Eaha to roto?

Mau faaho'iraa ê

Ite no Iehova

Tahiti

Taime faufaa o te tufaraa parau tuite na te 137raa o te piha haapiiraa no Gileada

Taime faufaa o te tufaraa parau tuite na te 137raa o te piha haapiiraa no Gileada

I te 13 no Tetepa 2014, i te pu no te haapiiraa a te mau Ite no Iehova i Patterson, New York, ua tufahia te mau parau tuite na te 137raa o te piha haapiiraa no Gileada. Te fa o teie haapiiraa, o te faaineineraa ïa i te mau Ite no Iehova o tei aravihi a‘ena, ia haamau i te mau amuiraa apî aore ra ia haere i roto i te mau amaa i tonohia ’i ratou. Ia amuihia, 12 333 taata tei pee i te porotarama i Patterson aore ra na roto i te haapurororaa video, i te mau fenua Jamaïque, Kanada, Marite e Porto Rico.

Na Samuel Herd, melo o te Tino Aratai a te mau Ite no Iehova, i peretiteni i teie tufaraa parau tuite. No te haamata i ta ’na oreroraa parau, ua faaite oia e mea hau ê to Iehova mau mana‘o i to tatou. (Isaia 55:8, 9) Ua parau oia ia ratou e i muri a‘e e pae ava‘e i te faaîraa i to ratou feruriraa i to te Atua mau mana‘o, mea rahi â ta te mau piahi no Gileada e haapii, mai te huru ra e ‘e vahi iti haihai noa ta ratou i ite i nia i te Atua.’ (Ioba 26:14) Ua haamana‘o atoa taeae Herd e e maitaihia tatou i te mau taime atoa e putuputu ai no te hi‘opoa i to te Atua mau mana‘o. Aita atoa teie putuputuraa i faanahohia no te tufaraa i te mau parau tuite i taa ê roa.

‘Area ta te Varua e faatupu ra, o te faaoromai ïa.’ (Galatia 5:22) Ua faahiti John Larson, melo no te Tomite amaa no Marite, e piti ravea e nehenehe ai tatou e faatupu i te faaoromai, te hoê ïa o na huru maitatai ta te varua o te Atua e faatupu. A tahi, mea titauhia te faaoromai ia haapii e ia tauturu mai Iehova ia tatou ia mau papu i roto i te faaroo. (Petero 1, 5:10) O Aberahama te hi‘oraa maitai no te faaoromai o ta Iehova i haapii ia ’na e a faatupu roa ’i i ta ’Na parau fafau no nia ia ’na.—Hebera 6:15.

Te piti, mea titauhia ia faaoromai i nia ia tatou iho. I muri a‘e i te Haapiiraa Gileada, e nehenehe ta te mau piahi e titau rahi ia ratou iho ia aravihi atu â. Ia haere ratou i te vahi i tonohia ’i ratou e ia mana‘o ratou e eita ratou e maitai oioi mai, e nehenehe ratou e ui, ‘Eaha to ’u fifi?’ Ma te faahiti i to ’na iho tupuraa, ua haapapu atu taeae Larson e e nehenehe ratou e faaruru i te mau fifi ma te faaite i te faaoromai ia ratou iho e ma te tavini atu â a vaiiho ai i te Atua ia faaoti i ta ratou faaineineraa.—Hebera 6:11, 12.

“Ia vai haehaa to outou aau e ia ora noa e a muri noa ’tu.” Ua niu te taeae Anthony Morris, melo o te Tino aratai, i ta ’na oreroraa parau i nia i te Salamo 22:26 o te na ô ra i te pae hopea o te irava, ‘ia ora noa to outou aau e a muri noa ’tu.’ No te fana‘o i teie haamaitairaa, mea titauhia te haehaa. Ua faataa te taeae Morris, e ia ore tatou e faaite i te haehaa, mea faufaa ore tatou no Iehova. E nehenehe tatou taitahi, oia atoa te mau Kerisetiano mea maoro i roto i te parau mau, e haamoe i te faufaaraa ia pee i te hi‘oraa o Iesu Mesia.—Petero 2, 1:9.

Te horoa mai ra te Bibilia i te mau hi‘oraa o tei faaite i te haehaa e o tei faaite i te teoteo. Ma te aau teoteo, ua hinaaro Heroda Ageripa ia faahanahanahia o ’na, eiaha râ i te Atua. Ua tairi te melahi a te Atua ia ’na, “pau atura oia i te amuhia e te iro,” aore ra toe. (Ohipa 12:21-23) Area râ no Petero, i muri a‘e i to Iesu a‘oraa ia ’na no te mea ‘aore hoi o ’na i au i ta te Atua ra, o ta te taata râ ta ’na i au,’ aita Petero i amuamu aore ra i riri. (Mataio 16:21-23) Ua farii oia i te a‘oraa e ua riro oia ei hi‘oraa o te haehaa.—Petero 1, 5:5.

E riro mai vetahi mau piahi ei melo o te Betela i roto i te mau amaa a te mau Ite no Iehova. Ua faaara ’tu taeae Morris ia ratou e ia ore ratou e faaite i te haehaa, eita ratou e oaoa i roto i ta ratou taviniraa. Tera râ, mea fifi i te tahi taime ia ite e aita tatou e faaite faahou i te haehaa. No te faataa i teie mana‘o, ua faahiti taeae Morris i te hi‘oraa o te hoê matahiapo o tei a‘ohia e rave matahiti i teie nei no to ’na oreraa i faaite i te haehaa. Ua papai teie matahiapo i te amaa: “Aita hoi taata haehaa ’tu â ta ’u i ite maori râ o vau ana‘e iho.” Ua faaitoito atu taeae Morris ia ratou ia patoi i tera huru mana‘o. E vai haehaa noa ratou ia ore ratou e faateitei ia ratou no te tahi tiaraa ta ratou i fana‘o e ia taa ia ratou e tei ia Iehova e ia Iesu ana‘e te mana.

‘Aore te Atua e horoa riirii mai i te varua no ’na.’ (Ioane 3:34) E taeae haapii no Gileada o Michael Burnett. Ua haamana‘o oia i te mau piahi e e tauturu te varua mo‘a ia ratou ia faaruru i te mau fifi aore ra i te mau feaaraa o ta ratou e farerei i te vahi e tonohia ’i ratou. Ua nehenehe Bezaleela, maoti te varua mo‘a, e rave maite i ta ’na hopoia e patu i te sekene. (Exodo 35:30-35) Aita noa te varua mo‘a i faaaravihi atu â ia Bezaleela, ua tauturu atoa râ te reira ia ’na ia haapii atu ia vetahi ê i ta ’na i ite. E nehenehe atoa te varua mo‘a e na reira i nia i te mau piahi, ia pee iho â râ ratou i te haapiiraa e itehia i roto i te mau Papai o ta ratou i haapii i te roaraa o ta ratou haapiiraa.

I te tau o Bezaleela, e tuhaa rahi atoa ta te mau vahine Iseraela i roto i te paturaa o te sekene. (Exodo 35:25, 26) Oia atoa, ua riro te mau tuahine ei “vahine aau paari” a turu ai i ta ratou tane. Ua faaoti te taeae Burnett i ta ’na oreroraa parau ma te horoa i teie faaueraa i te mau piahi: “Ia aifaito noa to outou aravihi i te haehaa e te hoê feruriraa auraro. Ia na reira outou, e horoa maite mai Iehova i to ’na varua.”

“E hinaaro outou e ori e o vau?” Ua haamataratara o Mark Noumair, taeae tauturu o te Tomite o te haapiiraa, i ta ’na tumu parau ma te faaohipa i te hi‘oraa o te arii Davida a faaho‘i mai ai oia i te afata o te faufaa i Ierusalema. (Samuela 2, 6:12-14) Ma te haehaa, ua ori o Davida i pihaiiho i “te mau tavini vahine no to ’na ra mau tavini” a hopoihia mai ai i te afata. (Samuela 2, 6:20-22) Aita roa ’tu i moe i teie mau tavini vahine i te mahana a ori ai te arii Davida e o ratou. Ua faaitoito atu taeae Noumair i te mau piahi ia ‘ori e te mau tavini vahine.’ Ua ani atu oia ia ratou: “Ua matauhia anei outou ia tauturu i te feia mea iti aore ra aita ta ratou e hopoia? Te haafaufaa anei outou i te tahi atu no to ratou mau huru maitatai pae varua?”

E nehenehe te mau piahi e pee i to Iehova hi‘oraa, ia tamau ratou i te faaite i te taiva ore i roto i tera tuhaa. (Salamo 113:6, 7) Noa ’tu e aita vetahi e faaite ra i te haehaa, eiaha te mau piahi e vaiiho i te huru tia ore o vetahi ê e haafifi ia ratou. Ua parau te taeae Noumair: “A mana‘o e ere outou i te hoê taata faufaa roa.” Ua na ô â oia: “Mai ta Iehova i rave i nia i ta ’na mau mamoe, e na reira atoa outou.”

“A faaohipa i te mau taime atoa no te poro.” Ua faahiti William Samuelson, o te tiaau ra i te haapiiraa no te taviniraa Kerisetiano, i te hi‘oraa o te aposetolo Paulo o te faaohipa ra i te mau taime atoa no te poro i te parau apî oaoa. (Ohipa 17:17) Ua faaite te taeae Samuelson i te mau faahi‘oraa ta te mau piahi i ite i roto i te pororaa i Gileada. Ei hi‘oraa, ua farerei na hoa faaipoipo i te hoê vahine e ohipa ra i roto i te hoê fare hoohoo maa. Ua tiai raua ia iti roa mai te taata no te faaite i te video No te aha e haapii ai i te Bibilia? Ua faaite atoa raua i teie vahine e e nehenehe ta ’na e ite i te mau haamaramaramaraa na roto i to ’na iho reo, oia hoi te reo Lao i nia jw.org. Ua ho‘i mai na hoa faaipoipo e farerei ia ’na ia anaanatae noa teie vahine.

“Ia vata noa outou no te taviniraa o te Basileia.” Ua uiui William Nonkes, o te ohipa ra i roto i te Tuhaa taviniraa i te amaa i Marite, e maha piahi. Ia au i te mana‘o o te Isaia 6:8, ua vata a‘ena ratou no te taviniraa o te Basileia. Maoti râ teie haapiiraa, ua ineine ratou i te horoa rahi atu â. Ua faataa te tuahine Snolia Maseko, maoti te haapiiraa i Gileada, ua nehenehe oia e ite i te mau tuhaa te titauhia ia ’na ia haamaitai atu â. Oia hoi, ma te faaohipa maitai i te taime i muri a‘e i te mahana pororaa taatoa. Ua parau oia: “Ua turai teie haapiiraa ia ’u i te hoê otia aita vau i mana‘o e e nehenehe ta ’u e na reira.” Ua taa atoa i te taeae Dennis Nielsen mea nafea te mau parau o te Zephania 3:17 i tauturu ai ia ’na ia ore e haaparuparu i roto i te taviniraa. Ua parau taeae Nielsen: “Ia poro vau e aita e itehia ra te maitairaa, ia haamana‘o vau e e oaoa roa Iehova, o vau atoa ïa.”

“A hi‘o na i te mau manu o te reva.” (Mataio 6:26) Ua horoa Stephen Lett, melo o te Tino aratai, i te oreroraa parau faufaa o te porotarama. Ua niuhia i nia i ta Iesu i haapii o te titauhia ia “hi‘o” maite i te mau manu. Ua horoa taeae Lett e rave rahi haapiiraa ta tatou e nehenehe e huti mai.—Ioba 12:7.

Ei hi‘oraa, mai ia Iehova i faaamu i te mau manu, e haapao atoa mai oia ia tatou. E melo tatou no te “fare o te Atua” e ua haapapu mai oia e e ‘hamani maitai oia i to ’na ihora.” (Timoteo 1, 3:15; 5:8) Parau mau, mea titauhia ia rave tatou i ta tatou tuhaa. E imi te mau manu i te maa ta te Atua i horoa. No tatou atoa, mea titauhia ia ‘mata na tatou i te imi i te basileia o te Atua’ ia nehenehe tatou e fana‘o i ta ’na haamaitairaa.—Mataio 6:33.

Ua faataa atoa taeae Lett e e faaara te mau manu e rave rahi ia ite ratou i te fifi ma ta ratou ta‘i. No tatou atoa, e faaara tatou i te tahi atu mai te peu e mea faufaa, ei hi‘oraa, ia ‘rave te hoê taeae i te hapa.” (Galatia 6:1) Ma ta tatou pororaa, te faaara nei tatou i te taata e te fatata mai ra “te mahana rahi o Iehova.” (Zephania 1:14) I roto i te tahi atu hi‘oraa, ua faataa te taeae Lett e rere te mau manu ratere i nia a‘e i te mau mou‘a. Mai ia ratou, maoti ta Iehova tauturu, e nehenehe tatou e faaruru i te mau fifi e au ra e eita e maraa ia tatou.—Mataio 17:20.

Faahopearaa. I muri a‘e i te horoaraa i te mau parau tuite i te mau piahi, ua taio hoê o ratou i te tahi rata no te faaite i to ratou mauruuru. I roto i teie mau parau hopea, ua faataa taeae Herd e ua faaauhia i te tuuraa i to Iehova mau mana‘o i roto i to tatou aau i te patitiraa i te mau naero i nia i te mau purumu auri. E titauhia e rave rahi tupairaa no te faaô maitai i te naero i roto. No te mau piahi atoa, e mea titauhia ia ratou ia tamau i te feruri i nia i ta ratou i haapii i Gileada. Ua parau taeae Herd: “A rave i te taime no te faaô maite te mau haapiiraa i roto i to outou aau.” Ua na ô â oia: “A faaau i te mau mana‘o o te Atua, i reira outou e riro ai ei haamaitairaa.”