Eaha to roto?

Mau faaho'iraa ê

Ite no Iehova

Tahiti

Haapurororaa na te ao maoti te Internet

Haapurororaa na te ao maoti te Internet

I te Mahana maa 5 no Atopa 2013, e 257 294 taata i e 21 fenua tei faaroo i te 129raa o te rururaa matahiti a te taiete Watch Tower Bible and Tract Society of Pennsylvania. Tei te Piha tairururaa vetahi, area te tahi atu, ua faaroo tia ’tu ïa maoti te Internet. I muri a‘e, i tera noa hebedoma, ua faaroo te tahi atu mau Ite no Iehova i te porotarama i haapurorohia na. Ia taiohia te taatoaraa, 1 413 676 taata ïa tei faaroo i te porotarama i e 31 fenua. O te putuputuraa rahi roa ’‘e ïa teie tei amui mai e rave rahi Ite no Iehova. Mea rahi a‘e ïa te taata i faaroo i te rururaa o teie matahiti i na 1 327 704 taata tei hi‘o i te porotarama taa ê i faatupuhia i Mehiko e i Marite no Ropu i te 28 no Eperera 2013.

Mai te mau matahiti 1920, ua haapuroro te mau Ite no Iehova i ta ratou mau tairururaa na te ara ma te faaohipa i te niuniu paraparau, oia atoa te radio. I teie nei, maoti te mau ravea apî, e nehenehe te taata i te mau vahi atea e faaroo e e ite atoa i te porotarama i tera iho â taime aore ra i muri iho. Ua haere William, te hoê Ite no Iehova i Marite, i te hoê tairururaa i Richmond (Virginie) i 1942 e ua faaroo o ’na i te porotarama tei haapurorohia maoti te niuniu paraparau. Ma te faaau i te reira i teie rururaa matahiti, te parau ra o ’na: “Mea rahi a‘e ta oe e apo mai ia ite mata oe i te porotarama. Aita iho â e faaauraa!”

E rave rahi melo o te mau piha ohipa a te mau Ite no Iehova tei ohipa hoê tiahapa matahiti i te maoro no te faanaho maitai i te radio i nia i te Internet. Ua ohipa ïa ratou e tausani hora i te maoro. I te hopea hebedoma a tupu ai te rururaa, ua haapao maitai te feia aravihi i roto i tera tuhaa i te haapurororaa o te porotarama mai te hoê piha haapao i Brooklyn. I te mea e ua faaitehia te reira i na 15 tuhaa na te ao mea taa ê te hora, e taata noa iho â ïa to ǒ i tera roaraa no te haapao i te tere-maite-raa o te radio. O Ryan hoê o ratou. Ua parau o ’na: “Aita matou i taoto rahi. Mea hoona mau râ te reira a ite ai ehia rahiraa taata tei fana‘o i te porotarama.”

Te mataitai ra i te porotarama i te oire no Katherine, Tuhaa fenua apatoerau, Auteralia