Faatanoraa no te "mode accessibilité"

Search

Maiti te reo

Mau faaho'iraa ê

Eaha to roto?

Ite no Iehova

Tahiti

Tufaraa parau tuite o te 133raa o te piha Haapiiraa Bibilia no Gileada

Mahana maa 8 no Tetepa 2012

Tufaraa parau tuite o te 133raa o te piha Haapiiraa Bibilia no Gileada

I muri a‘e i e pae ava‘e faaineineraa tuutuu ore i te Haapiiraa Bibilia no Gileada, ua fana‘o e 48 piahi i ta ratou tufaraa parau tuite i te Pu Haapiiraa a te Watchtower, i Patterson, i New York. Ua putuputu mai e 9 694 taata no te porotarama tufaraa parau tuite: melo utuafare aore ra hoa.

Mai 1943 mai â, ua faaineine te haapiiraa no Gileada e 8 000 tiahapa taata poro aravihi no te taviniraa mitionare. Ua tauturu teie haapiiraa ia haapuai i te faaroo o te mau piahi maoti te faaohiparaa i te Bibilia ei buka faufaa roa. Oia atoa, ia faatupu i te mau huru maitatai Kerisetiano no te aravihi atu â i roto i te taviniraa mitionare.

“A haamana‘o maitai i te mau mea popouhia ra.” Ua haamata o Anthony Morris, melo o te Tino aratai a te mau Ite no Iehova e peretiteni o te porotarama, ma te faahiti i te Philipi 4:8: “Te mau mea popouhia ra, . . . e haamana‘o i taua mau mea ra.”

Ua faaite te taeae Morris e e tapea tatou i te hoê huru feruriraa maitai noa ’tu teie ao aroha ore ma te haamana‘o i te mau mea popouhia ra. Ua parau o ’na: “A imi maite i teie mau mea popouhia ra e a riro ei taata herehia.”

Te horoa mai ra to tatou Metua i te ra‘i i te hoê hi‘oraa nehenehe mau ma te ore e hi‘o noa i to tatou mau hape. (Salamo 130:3) Ua parau te taeae Morris: “Eiaha e tiatonu i nia i te mau hape a to outou mau taeae e tuahine. A riro noa râ ei taata herehia.”

“A fana‘o i te ite, eiaha râ e haapaari rahi hua.” Ua vauvau o Harold Corken, melo o te Tomite amaa no Marite, i ta ’na tumu parau niuhia i nia i te Koheleta 7:16. Te hinaaro nei te Atua e ia faaohipa tatou i to tatou ite ma te tano, eiaha râ “no te faateitei ia tatou iho.”

Ua faataa atoa te taeae Corken i te faufaaraa ia faaite i te here ia horoa ana‘e tatou i te tahi a‘oraa aore ra ia a‘o tatou. Eiaha e titau ia vetahi ê hau atu i ta te Atua e titau ra ia ratou. Ua parau o taeae Corken: “Ia faaohipa maitai outou i te paari, te ite e te taa-maite-raa, e hinaaro mau â to outou mau taeae e apiti e o outou.”

“Eiaha e haamoe i ta [te Atua] ra ohipa.” (Salamo 78:7) Ua haamata o Guy Pierce, melo o te Tino aratai, i ta ’na tumu parau ma te faataa e e ohipa te haerea maitai aore ra ino o te tamarii i nia i to ’na mau metua. (Maseli 20:11) Hoê â huru no to tatou haerea i nia i to tatou Metua i te ra‘i. “O te mea teie e itea ’i te tamarii a te Atua, e te tamarii a te diabolo: o tei ore i rave i te parau-tia ra, e ere ïa i to te Atua.”—Ioane 1, 3:10.

Ua haapapu te taeae Pierce e ua titau-manihini-hia te mau piahi i Gileada no to ratou mau huru maitatai Kerisetiano, mai te haehaa. Ua haamana‘o faahou oia ia ratou ia vai haehaa noa. Aita te mau mea ta ratou i haapii e faateitei ia ratou. Ua ineine maitai a‘e râ ratou no te turu i te auhoêraa i roto i te huitaeae i te ao nei e ia riro ei hi‘oraa no to ratou haehaa. (Salamo 133:1) Ua parau te taeae Pierce: “I teie nei, ua ite maitai a‘e outou i te mau haapiiraa Bibilia. E nehenehe ïa outou e faaohipa i te reira ia piri noa ’tu â to outou taairaa e o Iehova.”

“O tei au mau ia matou ra, o ta matou ïa i rave iho nei.” Ua ani o William Samuelson, tiaau o te haapao ra i te mau haapiiraa Kerisetiano: “Eaha ta tatou e rave mai te peu e e horoahia mai i te hoê toroa aita râ e tano ra i to tatou iho mau hinaaro, huru aau aore ra ta tatou mau opuaraa?” E nehenehe tatou e feruri i ta te Luka 17:7-10 e parau ra: “Ia ravehia e outou te mau mea atoa i faauehia ’tu ia outou na, e na ô outou, Aita a matou faufaa, a to mau tavini nei i hopoi atu; o tei au mau ia matou ra, o ta matou ïa i rave iho nei.” Ia faaauhia e to tatou Fatu ia Iehova, “aita a matou faufaa.”

A tau hebedoma to te mau piahi raveraa i te mau faaineineraa i roto i te mau piha haapiiraa. No vetahi, e ere i te mea ohie. Ua parau râ te taeae Samuelson: “Ua rave outou i tei faauehia ’tu i te rave. E i teie nei ua ite outou i te mau haamaitairaa, ua rahi roa mai to outou faaroo.” Ua faaoti oia ma te parau: “E tiaau outou na te Atua, a tamau i te haafaufaa i te hopoia faahiahia mau: te taviniraa i te Teitei roa ’‘e o te ao taatoa.”

“A haamana‘o i ta Iehova mau parau fafau ia faaruru oe i te mau fifi.” Ua faaara o Sam Roberson, taeae mono i te tiaau e haapao ra i te mau haapiiraa Kerisetiano i te mau piahi e e toaruaru ratou i te tahi taime. No reira, ua ani oia ia ratou ia haamana‘o i te mau aamu Bibilia o te mau tavini ta Iehova i faaitoito. Ei hi‘oraa, ua haapapu o Mose ia Iosua: “E ore [Iehova] e faarue ia oe, e ore e taiva ia oe.” (Deuteronomi 31:8) I te pae hopea o to ’na oraraa, ua parau o Iosua: “Aore roa te hoê o te mau mea maitatai ta to outou Atua ta Iehova i parau mai ia outou ra i ore i te tia.”—Iosua 23:14.

Ua parau te Atua ra o Iehova i ta ’na mau tavini: “E ore roa vau e faarue ia oe, e ore, e ore roa ’tu.” (Hebera 13:5) Ua haapapu mai te Atua e e rave oia ia au i te auraa o to ’na i‘oa Iehova (“Na ’na e faariro”) e e riro oia mai ta ’na e hinaaro no te aupuru i ta ’na mau tavini. Ua parau te taeae Roberson: “Eiaha e faarue, eiaha e toaruaru, eiaha e hema. A haamana‘o i te reira: eita, eita, eita roa ’tu o Iehova e faarue ia oe.”

“Ua reva to ratou reo i te mau fenua atoa.” (Roma 10:18) Arataihia e te taata haapii no Gileada ra o Mark Noumair, ua faatia e ua hauti te mau piahi no te fenua rau i te tahi mau tupuraa ta ratou i farerei i roto i te taviniraa i te tuhaa fenua no Patterson. Ei hi‘oraa, ua oaoa roa na hoa faaipoipo no Afirika Apatoa i te farerei e toru vahine no to raua fenua e i te paraparau ia ratou na roto i te reo Zoulou e Xhosa. Ua farerei te tahi atu na hoa faaipoipo no Sri Lanka i te hoê taata no Initia, area ra ta ’na vahine e tamahine te ora ra ïa i Sri Lanka. Aita taua taata ra i ite a‘enei i te Bibilia. Ua oaoa roa teie na hoa faaipoipo i te horoa ’tu hoê o ta raua Bibilia.

“Ia au . . . i te mau ohipa maitatai atoa ra.” Ua faanaho o Gene Smalley, taeae tauturu i te Tomite o te Papairaa, i te tahi uiuiraa mana‘o e e piti taeae e ta raua vahine no Sierra Leone tei fana‘o i ta ratou tufaraa parau tuite. Ua faatia ratou e i te mea hoi e aita e pape i te fare, e haere ïa ratou e tii i te reira i te mau mahana atoa. Mea iti râ tera mau fifi ia faaauhia i te oaoa ta ratou i fana‘o a faatere ai e 50 haapiiraa Bibilia. Ua mauruuru roa teie na mitionare e maha i te tauturu a te haapiiraa no Gileada ia au ratou i te mau ohipa maitatai atoa i roto i ta ratou mau hopoia i mua nei.—Timoteo 2, 3:16, 17.

“Te mau papu e tae noa ’tu i te hopea ra e hau atu â.” Ua haamata o Gerrit Lösch, melo o te Tino aratai, i ta ’na oreroraa parau faufaa ma te faataa e nafea te feia i roto i te hoê hororaa atea e faatano ai i to ratou vitiviti no te tae i te reni tapaeraa. I roto i te hoê tuaro, hoê noa te upootia. Area i roto i te hororaa Kerisetiano, o te mau papu ïa e tae noa ’tu i te hopea te upootia.

Te faaoromai, o te taviniraa ïa i te Atua ma te tamau, ma te ore e faaea i te tiaturi ia faaruru ana‘e tatou i te mau ati, hamani-ino-raa, faataupupuraa aore ra toaruaruraa. Ua parau o Iesu: “Area te mau papu e tae noa ’tu i te hopea ra, oia te ora.” (Mataio 24:13) Mea mahanahana mau ia ite e te haapao mai ra o Iehova e o Iesu i to tatou faaoromai! Ua faaite te taeae Lösch e rave rahi mana‘o no te tauturu ia tatou ia faaoromai noa ’tu te mau fifi. Teie te tahi mau mana‘o:

  • A pure i te Atua, “no ’na te faaoromai” e te “tauturu mai ia tatou i tera mahana, i tera mahana.”—Roma 15:5; Salamo 68:19.

  • A faaoti papu e vai taiva ore, ma te tiaturi e “e parau mau ta te Atua e ore oia e vaiiho noa ia outou ia ati, maori râ o te tia ia outou ia faaoromai ra; e faatupu atoa oia i te haapuraa i taua ati ra, ia tia ia outou ia faaoromai.”—Korinetia 1, 10:13.

  • A tapea noa i to oe tiaturiraa Kerisetiano. ‘Ua faaoromai Iesu i te pou haamauiuiraa no te oaoa i tuuhia mai i mua ia ’na.’—Hebera 12:2.

Ua haapapu te taeae Lösch e ere ïa te taime no te faarue i ta tatou hororaa a piri roa ’i tatou i te reni hopea! “A horo tamau maite ai i teie nei hororaa i mua ia tatou nei.”—Hebera 12:1.

Ua faaoti hoê o te mau piahi i te porotarama faahiahia mau ma te taio i te hoê rata papaihia e te mau piahi atoa. Te faaite ra te reira i to ratou mauruuru no te faaineineraa au mau ta ratou i fana‘o. Te faataa atoa ra te rata e maoti te haapiiraa hohonu o te mau tupuraa i te roaraa o te tau tei papaihia i roto i te Bibilia, ua rahi atu â to ratou ite no nia i to te Atua hinaaro e ua puai atu â to ratou faaroo. Te na ô ra ratou: “Ua faaoti papu matou e faaohipa i te mau haapiiraa maitatai ta matou i fana‘o.”