Eaha to roto?

Parau faataa o te rururaa matahiti

“Maa i te hora mau”

Parau faataa o te rururaa matahiti

Ua putuputu mai na tausani Ite no Iehova i te 128raa o te rururaa matahiti a te Watch Tower Bible and Tract Society of Pennsylvania. E ua fanaˈo ratou i te tahi mau parau faaitoito e tuatapaparaa anaanatae mau no nia i te Mataio 24:45-47.

I te 6 no Atopa 2012, e 5 000 taata tei ruru mai i te piha tairururaa a te mau Ite no Iehova i New Jersey, i Marite. E ua fanaˈo atoa 10 000 taata i taua porotarama ra o tei haapurorohia maoti te video. Ua ruru mai ratou i te mau piha i Brooklyn, Patterson e Wallkill (mau tuhaa fenua no New York), e i te amaa no Kanada.

Ua haamanaˈo Anthony Morris, melo o te Tino aratai a te mau Ite no Iehova e peretiteni o te porotarama, i te mau rururaa matahiti faaitoito mau e faahiahia roa i mairi aˈenei. Ua ite te feia e faaroo ra e e riro atoa teie porotarama ei rururaa faaitoito mau. Tera râ, te manaˈo ra ratou: “Mea faahiahia atoa anei ra teie rururaa?”

Ua mataitai te feia i tae mai e piti video no nia i ta tatou taviniraa na te ao nei.

Paturaa i te mau Piha a te Basileia:

Maoti teie video, ua faaite-maitai-hia te ohipa paturaa i te mau Piha a te Basileia i te mau fenua mea veve to tatou mau taeae. Ua patu te mau pǔpǔ paturaa e 25 402 Piha a te Basileia i taua mau fenua ra i na 13 matahiti i mairi, oia hoi, hau atu i te pae Piha a te Basileia i te mahana hoê! Ua manuïa teie ohipa maoti te mau ô horoa noa a te mau Ite na te ao nei. Ua tauturu oioi atoa teie mau pǔpǔ aravihi i te feia tei faaruru i te mau ati natura ma te tataî aore ra patu faahou i ta ratou mau Piha a te Basileia e vahi nohoraa.

Tairururaa taa ê:

I 2012, ua faanaho te mau Ite no Iehova i te tahi mau tairururaa taa ê e ua tae-atoa-mai te mau taeae e tuahine no te ao nei. Eaha te taa-ê-raa i teie mau tairururaa e te tahi atu mau tairururaa nunaa rau i tupu i te mau matahiti i mairi aˈenei?

Ua faaite te video e e ere na te pu no te mau ratere i faanaho i te mau vahi nohoraa, pereoo faauta e maa no te avatea no te mau taeae e tuahine no te ao nei i tae mai i te roaraa o te hebedoma tairururaa. Na te mau amaa râ o te fenua farii. Fatata e 1 500 taeae e tuahine no te ao nei tei tae mai i te tairururaa taitahi.

E rave rahi tupuraa no te taeae e tuahine no te ao nei e te mau Ite no te fenua farii no te farerei e haamatau te tahi e te tahi. Eiaha noa i te tairururaa, ia haere atoa râ ratou e mataitai i te mau vahi anaanatae o te fenua, i te taime tamaaraa aore ra pororaa. Teie ta te video i faaite: “I te mau tairururaa taa ê atoa i tupu e tae roa mai i teie mahana, ua riro te here taeae ‘ei tatua nehenehe roa’ o te auhoêraa.”

Ua oaoa roa te feia e faaroo ra i te iteraa e e faanaho atoa te mau Ite no Iehova i te mau tairururaa taa ê i e rave rahi fenua na te ao nei.

Teie te tahi atu mau taime faahiahia o te rururaa matahiti:

Uiuiraa manaˈo:

Ua ohipa na melo e toru o te Tomite amaa e ta ratou mau vahine e 342 matahiti i roto i te taviniraa taime taatoa ia amuihia te roaraa o ta ratou taviniraa. Ua faaite ratou mea nafea te Atua i te faaineineraa ia ratou ia amo i ta ratou mau hopoia.

Ua parau o Richard Kelsey, melo o te Tomite Amaa no Heremani, e maoti te Haapiiraa no te mau melo o te Tomite amaa e ta ratou vahine, ua haapii mai oia ia “vai noa i nia i te eˈa ta Iehova e faaite mai.” E Metua î i te here o Iehova e te hinaaro nei oia i to tatou maitai. Ua faataa te taeae Kelsey: “Te hinaaro nei te Atua ia ora tatou e a muri noa ˈtu e te aupuru maitai ra oia ia tatou.” Ua tauturu teie haapiiraa i te mau melo o te Tomite amaa ia pee i te hiˈoraa maitai o te here o Iehova.

Ua titau-manihini-hia o Linda Johansson i te haapiiraa Bibilia no Gileada a te Watchtower i 1958. I taua taime ra, e piti matahiti e te afa bapetizoraa to ˈna e e hoê noa matahiti faaipoiporaa. Ua parau te tuahine Johansson: “E mau taeae feruriraa paari e aravihi noa to roto i ta ˈu piha haapiiraa. Manaˈo aˈera vau e, ‘Eaha mau na ta ˈu ohipa i ǒ nei.’”

Noa ˈtu te reira, ua tutava noa te tuahine Johansson. I te pae hopea o te faatuiteraa, ua tonohia oia e ta ˈna tane ei mitionare i Malawi. Ua faaruru te mau Ite no Iehova no taua fenua ra i e rave rahi mau hamani-ino-raa. I muri aˈe i te reira, ua haapii atu te tuahine Johansson i te Bibilia i te hoê faatere hau o tei patoi i te taviniraa a te mau Ite. Ei faahopearaa, e Ite no Iehova ta ˈna vahine, ta ˈna tamaroa e ta ˈna tamahine i teie nei.

Ohipa pororaa taa ê:

Ua uiuihia e maha piahi o te Haapiiraa Bibilia no te mau taeae faaipoipo e ta ratou vahine e hoê tiaau ratere a te mau Ite no Iehova i New York. Ua faatia ratou mea nafea to ratou tutavaraa i roto i te ohipa pororaa taa ê i te mau oire mea rahi te taata.

I teie mau oire, ua faaohipa te mau tavini Ite no Iehova taime taatoa i te mau iri e vairaa papai turairai, î i te mau papai Bibilia. E nehenehe ïa te feia e hahaere ra e rave i te mau papai, e ui i te tahi mau uiraa Bibilia aore ra e ani i te hoê haapiiraa Bibilia.

I te tahi atu mau oire o New York, i Chicago e i Los Angeles, ua tamata te mau Ite i teie ohipa pororaa taa ê. Hoê noa matahiti i muri iho, ua ani e 2 700 taata i te hoê haapiiraa Bibilia tamoni ore maoti te faaohiparaa i te mau iri e vairaa papai Bibilia.

Pǔpǔ himene a te mau tamarii:

Ua tahe te roimata o te feia i tae mai i te faarooraa i te reo o na 17 tamarii o te himene “E haamaitaihia tei haapao,” papaihia i roto i te buka Himene ia Iehova (Himene no 120).

I muri iho, i roto i te oreroraa parau tatuhaahia, ua hiˈopoa te mau taeae Jackson, Lösch, Pierce, Herd, Lett e Splane, mau melo no te Tino aratai, i te auraa o ta Iesu i parau i roto i te Mataio 24:45-47. Te na ô ra oia:

“O vai hoi te tavini haapao maitai e te paari, ta to ˈna ra fatu i faatavana i to ˈna utuafare ei hopoi atu i ta ratou maa i te hora mau ra? E ao to te reira tavini, to tei roohia mai e to ˈna ra fatu te na reira ra. Oia mau ta ˈu e parau atu ia outou nei, e faariro oia ia ˈna ei tiaau i te mau taoˈa atoa na ˈna ra.”

Ua pahono teie oreroraa parau tatuhaahia i te mau uiraa i muri nei:

Afea Iesu i faatoroa ˈi te “tavini haapao maitai e te paari” i nia i to ˈna utuafare?

A hiˈo na i ta Iesu i parau i roto i te Mataio pene 24. Te haapapu ra te mau irava i muri nei e ua tupu te reira i te tau o te vairaa mai o te Mesia, “te hopea o teie nei ao.”—Irava 3.

  • “Taua anotau pohe ra.”—Irava 29.

  • “Teie nei ui.”—Irava 34.

  • “Te reira mahana e te reira hora.”—Irava 36.

  • “Te hora e tae mai ai to outou Fatu.”—Irava 42.

  • “Te hora manaˈo-ore-hia e outou na e tae mai ai te Tamaiti a te taata nei.”—Irava 44.

Mea papu ïa e ua itehia “te tavini haapao maitai e te paari” i muri aˈe i te haamataraa o te vairaa mai o te Mesia i 1914.

Ua faaite atoa o Iesu e e itehia taua “tavini” ra i te hoê taime mea tano ia uiui: “O vai hoi te tavini haapao maitai e te paari?” I te mea ra e ua fanaˈo te mau aposetolo a Iesu i te mau ô semeio a te varua o te Atua, aita ïa teie uiraa i faahitihia i te senekele matamua. (Korinetia 1, 14:12, 24, 25) Noa ˈtu e ua faatavaihia te mau aposetolo e te tahi atu mau Kerisetiano o te senekele matamua e te varua moˈa, e ere o ratou te “tavini haapao maitai e te paari” ta Iesu i tohu.

Mea tano iho â ïa ia parau e ua faatoroa Iesu i te “tavini haapao maitai e te paari” i nia i “to ˈna utuafare” i te tau o to ˈna vairaa mai, “te hopea o teie nei ao.”

“O vai hoi te tavini haapao maitai e te paari?”

Teie “tavini” ta Iesu e faahiti ra, e ere hoê anaˈe taata. E pǔpǔ râ o te haa amui mai te hoê tino. Ua parau o Iesu e ua faatoroahia teie tavini (1) no te tiaau i te “utuafare” o te fatu e (2) no te horoa ˈtu i te ‘maa pae varua i te hora mau ra.’

Mai 1919 mai â, i vai noa na te hoê pǔpǔ Kerisetiano faatavaihia i te pu rahi a te mau Ite no Iehova o te tiaau i te ohipa pororaa na te ao nei. Ua apiti atoa ˈtu ratou i te faaineineraa e te opereraa i te maa pae varua. I te mau matahiti i mairi aˈenei, ua taa-maitai-hia e o te Tino aratai a te mau Ite no Iehova teie pǔpǔ.

Mea tano ïa ia parau e: ua maitihia teie “tavini haapao maitai e te paari” no te haapao i te “utuafare” o Iesu i 1919. Teie “tavini,” o te hoê ïa pǔpǔ iti taeae faatavaihia o te ohipa ra i te pu rahi i te tau o te vairaa mai o te Mesia. Te apiti roa ra ratou i te faaineineraa e te opereraa i te maa pae varua. Ia ohipa anaˈe teie pǔpǔ ei Tino aratai, te ohipa atoa ra ratou ei “tavini haapao maitai e te paari.”

O vai te “utuafare”?

Ua parau o Iesu e fanaˈo “to ˈna utuafare” i “ta ratou maa i te hora mau.” Te faatamaa ra te “tavini haapao maitai e te paari” i te mau pǐpǐ atoa a Iesu. “To ˈna utuafare,” o te mau pǐpǐ atoa ïa a Iesu: te Kerisetiano faatavaihia taitahi e te mau melo o te “mamoe ê atu.”—Ioane 10:16.

I muri aˈe i te faataaraa ta te taeae orero i horoa no nia i tera tuhaa o ta Iesu parau tohu, ua popo te feia e faaroo ra ma te puai. Ua faaite vetahi i to ratou mauruuru rahi no te mea te faariro nei o Iesu ia ratou mai “to ˈna utuafare.”

Afea Iesu e faariro ai i te tavini ei “tiaau i te mau taoˈa atoa na ˈna ra?”

Ua parau Iesu e na “te fatu” tei tae mai i faariro i te tavini ei “tiaau i te mau taoˈa atoa na ˈna ra.” Afea te Fatu ra o Iesu e tae mai ai?

Ua hurihia te parau “tei tae mai” mai te taˈo Heleni erʹkho·mai. I roto i te mau irava 4244 o te pene 24 a te Huriraa o te ao apî, ua faaohipahia te taˈo “tei tae mai.” Te parau ra ïa o Iesu i to ˈna taeraa mai ei Haava i te tau o te ati rahi.—Mataio 24:30; 25:31, 32.

E faariro o Iesu i te “tavini” ei “tiaau i te mau taoˈa atoa na ˈna ra.” E tupu te reira i mua nei, i te ati rahi.

Eaha ta Iesu “mau taoˈa?”

Ua parau Iesu: “O te mana atoa i te raˈi e te ao atoa nei ua pûpûhia mai tei ia ˈu anaˈe.” (Mataio 28:18) Ta Iesu “mau taoˈa,” e ere noa ta ˈna mau faufaa i te fenua, o te Basileia Mesia atoa râ.—Philipi 2:9-11.

E haamaitai ïa o Iesu i te “tavini haapao maitai e te paari.” Ma te faaora i te melo taitahi o teie pǔpǔ i nia i te raˈi e ma te horoa ˈtu i te tiaraa arii i nia i ta ˈna “mau taoˈa” atoa e vai ra i nia i te raˈi e te fenua nei. Hoê â haamaitairaa no te mau Kerisetiano atoa tei faatavaihia e tei vai taiva ore.—Luka 22:28-30; Apokalupo 20:6.

Ua faaitehia te hoê parau taa ê i te hopea o te oreroraa parau tatuhaahia. I muri aˈe i to ˈna taioraa i te Mataio 28:20, ua parau te taeae Splane: “Eaha te tumu tatou e tiaturi noa ˈi? Na te irava no te matahiti 2013 e pahono ra. Eaha teie irava? Iosua 1:9: ‘E faaetaeta, e ia itoito roa; tei pihai iho to Atua o Iehova ia oe.’”

No te faahope i ta ˈna oreroraa parau, ua na ô te taeae Morris: “Eaha te tupu i te matahiti i mua nei? E haapurorohia te rururaa matahiti i mua nei i te 5 no Atopa 2013 i te mau Piha tairururaa maitihia i Marite e i te tahi atu mau fenua e paraparauhia ra te reo Beretane.”

E haapurorohia te porotarama na roto noa i te reo Beretane. Aita e huriraa na roto i te tahi atu reo.

No te faahope i teie porotarama faaitoito mau e faahiahia roa, ua faaite te feia i tae mai i to ratou huru aau ma te himene “E anaana ˈtu â te parau mau” (Himene no 116), papaihia i roto i te buka Himene ia Iehova. Tano maitai te reira no teie mau parau:

“Ua faatoroa Iesu te tahi tavini

E opere te maa varua.

Ua anaana roa ˈtu â te pˈrau mau,

A putapû ai te aau nei.”