Faatanoraa no te "mode accessibilité"

Search

Maiti te reo

Mau faaho'iraa ê

Eaha to roto?

Ite no Iehova

Tahiti

Hau atu i te 165 000 vairaa papai afaifai

Hau atu i te 165 000 vairaa papai afaifai

Ua matau-maitai-hia te mau Ite no Iehova no ta ratou ohipa pororaa i tera e tera fare. Te ite-atoa-hia nei ratou te tia ra i muri mai i te tahi mau vairaa papai afaifai anaanatae mau i te mau vahi taata.

Aita i maoro a‘enei te faaohipa-rahi-raahia teie huru pororaa. I te ava‘e Novema 2011, ua haamata te hoê pǔpǔ Ite no Iehova i te oire no New York i te faaite i te poroi Bibilia i te taata ma te faaohipa i te mau iri e vairaa papai afaifai. No te mea ua manuïa roa teie huru pororaa, ua parare oioi te reira i roto i te tahi atu mau oire.

I te ava‘e Mati 2015, ua haponohia 165 390 vairaa papai afaifai i te mau amuiraa a te mau Ite no Iehova i te ao nei. E tausani iri vairaa papai e vahi faaiteiteraa tei noaa atoa mai.

O te pororaa i tera e tera fare te ravea matamua roa ta te mau Ite no Iehova e faaohipa nei ia ite te taata atoa i te parau mau Bibilia. Mea manuïa maitai atoa râ te mau vairaa papai afaifai. Teie te tahi mau hi‘oraa.

I Peru, ua haafatata ’tu te hoê taata o Raul te i‘oa i te tahi vairaa papai afaifai e ua parau atu i na Ite no Iehova: “Ihea roa hoi outou? A toru matahiti i teie nei to ’u imi-noa-raa i te mau Ite no Iehova! I to ’u iteraa ’tu i ta outou vairaa papai afaifai, ua haamauruuru vau i te Atua.”

Mea pinepine te mau Ite no Iehova i te poro i te vahi e faaea ’i o ’na. Tera râ, aita o Raul i mau na i te fare. Ua faataa ’tu o ’na e ua haapii oia i te Bibilia e te mau Ite no Iehova na mua ’‘e, e te hinaaro ra oia e haapii faahou. Ua ravehia te tahi mau faanahoraa no ’na.

I Bulgarie, ua rave te hoê tane e to ’na apiti mea apî raua i te buka Te ravea e itehia ’i te oaoa i te utuafare i te hoê vairaa papai afaifai. I te hebedoma i muri iho, ua haere faahou raua i reira no te rave e piti atu â buka: Ta ’u Buka Aamu Bibilia e Écoute le grand Enseignant. Ua ui atu te Ite no Iehova i reira ehia tamarii ta raua. Ua pahono atu raua: “Aita e tamarii ta mâua. Ia roaa râ ta mâua tamarii, e hinaaro mâua e haapii atu no nia i te Atua. Teie mau buka iho â ta mâua e hinaaro mau.”

I Ukraine, ua tapiri atu te hoê tane e ahu faehau to ’na i e piti vahine Ite no Iehova i pihai iho i te hoê vairaa papai afaifai. Ua parau atu o ’na: “Ěi, a parau mai na afea o Aramagedo e tae mai ai.” Ua haa na teie faehau i roto i te mau aroraa i tupu a‘enei i Ukraine. Ua haapapu te mau tupuraa na te ao nei ia ’na e fatata Aramagedo e ua uiui atoa o ’na no te aha te Atua i ore ai i haa oioi mai. Ua rave na Ite no Iehova i te Bibilia no te faataa ’tu no te aha te Atua i ore â ’i i haa ’tura i roto i te mau ohipa a te taata e fatata râ oia i te haamou i te feia ino atoa. Ua rave o ’na i te mau vea Te Pare Tiairaa e A ara mai na! e te buka Y a-t-il un Créateur qui se soucie de vous?

I Makedonia, ua parau atu te hoê tane apî i te mau Ite no Iehova i pihai iho i te hoê vairaa papai afaifai e mea matau maitai ia ’na ta ratou mau vea, e hinaaro atoa râ oia e rave i te buka Eaha ta te Bibilia e haapii mau ra? Ua parau o ’na e e afaro roa o ’na i te fare vairaa buka huiraatira no te taio i te reira.

E piti hora i muri a‘e, ua ho‘i faahou teie tane i te vairaa papai afaifai. Ua taio oia i na 79 api matamua o te buka. “E taui teie buka i te oraraa o te taata!” Ta ’na ïa i parau. “Te taa ra ia ’u i teie nei e mea hape e rave rahi haapiiraa ta ’u i tiaturi na. Mea maramarama maitai te mau mea i faataahia i roto i teie buka. Ua taui roa to ’u mana‘o no nia i te oraraa!”

No te ite atu â

No te aha e haapii ai i te Bibilia?

E horoa te Bibilia i te mau pahonoraa i te mau uiraa faufaa o te oraraa i te mau mirioni taata na te ao nei. E hinaaro anei oe e ite i tera mau pahonoraa?

Eaha te ravehia i te hoê haapiiraa Bibilia?

E pûpû te Ite no Iehova na te ao nei i te hoê porotarama haapiiraa Bibilia tamoni ore. A hi‘o i te tereraa o te reira.

E Kerisetiano anei te mau Ite no Iehova?

Mea taa ê mau matou i te mau pǔpǔ faaroo parauhia Kerisetiano, a hi‘o e nafea.