te reira. Ua parau te hoê vahine apî i Stockholm, Tuete: “Eita roa ’tu outou e moehia ia ’u. . . . Ua haere atea roa mai iho â anei outou no te faaite mai i to outou faaroo i te Atua? E taata faahiahia mau outou.”

E ere i te hoê â huru a tae ai te mau Ite no Iehova i Ateno, i Heleni. No te faaheporaa a te mau tia faaroo, ua faaore te mau tia faatere i te parau faatia no te tairururaa i te tahua tuaro no Panathinaïkos. Aita râ ratou i haaparuparu. I te hopea o te ava‘e Atete, fatata 10 000 taata tei nehenehe e fana‘o i te porotarama i roto i te mau fare e te mau amuiraa.

Ua faarue ratou ia Ateno e ua fano atura i Lebanona, Jordanie, Iseraela e Kupero. Ua farii-maitai-hia ratou na to ratou mau hoa haamori e ua tupu te tahi mau aamu ataata. Te na ô ra te hoê taeae i Nicosie, i Kupero: “I te mau taime atoa e ho‘i ai au i te fare [o te utuafare tei titau manihini] ia ’u e e tatara ’i i to ’u tiaa . . . e moe to ’u tiaa . . . e e faura faahou mai i roto e pae minuti, mea anaana e te purapura.”

Ua afai te tere hopea i te mau Ite no Iehova na Asia e na te Patitifa. Ua faatupuhia i Initia, Burma (Myanmar), Thaïlande, Hong-Kong, Singapour, Philipino, Inidonesia, Auteralia, Taïwan, Tapone, Niu Zelani, Fiti e Korea i te tairururaa tei haaputuputu i te mau Ite no te fenua ê e e tausani Ite no te fenua tei farii i te tairururaa. E rave rahi tei faatano faahou i ta ratou porotarama no te tae atu i tera tairururaa, mai na taata momo‘ahia no Yokosuka i Tapone. Ua ani te tane i ta ’na paoti ohipa te hoê tau faafaaearaa no te haere i te tairururaa i Kyoto. Ua pahono râ te paoti e e nehenehe noa e rave i te tau faafaaearaa no te hunaraa ma‘i noa aore ra te faaipoiporaa. I te mea e ua opua iho â raua e faaipoipo, ua faanuu mai raua i ta raua faaipoiporaa. E i muri iho i te faaipoiporaa, ua haere raua i te tairururaa.

Ua hope te tere i te omuaraa o te ava‘e no Tetepa e te mau tairururaa i Vaihi e i Kalifonia (Marite). I Pasadena (Kalifonia), te tapearaa hopea, ua hau ê atu te taata i tae mai i ta matou i mana‘o. Ua taupupu roa te tereraa pereoo a faaoti ai te tairururaa. Noa ’tu râ, ua pia te hoê vea no ǒ i ta te hoê mutoi i parau: “Aita vau i ite a‘enei i te hoê haaputuputuraa rarahi naho maitai mai teie.”

Te mau haamaitairaa o te vai noa mai

Tae roa mai i teie mahana, e itehia te mau haamaitairaa ta teie mau tairururaa i faatupu. I tera tairururaa te matararaa mai te buka Bibilia “Te mau Papai atoa, e mea faaurua ïa e te Atua e e mea faufaa.” Te faaohipa-noa-hia nei teie buka i te mau putuputuraa a te mau Ite no Iehova.

Harold King aita i maoro i muri a‘e i te tiamâraa mai i te fare auri Tinito

I te tairururaa i New York, ua matara mai te hoê himene apî. Ua papaihia te reira na Harold King, te hoê Ite no Iehova tei tiamâ mai i te hoê fare tapearaa Tinito i 1963. Teie te upoo parau o te himene: “I tera uputa, i tera uputa.” Ua papai Harold King i teie himene i te fare auri, a tuuhia ’i oia o ’na ana‘e. E te himene noa ra te mau Ite no Iehova i teie himene, matauhia i teie nei e te upoo parau “I tera fare, i tera fare.”

I teie mahana, mea taa ê roa te mau tairururaa a te mau Ite no Iehova. Mea nainai a‘e te mau piha e faaohipahia e mea iti a‘e te taata e tae mai. I te mea e mea rarahi te mau piha, ua iti atoa mai ïa te taime no te tapae atu. E nehenehe ïa te feia e tae atu e faaroo maitai i te porotarama. Pauroa te mau matahiti, ua hau atu i te hitu mirioni Ite no Iehova te tae ra i tera mau tairururaa, oia atoa ta ratou mau manihini. E hinaaro anei outou e apiti atu ia ratou? Teie te vahi o te tairururaa i pihaiiho i ǒ outou.

 

 

No te ite atu â

O vai te rave nei i to Iehova hinaaro i teie mahana?

No te aha te mau Ite no Iehova e haere ai i te mau tairururaa?

I te mau matahiti atoa, e amui matou no e toru tairururaa taa ê. E nafea oe e faufaahia ’i i teie mau tairururaa?