Faatanoraa no te "mode accessibilité"

Search

Maiti te reo

Mau faaho'iraa ê

Eaha to roto?

Ite no Iehova

Tahiti

Haapotoraa o te rururaa matahiti 2014

Ua faatere te Basileia 100 matahiti i teie nei!

Haapotoraa o te rururaa matahiti 2014

I te 4 no Atopa 2014, ua putuputu 19 000 taata no te 130raa o te rururaa matahiti a te Watch Tower Bible and Tract Society of Pennsylvania. Ua tupu i te Piha tairururaa a te mau Ite no Iehova i Jersey City i te mataeinaa no New Jersey i Marite e ua haapuroro-atoa-hia te reira i te tahi atu mau vahi.

O Mark Sanderson, melo o te Tino aratai a te mau Ite no Iehova, te peretiteni. Ua haamata taeae Sanderson ma te parau ua riro te rururaa o teie matahiti ei putuputuraa faufaa mau. A 100 hoi matahiti i teie nei to te Basileia Mesia haamauraahia.

Ua haamana‘o taeae Sanderson toru ohipa faufaa ta te Basileia i rave i te roaraa o na 100 matahiti:

  • Te pororaa na te ao nei. Maoti te haamaitairaa a Iehova, ua poro to ’na nunaa ma te itoito i te parau apî oaoa o te Basileia. Ua maraa noa te numera o te feia poro. I 1914, tau tausani noa taata poro, area i teie matahiti taviniraa 2014, ua hau atu ïa vau mirioni. E tamau tatou i te poro ma te itoito e tae roa i te taime e parau ai Iehova, ua oti.

  • Te parururaa i te pǔpǔ taata faaterehia e te Basileia. Ua patoi te mau tia faatere haapaoraa e poritita ia tatou. Ua tamata atoa i te faaore roa i te mau Ite no Iehova. Ua paruru râ Iehova i te pǔpǔ taata e haamori ra ia ’na. Na te aha e haapapu ra i te reira? E rave rahi upootiaraa tei itehia i mua i te ture, i te Tiripuna teitei roa ’‘e a te Hau Amui no Marite e te Tiripuna Europa o te tiaraa o te taata. Auê haapapuraa te haapao noa ra Iehova ia tatou i teie mahana!

  • Te tahoêraa i te mau huru taata atoa. Noa ’tu eaha to ratou oraraa na mua ’‘e, nunaa e reo, ua tahoê te Basileia i te mau huru taata atoa. Ua tauturuhia ratou ia faaruru i te mau fifi e rave rahi e ua haapiihia ia riro ei pǔpǔ hoê no te haamori i te Atua. Ua na ô taeae Sanderson: “O Iehova ana‘e te nehenehe e faatupu i te semeio mai tera te huru.” Ua haamana‘o oia e fana‘oraa taa ê mau to tei tae mai i teie rururaa matahiti faufaa mau.

A riro ei hoa no Iehova.

O te mau video no te mau tamarii te piti o te tumu parau o te rururaa matahiti vauvauhia e taeae Sanderson. Ua oaoa hoi tatou paatoa i te fana‘oraa i te reira a hau atu piti matahiti i teie nei. Na mua, ua patahia te tahi hoho‘a tavirihia e faaite ra i te mana‘o o te mau tamarii na te ao nei. Ua putapû roa te feia i putuputu i te mau parau haavare ore e haamauruuru a te mau tamarii no ta ratou i haapii maoti tera mau video.

I muri iho, ua patahia te tahi video apî no te mau tamarii, “E tauturu Iehova ia oe ia itoito” na roto i te reo Beretane. Ua faaite tera video 12 minuti mea nafea te tamahine Iseraela i itoito ai i te paraparau no Iehova i te vahine a Naamana. (Te mau arii 2, 5:1-14) Ua tuuhia tera video i nia jw.org i te Monire 6 no Atopa 2014 e te vai ra na roto hau atu 20 reo.

JW Language.

Ua faaite taeae Sanderson te vai ra te tahi faanahoraa apî no te mau matini roro uira. E tauturu te reira i te mau Ite no Iehova e hinaaro e haapii i te tahi atu reo no te poro atu â. I roto i tera faanahoraa apî, e itehia hau atu 4 000 ta‘o e pereota na roto 18 reo. Te imihia ra te ravea ia rahi atu â te mau ta‘o, pereota e omuaraa parau no te taviniraa e no te tahi atu tupuraa.

JW Broadcasting.

Ua oaoa te feia i tae atu i te ite te vai ra te tahi reni Internet haapurororaa na te mau Ite no Iehova. E tamatahia te reira na mua na roto i te reo Beretane. E haapurorohia ta tatou mau video, upaupa e taioraa e au i te teata mai ta tatou pu rahi i Brooklyn, New York, Marite. Hau atu â, e faaineinehia te tahi porotarama i te ava‘e o te vauvauhia e te tahi melo o te Tino aratai aore ra taeae turu i te tomite tiaauhia e te Tino aratai.

Ua faaite taeae Sanderson i te tahi tuhaa o te porotarama haapurororaa matamua. Na Stephen Lett, melo o te Tino aratai, i vauvau e ua faaite te reira eaha te mau ohipa i ravehia ia tupu te opuaraa apî no te reni haapurororaa. Ua haamata JW Broadcasting i te 6 no Atopa 2014 e e nehenehe e mataitai ma te patapata tv.jw.org.

“Ua faatere te Basileia 100 matahiti i teie nei.”

Ua haamana‘o te tahi video faataahia e Samuel Herd, melo o te Tino aratai, mea nafea te Basileia o te Atua i tauturu mai ai ia poro atu â ma te aravihi. Ua faaitehia te tahi mau hoho‘a tahito, tupuraa e uiuiraa mana‘o ravehia e te mau Kerisetiano mea maoro te riroraa ei Ite. Ua faaite atoa te video i tei ravehia no te hamani e no te haapuroro i te Hoho‘a-Darama o te Poieteraa. Oia atoa i te mau matini faata‘i pehe, te tareta pororaa, te mau taahiraa e te poroi papaihia, te mau pereoo haapurororaa e te mau haapiiraa e faaineine ia poro.

E faufaahia anei tatou ia feruri i ta te Basileia i rave i na 100 matahiti? E, e papu atu â hoi tatou e faatereraa mau te reira e e tupu iho â ta ’na mau opuaraa no a muri a‘e.

Himene no te haamori i te Atua.

Ua oaoa te taatoaraa i to David Splane, melo o te Tino aratai, faaararaa ua opuahia e rave i te mau faatanoraa i roto i ta tatou buka himene. Mea rehu te û o te tapoi buka mai to te Bibilia New World Translation. Te faaite ra ïa te maitai o te materia e ravehia i te faufaaraa o te mau himene i roto i ta tatou haamoriraa i te Atua.

Ua faaite atoa taeae Splane ua matara mai te tahi atu mau himene apî taa ê atu i te vai ra i roto i te buka himene. Eita e faufaa ia tiai ia neneihia no te faaohipa ’tu, e tuuhia hoi te reira i nia jw.org ua oti ana‘e.

Ua haapiipii te utuafare o te Betela hoê hebedoma na mua ’tu i na himene e toru no te rururaa matahiti. Ua aratai taeae Splane i te pǔpǔ no te himene “Te faatere nei te Basileia—Ia tae mai!” Ua faaineine-taa-ê-hia te reira no te 100raa o te matahiti o te haamauraa o te Basileia. Ua himene na mua te pǔpǔ e muri a‘e ua tahoê atu te taatoaraa. I muri a‘e, ua na reira atoa no te himene apî “Horoa mai i te itoito.

Uiuiraa mana‘o.

Ua haruharu-ê-na-hia te mau mana‘o o na toru hoa faaipoipo uiuihia e Gerrit Lösch, melo o te Tino aratai. Ua tavini tera mau Kerisetiano i te Betela hau atu ahuru matahiti. Ua faatia ratou e rave rahi tauiraa e haapapu ra te haere ra to te Atua nunaa i mua. Ua faahiti taeae Lösch ua tohu te Bibilia e ravehia te tahi mau faatanoraa i te pae o te faanahonahoraa. Ua faaitoito ïa i te taatoaraa ia pee maite i ta Iehova faanahonahoraa.—Isaia 60:17.

“Te mau faahoho‘araa e te tupuraa rahi a‘e o te reira.”

Na taeae Splane i vauvau i tera oreroraa parau. Ua faataa no te aha ta tatou mau papai i ore i hi‘opoa mai na mua ’‘e i te mau faahoho‘araa e te tupuraa rahi a‘e o te reira.

Na mua ’‘e, ua parauhia ua faahoho‘a e rave rahi tavini taiva ore i roto i te Bibilia i te mau pǔpǔ Kerisetiano o to tatou tau. Ua mana‘o-atoa-hia, ua faahoho‘a e rave rahi aamu Bibilia i te tupu i nia i te mau tavini o te Atua i teie tau. Mea anaanatae iho â ia hi‘opoa i tera mau faahoho‘araa. No te aha i teie nei, mea varavara te mau hi‘opoaraa mai tera i roto i ta tatou mau papai?

E faaite te Bibilia ua riro vetahi taata e tupuraa ei faahoho‘araa no te tahi taata aore ra tupuraa rahi a‘e. I te mau vahi ua faaite-maitai-hia te taairaa o te tahi faahoho‘araa e te tupuraa rahi a‘e o te reira, e farii tatou. Ua na ô taeae Splane: “I te mau vahi râ aita te Bibilia i na reira, e vai mû noa ana‘e.” E tia ia haapae i te paheru hua i te tahi aamu. Hau atu â, eaha te tupu ia hi‘opoa rahi tatou i te mau faahoho‘araa, te auraa e te tupuraa rahi a‘e o te reira? Eita paha te faufaaraa e te maitai o te mau haapiiraa ta te mau aamu Bibilia e horoa maira e haapaohia. E tano teie a‘oraa noa ’tu e tiaturiraa no te ra‘i to tatou aore ra no te fenua nei.—Roma 15:4. *

“E vai ‘ara’ anei oe?”

Na taeae Lett i vauvau i tera oreroraa parau e ua faatano te reira i to tatou ite no nia i te parabole o na ahuru paretenia. (Mataio 25:1-13) Teie to tatou ite no nia i tera parabole i teie nei: O Iesu te tane e faaipoipo e te mau paretenia, o te mau pǐpǐ faatavaihia a Iesu. (Luka 5:34, 35; Korinetia 2, 11:2) I te mau mahana hopea e te ati rahi iho â râ te reira e tupu ai. A faataa ’i i te huru o na paretenia maamaa e pae, aita Iesu i hinaaro e parau e taiva e e monohia te rahiraa o te mau tavini faatavaihia. E faaararaa faufaa mau râ tera. E pae paretenia haapao maitai e e pae mea maamaa, tei te tavini faatavaihia taitahi te faaotiraa e pee i teihea huru. E faaineine e e ara anei? Aore ra e taiva.

E ere i te mea maitai ia paheru hua i te tahi aamu, ia hi‘opoa ma te mana‘o e parau tohu tera e e tupuraa rahi a‘e to te mau tuhaa atoa. E huti mai ana‘e râ i te mau haapiiraa faufaa. E tavini faatavaihia anei aore ra no te mau “mamoe ê atu,” na tatou iho e faaitoito ia faarahi i to tatou ite e ia vai ara. (Ioane 10:16; Mareko 13:37; Mataio 5:16) Eita vetahi ê e nehenehe e na reira no tatou. Na te taata taitahi e “rave i te ora” ma te vai ara e ma te faaitoito i roto i te taviniraa.—Deuteronomi 30:19.

“Te parabole o te mau taleni.”

O Anthony Morris, melo o te Tino aratai, tei paraparau i muri iho. Ua tauturu oia i te taatoaraa ia taa i te tahi faatanoraa no nia i te parabole o te mau taleni. (Mataio 25:14-30) I teie nei, ua taa ia tatou e haamaitai te fatu o tera faahoho‘araa (Iesu) i te mau tavini (ta ’na mau pǐpǐ faatavaihia taiva ore i te fenua nei) i muri a‘e ia tae mai e ia rave oia ia ratou no te ora i te ra‘i. A faaite ai i te tupu no te “tavini ino e te faatau,” aita Iesu i hinaaro e parau e taiva te rahiraa o ta ’na mau pǐpǐ faatavaihia. E faaararaa râ tera, e titauhia hoi ia ohipa maite e ia haapae i te faaite i te huru e te haerea o te tavini ino.

Eaha te haapiiraa e huti mai i teie parabole? I roto i te faahoho‘araa, ua horoa te fatu i te tao‘a faufaa mau i ta ’na mau tavini. Ua horoa atoa Iesu i ta ’na mau pǐpǐ i te tahi mea faufaa no ’na, te hopoia e poro e e faariro i te taata ei pǐpǐ. Te hinaaro ra oia ia ohipa maite tatou paatoa i roto i te pororaa ia au i to tatou tupuraa. Ua haapopou taeae Morris i te taatoaraa no to ratou itoito i roto i te mau ohipa taaihia i te Basileia.

“O vai tei fatata i te aro i to te Atua nunaa?”

Tera te tumu parau o te oreroraa parau hopea vauvauhia e Geoffrey Jackson, melo o te Tino aratai. Ua hi‘opoahia te aroraa e fatata maira arataihia e Goga no Magoga i nia i te nunaa o te Atua.—Ezekiela 38:14-23.

Na mua ’‘e, i mana‘o na tatou e i‘oa ê Goga no te Diabolo ra o Satani i muri a‘e râ to ’na tiavaruraahia mai te ra‘i mai. Ua haaferuri taeae Jackson maoti e rave rau uiraa e hiti mai ia au i tera faataaraa. Ei hi‘oraa, ua tohu Iehova ia pau Goga, e amuhia o ’na e “te mau manu pererau taehae e rave rahi atoa ra, e te mau manu o te aru ra.” (Ezekiela 39:4) Ua faaite atoa Iehova e faataahia te tahi vahi tanuraa i te fenua nei no “Goga e to ’na atoa ra taata e rave rahi.” (Ezekiela 39:11) E nafea râ te reira ia tupu i nia i te tahi melahi? E tuuhia Satani i roto i te abuso 1 000 matahiti, eita râ oia e amuhia aore ra e tanuhia. (Apokalupo 20:1, 2) Hau atu â, ia hope na 1 000 matahiti i roto i te abuso, e tuuhia Satani e “e reva oia e haavare haere i te taata e parahi i na otia e maha o te fenua nei, ia Goga e ia Magoga.” (Apokalupo 20:7, 8) Eita hoi ta Satani e nehenehe e haavare ia Goga mai te peu o ’na tera.

Ua faataa taeae Jackson te faahoho‘a ra Goga no Magoga i te mau nunaa atoa e tahoê no te aro i te mau tavini o te Atua. Hoê ana‘e ïa te aroraa a Goga, te aroraa a te “arii no apatoerau” e te aroraa a “te mau arii o te ao nei.”—Daniela 11:40, 44, 45; Apokalupo 17:12-14; 19:19.

O vai “te arii no apatoerau”? E tiai ana‘e no te ite. E puai mai râ to tatou faaroo a ite ai te rahi noa ’tura to tatou ite no nia i te fatata roa i te tupu. Eita tatou e mǎta‘u i te aroraa i nia i to te Atua nunaa. Ua ite hoi tatou ia na reira Goga no Magoga, e pau oia e e haamou-roa-hia, area te nunaa o te Atua, e ora e a muri noa ’tu. *

No te faaoti.

Ua faaara taeae Sanderson ua matara mai te Bibilia nainai o te New World Translation. Te faaineine-atoa-hia ra te haruharuraa o te taioraa Bibilia. E faaohipahia e rave rau reo no te faatano i te mau parau a te mau taata i roto i te aamu Bibilia. E haamatahia na mua te buka Mataio e e tuu-mǎrû-noa-hia te reira i nia jw.org.

Ua faaite atoa taeae Sanderson ua riro te Salamo 106:1 ei irava matahiti no 2015. Te na ô ra: “E arue ia Iehova; e maitai hoi to ’na.” Ua faaitoito oia i te taatoaraa ia feruri no te aha e faaite ai i te mauruuru i te mau mahana atoa.

Na te toru o te mau himene apî, “O Iehova to oe i‘oa,” i opani i te rururaa. I nia i te tahua, ua amui na melo e hitu o te Tino aratai i te pǔpǔ himene. Ua tahoê atoa ’tu te reo o te taatoaraa i tae atu no tera himene nehenehe mau. Auê faaotiraa maitai no tera rururaa faufaa mau!

^ par. 22 Ua niuhia teie e na oreroraa parau e piti i muri iho i nia i te mau tumu parau o Te Pare Tiairaa 15 no Mati 2015.

^ par. 30 Ua niuhia teie oreroraa parau i nia i te tahi tumu parau o Te Pare Tiairaa 15 no Me 2015.

No te ite atu â

Na 100 matahiti o te hoê hoho‘a tavirihia

A 100 matahiti te “Hoho‘a Darama” i te faaiteraahia no te taime matamua. Ua faaineinehia te reira ia tiaturi atu â te taata i te Bibilia ei Parau a te Atua.

Na 100 matahiti o te upaupa te arue nei i te Atua

Nafea te mau Ite no Iehova i faaohipa ai i te upaupa e te himene no te haamori i te Atua?