Eaha to roto?

Mau faaho'iraa ê

Ite no Iehova

Tahiti

Horoaraa parau tuite i te 138raa o te piha haapiiraa no Gileada

Horoaraa parau tuite i te 138raa o te piha haapiiraa no Gileada

I te 14 no Mati 2015, ua fana‘o te 138raa o te piha haapiiraa Bibilia no Gileada i ta ratou parau tuite i te pu haapiiraa no Patterson i New York. Hau i te 14 000 taata tei faaroo i teie porotarama haapurorohia na te tahi atu mau vahi. Ua patahia mai na mua e 4 himene apî o te Basileia, tei himenehia i muri a‘e. *

Na Geoffrey Jackson, melo o te Tino aratai a te mau Ite no Iehova, i peretiteni mai i teie porotarama. Ua faaitoito oia i te mau piahi eiaha roa e tapea noa na ratou i ta ratou i haapii, ia faaite atoa râ ia vetahi ê.—Timoteo 2, 2:2.

Ua faahiti Taeae Jackson i to Mose hi‘oraa. I riro na to ’na tiahapa ei vahi haamoriraa a te nunaa Iseraela. I te otiraa râ te sekene, te reira ïa te pu o te haamoriraa mau. Aita Mose i faatiahia ia tomo i roto i te vahi Mo‘a Roa o te sekene, o te tahu‘a rahi noa râ. Aita Mose i amuamu, ua turu noa râ oia ia Aarona ei tahu‘a rahi ma te taiva ore. (Exodo 33:7-11; 40:34, 35) Teie ïa te haapiiraa ta Taeae Jackson i horoa mai: “A poihere i ta oe mau fana‘oraa, eiaha roa e tapea noa na oe.”

“E mǎta‘u anei oe i te ahehe o te hoê rauere?” Te mana‘o tumu ïa o te oreroraa parau a Kenneth Flodin, tauturu o te Tomite haapiiraa a te Tino aratai. Eita e ore e e farerei te mau piahi i te tahi mau tupuraa mǎta‘uta‘u, mai te hamani-ino-raa aore ra te tahi atu hopoia fifi. Ua rave Taeae Flodin i te Levitiko 26:36 a a‘o ai oia i te mau piahi ia faaau i teie mau tupuraa i te hoê rauere mǎrô, eiaha râ i te hoê ohipa eita e maraa ia ratou. Ua faahiti atoa oia i te hi‘oraa o te aposetolo Paulo, o tei noaa i te faaoromai e rave rahi fifi no to ’na tiaturiraa ia Iehova.—Korinetia 2, 1:8, 10.

“Eaha ta oe e imi ra?” Na Mark Sanderson, melo o te Tino aratai, i horoa i teie oreroraa parau. Ua tatara mai oia i te Maseli 13:12 o te parau ra: “Ia faaroaroahia te tao‘a tiaihia ra e fatimauu te aau.” E rave rahi taata aita e oaoa nei, te haamau nei hoi ratou i te mau fa eita roa ’tu e raea ia ratou, mai te riroraa ei taata tao‘a rahi aore ra tuiroo.

I te tau o Iesu, aita to vetahi mana‘o no nia ia Ioane Bapetizo i tano. (Luka 7:24-28) Ei hi‘oraa, ua mana‘o ratou e e philosopho oia o te faaarearea ia ratou i te tahi mau haapiiraa fifi ia taa. E poroi papu râ ta Ioane i faaite atu, o te parau mau. Peneia‘e ua mana‘o te tahi atu e taata faahiahia oia, mai to te taata veve râ to ’na ahu. E peropheta o Ioane, ua na mua atoa ’tu o ’na i te Mesia!—Ioane 1:29.

Ua faaitoito Taeae Sanderson i te mau piahi ia tapi i te mea maitai. Eiaha râ ratou e tapi i te tiaraa aore ra te tahi haamaitairaa taa ê. E faaohipa râ ratou i ta ratou i haapii mai no vetahi ê, ma te faaite atu ta ratou i haapii i Gileada, ma te haapuai i te faaroo o to ratou mau taeae e tuahine e ma te here ia ratou. Ua parau Taeae Sanderson: “A riro ei tavini haehaa no to outou mau taeae e tuahine e a tutava i te rave i to Iehova hinaaro, eita outou e tatarahapa.”

“A faatamaa i te feia e poia ra.” Te mana‘o tumu teie o te oreroraa parau a James Cauthon, orometua haapii o te tuhaa haapiiraa Bibilia. Ua faahiti oia e pauroa te taata e hinaaro ia herehia, ia haamauruuruhia e ia haapopouhia ratou. O Iesu atoa hoi tei hiaai i te reira! Ua haamâha Iehova i taua hiaai ra ma te tamahanahana ia ’na i to ’na bapetizoraa.—Mataio 3:16, 17.

Ua horoa mai Iehova i te ravea no te faaitoito e haapuai ia vetahi ê na roto ïa i ta tatou mau parau. E hinaaro oia ia faaohipa tatou i tera ravea. (Maseli 3:27) Ua parau Taeae Cauthon: “A haapii i te imi i te mea maitai i roto ia vetahi ê e a haapopou atu.” E tauturu te mau haapopouraa horoahia ma te aau tae mau i to tatou mau taeae e tuahine ia taa e mea faufaa roa ta ratou mau tutavaraa.

“A rohi tae noa ’tu i te hopea.” Na Mark Noumair, tauturu o te Tomite haapiiraa, i horoa i teie oreroraa parau. Na roto i te hi‘oraa o Paulo, ua faaitoito Taeae Noumair i te mau piahi eiaha e rave maa vahi iti noa o tei titauhia. Mai ia Paulo râ, e oaoa mau ratou ia faaohipa ratou i to ratou puai taatoa no vetahi ê.—Philipi 2:17, 18.

Aita o Paulo i tuu. Ua tamau noa hoi oia i te faaohipa i to ’na puai tae roa ’tu i to ’na poheraa. Nehenehe iho â ïa oia e parau: “Ua oti t[a] ’u hororaa.” (Timoteo 2, 4:6, 7) Ua faaitoito Taeae Noumair i te mau piahi ia pee i to Paulo hi‘oraa ma te turu noa i te ohipa a te Basileia i roto i ta ratou tuhaa taviniraa.

Faatiaraa. Na Michael Burnett, te tahi atu orometua haapii i Gileada, i rauti i teie tuhaa o te porotarama. Ua hauti te tahi mau piahi i te tahi mau tupuraa farereihia e ratou i roto i te tuhaa fenua i Patterson.

I ite pinepine na te mau piahi i te tahi mau tupuraa faahiahia i to ratou moemoeraa i te mau taime no te poro e no te faaite i te parau mau na roto i te reo tumu o te taata. Ei hi‘oraa, ua parauhia te hoê piahi e e rave rahi taata paraparau i te reo Paniora i roto i te tuhaa fenua ta ’na i opua e haere poro. Ua haapii ïa oia i te tahi mau ta‘o na roto i tera reo maoti te JW Language hou a haere ai e poro. I tera iho â mahana, ua faaohipa oia i ta ’na i haapii no te aparau e te hoê taata o tei haamata i te haapii i te Bibilia e maha atoa melo o to ’na utuafare.

Uiuiraa mana‘o. I muri a‘e, ua uiui o William Turner, tauturu o te Tomite taviniraa a te Tino aratai, e maha piahi ia faatia mai te tahi mau tupuraa na mua ’‘e a haere mai ai i Gileada e i te faaineineraahia ratou i reira.

Ua faataa te mau piahi i te mau haapiiraa i faaitoito ia ratou i te roaraa o tera faaineineraa. Ei hi‘oraa, ua haamana‘o hoê eaha ta ’na i haapii i roto i te Luka pene 10. Ua oaoa na 70 pǐpǐ ta Iesu i tono, ua manuïa hoi ratou i roto i te taviniraa. Ua oaoa atoa Iesu. Ua haapii râ oia ia ratou ia oaoa no te mea ua mauruuru roa Iehova i ta ratou mau tutavaraa. E haamana‘o te reira ia tatou e o to Iehova farii maitai te mea faufaa roa ’‘e. Na te reira e faaoaoa ia tatou, e ere na te mau tupuraa farereihia.

Ua faaohipa Taeae Turner i te Philipi 1:6 no te haapapu i te mau piahi e ua “haamata [Iehova] i te ohipa maitai” i roto ia ratou e tei pihai iho noa oia ia ratou.

“A tiatonu ia Iehova.” Na Samuel Herd, melo o te Tino aratai, i horoa i teie oreroraa parau tumu. Eita iho â e nehenehe e ite mata ’tu ia Iehova. E nafea ïa ia tiatonu ia ’na?

E nehenehe e tiatonu ia Iehova na roto i te hi‘opoaraa i ta ’na i poiete, o te haapii mai no nia ia ’na. Na Iehova i haa ia “maramarama te mata o to [ta]tou aau.” (Ephesia 1:18) Rahi atu â tatou i te taio i te Bibilia, rahi atu â ïa to tatou ite no nia ia Iehova. Rahi atu â to tatou ite no nia ia ’na, e piri atu â ïa tatou ia ’na.

E hi‘opoa atoa ana‘e i te mau Evanelia. E ite-maitai-hia te huru o Iehova i roto i te mau parau e ohipa a ta ’na Tamaiti. Ua pee maite oia i to ’na Metua: te huru o Iesu, te huru ïa o Iehova. No reira Iesu i parau ai: “O tei hi‘o mai ia ’u ra, ua hi‘o ïa i te Metua.”—Ioane 14:9.

Ua faaitoito Taeae Herd i te feia e faaroo ra eiaha e tiatonu noa ia Iehova, ia pee atoa râ i ta ratou e ite ra na roto i te hi‘oraa o Iesu. Ei hi‘oraa, mai ia Iesu i rohi no te faatamaa i te taata, e rohi ana‘e i te horoa i te maa pae varua tei horoahia mai.

Mai te peu e e tiatonu tatou ia Iehova, hoê â atoa ïa to tatou mana‘o e to te fatu salamo tei papai: “Ua tuu vau ia Iehova ei muâ ia ’u; tei tau rima atau oia, e ore au e aueue.”—Salamo 16:8.

Parau faaotiraa. Ua horoahia te mau parau tuite a te mau piahi e ua taio hoê o ratou i te rata haamauruururaa faaineinehia e ratou. Parau atura Taeae Jackson i te mau piahi eiaha ratou e mana‘o e pauroa te mau mea ta ratou e haapii ia vetahi ê, mea apî ana‘e ïa aore ra mea hohonu. I te rahiraa o te taime, e haamana‘o noa ’tu ratou i ta te mau taeae e tuahine i ite a‘ena. Ua parau atoa ’tu oia e e titauhia te haehaa. Eiaha ratou e huti i te ara-maite-raa i nia ia ratou aore ra i nia i ta ratou faaineineraa i Gileada, i nia râ i te Bibilia e te mau papai Bibilia. Eita ïa ratou e faatoaruaru i te mau taeae e tuahine eita ta ratou e nehenehe e haere i te haapiiraa Gileada, e tufa atu râ i te mau mea maitatai pae varua ta ratou i fana‘o. Ua faaitoito e ua turai teie porotarama i te feia e faaroo ra ia tavini i to ratou mau taeae e tuahine.

^ par. 2 Ua operehia te mau himene apî hoê hebedoma hou a tupu ai te porotarama na te feia e ruru mai.

^ par. 32 Aita pauroa te fenua i faaitehia i nia i te hoho‘a fenua.

^ par. 34 Aita i faahitihia pauroa te piahi.

No te ite atu â

O vai te rave nei i to Iehova hinaaro i teie mahana?

Eaha te haapiiraa faataahia no te mau pionie?

Eaha te haapiiraa taa ê tei faataahia no te feia e poro nei i te Basileia ma te taime taatoa?